لا وجود لي وأشعر أني ظل لمن حولي

السلام عليكم .. انا فتاة فى منتصف العشرينات .. مشكلتى التى بعانى منها من مدة هى انى مش عارفة ايه هى مشكلتى انا مش عارفة انا عايزةاشتغل ايه او عايزة اشتغل اصلا ولا لاء .. مش عارفة انا بحب ايه ومش بحب ايه .. عايزة اتجوز ويبقى ليا بيت وزوج يخاف عليا وفى نفس الوقت مش متخيلة انه ممكن يبقى حد مش كويس الفترة دى يمكن ابتديت احس اوى انى عديمة الشخصية لما لقيت ان كل اللى حواليا من اهلى ومعارفى كل واحد بيعمل اللى هو عايزه علشان هو عايز كده .. على عكسى انا ممكن اخرج مع زمايلى علشان هما عايزين يروحوا المكان الفلانى ممكن مثلا ابقى شبعانه بس علشان والدتى راجعة تعبانة من الشغل وهتاكل لوحدها اكل معاها مع ان اخواتى كلهم قالولها لا احنا مش عايزين ناكل دلوقتى ممكن ابقى عايزة اروح مكان بس علشان والدتى مش عايزانى اروحه علشان هى هتزعل وتضايق وضغطها يعلى لو رحت امثل قدمها انى عايزة اروح .. فى الحين اللى اختى الاصغر منى بتجى تقولها انا هروح المكان الفلانى من غير اى نقاش ووالدتى بتخضع ليها علشان هى شخصيتها قوية ممكن نبقى قاعدين كلنا بنتفرج على المسلسل ووالدتى تقول لاختى قومى اعملى شاى اختى تقولها لا مش هعمل .. والدتى تبصلى وتقولى قومى انتى لو قلتلها مش عايزة تقعد تزعق لى وتشتم فيا فى نفس الوقت اللى اختى برده رفضت ومحصلش حاجة .. انا سنى وصل 25 سنة ولحد دلوقتى مش قادرة اختار بلوزة اشاريها لنفسى بثقة .. انا تعبت جدا ومش قادرة اكمل حياتى بالطريقة دى .. انا مليش اصحاب لان كل م يكون ليا حد قريب منى بحس انى مش ببقى نفسى وانا معاه يعنى لوصاحبت واحدة بتحط ميكب بروح اشترى ميكب واحطه .. لما صاحبتى كانت محجبة الحجاب الطويل لبست الحجاب الطويل ولما صاحبت واحدة منتقبة كنت عايزة انتقب ولما رجعت بعدها صاحبت واحدة عادية رجعت خلعت الخمار وتخليت عن فكرة النقاب نهائى .. لو اختى عايزة تروح فى مكان بروح معاها علشان متبقاش لوحدها برغم انى فى اغلب الاحيان مش ببقى حابة المكان اللى انا رايحة ليه او مش من اهتماماتى علشان مزعلهاش .. ولو انا طلبت منها تيجى معايا فى مكان بترفض بكل اريحية وتقولى لاء انا مش عايزة اروح المكان ده انا حاسة انى مليش راى انى مليش شخصية ومش موجودة فى الدنيا .. انا بعمل الحاجات اللى الناس عايزانى اعملها بس لمجرد انهم ميزعلوش او انى اجرح مشاعرهم بحاول ااقلد وبس لكن انا مش عارفة انا عايزة ايه ..مش بعرف ااقول لاء فى وش حد .. انا حاسة انى موجودة .. انا ظل للناس اللى حواليا .. انا ولا حاجة