دليل مرض أم دليل حب؟

صاحبي مجنني غيرة او على الادق شك٬ اولها كنت افكر تصرفاتو اشي حلو ودليل على الحب بس تحولت لشك واتهامات٬ اذا بمزح مع زميل معناه بزبطو٬ اذا بخبط بحدا معناه انا ما بعرف امشي منيح٬ اذا حدا اتطلع فيي معناه لبسي مو محتشم٬ اذا بضحك بصوت عالي مشكلة واذا تلفوني مشغول مشكلة٬ لازم احكيلو شو بعمل ووين انا بالتفصيل واذا بنسى اشي يا ويلي٬ علما انو هو غير متدين ولا انا٬ هو كمان بشرب واسلوب حياتو منفتح٬ لما اعاتبو بيقلي انا بحبك وبخاف عليكي لاني بعرف نفسيات الشباب بالبد وما بدي حدا يحكي عنك٬ صحباتي بحكولي انو كل الشباب هيك وانو بحبني وزلمة وانو مع الوقت بخف٬ صرلي مصاحبتو سنة بحبو كتير بس بخاف منو ومن عصبيتو وكل ما بنتخانق على هيك موضوع بتمد الخناقة اسابيع وانا الي دايما بصالحو وبحس اني مذنبة٬ هل هو مريض ولا متل ما بيقولي صحباتي هادا دليل حب؟ حيتغير والا حيضل هيك على طول؟