أهل زوجي سرقوا عفش بيتي

قصتى غريبة ،يمكن اول مرة تسمعوا عنها، عمركوا شوفتو عروسة تفرش شقتها قبل الفرح بايام فيروح العريس واهله تانى يوم فرش علشان يسرقوا حاجتها اللى فرشتها!!!! انا حصل معايا كدة بس طبعا اكتشفت ده بعدين ، اولا مش انا وماما اللى فرشنا الشقة لوحدنا كان معانا قرايبنا بيساعدونا علشان كدة مكنتش فاكرة كل حاجتى كويس وجهازى معظمه ماما اللى اشتريتهولى.المهم كذا مرة ماما تقولى انا حاطالك فى الدرج بتاع المطبخ مثلا ٢٠ فوطة مطبخ وانا ابص فى الدرج ما الاقيش غير ١٠ فوط بس وقلبت الدنيا على الباقى مفيش. وده مثال اكتشفت انهم سرقوا حاجات من ملابسى وحاجات المطبخ و فوط السفرة وفوط الحمام واطقم كاسات من النيش.حسبى الله ونعم الوكيل.يعنى سرقونى قبل ما ادخل حتى شقتى وانا عروسة. انا مصدووومة واول مرة اشوف كدة. دى نقطة اصلا فى بحر مشاكلى معاه،انا اكتشفت ان جوزى زير نساء وبيخونى بمكالمات التليفون مع الستات ومش بيعمل حاجة غير باذن امه ،و بخيل وبياخد مرتبى يصرف بيه على البيت وبيحوش مرتبه اللى هو اكتر من ضعف مرتبى فى البنك، وغير كل ده بيتحول لوحش فجاة مع نقاش عادى بيتعصب جدا وبحسه بيتحول قدامى وببقى خايفة منه اوى ويفضل يضرب فيا بالساعات ويركلنى برجله وبعد ما يخلص يطبطب عليا وينام جنبى ويقولى تعالى اما استمتع بيكى بقى. يعنى مريض نفسى للاسف.انا بقى عايشة فى صدمة كبيييييرة مالهاش اول من اخر مش عارفة الاقيها منين ولا منين ولا منين....واكتشفت ان امه منافقة بتعاملنى كويس فى وشى ومن ورايا بتسلطه عليا وبتشجعه على ضربى .ليه ده كله ده انا نفسى صعبانة عليا اوى اوى علشان كنت بعشق تراب رجليه وعملت معاه مواقف كتير حلوة ووقفت جنبه فى المشاكل وحاربت كل الناس عشانه واهلى فى فترة الخطوبة كانو مش مرتاحين له ولاهله وعايزين يفسخوا الخطوبة بس انا اتحايلت عليهم علشان يسيبونا نتجوز كانت عائلته مالهاش كلمة كل حاجة اتفقوا فيها معانا رجعوا فيها وغيرو كلامهم وده ماكنش مطمن بابا وماما،المهم انا اتطلقت بعد ٥شهور جواز و مفيش اطفال . انا عندى ٢٥سنة ومطلقة حالى صعبان عليا اوى علشان مكنتش متوقعة الضربة القاضية تكون من اقرب انسان ليا. نفسيتى تعبانة اوى بضيع وقتى فى عملى ولكنى عايشة كدة وخلاص محطمة الاهداف،ونفسى اتكسرت .نفسى حد يدينى طاقة ايجابية استعيد بيها قوتى من جديد .وشكرا لكم يا اخواتى .