خطيبتي تتحسس من أي كلمة أقولها ما الحل معها؟

خطيبتي بنت جميلة ومحترمة ومتعلمة ومثقفة وانا بحبها من فترة كبيرة .. الحقيقة ان الفترة اللي فاتت كان فيه شوية مشاكل بمعدل كل يومين مشكلة مرة بسبب اني كنت مع اصحابي والموبايل فصل مني فمقدرتش اكلمها غير متأخر ومتكلمناش كتير ودي نقطة بتحسسها انها مش في اهتماماتي وفي نفس الوقت انا اصلا عندي دراسة بتاخد وقتي فاتفقنا هنخلي الكلام من 10 ونص كده 11 لحد ما ننام عالساعة 12 او 1 بالليل .. الموضوع ده مضايقها جدا .. وموضوعات تانية بتبقى بسبب ان كل واحد ي مود مختلف عن التاني. . مرة كانت بتتكلم في حاجة مهمة انا كنت شايفها عادية فكنت بكرر كلمتين من اللي قالتهم فاتضايقت وقعدت حوالي ربع ساعة تقولي ان ده مينفعش وتقطم فيا .. ومرة كنت جبت خط جديد ليها فمكانتش عايزة تغير الخط القديم عشان عليه 20 جنيه رصيد فقولتلها "عشرين جنيه ايه ده انا بشحن كل يوم 20 جنيه فليكسات" وبعديها قولت "الخط ده هيوفر علينا" وبكلمها اننا واحد يعني .. الحقيقة ان انا حاسس ان فيه حساسية متزايدة من ناحية كلامي اتمنى اعرف هل ده ممكن يكون بسبب ايه ولا دي حاجة عادية !!