رزقت بابنتين من ذوي الاحتياجات الخاصة ولكنهما مصدر سعادتي

رزقت بفتاة من متلازمة داون والأخرى لا تمشي لكنهم مصدر رزقي وسعادتي انا مصممة أزياء أطفال وأم لبنتين من ذوي القدرات الخاصة تزوجت أثناء جامعتي وخلفت ابنتي الأولى في الشهر السابع من الحمل وقعدت فالحضانة 40 يوم تقريبا أما طلعت كانت فرحة الدنيا مش سيعاني هي أحلى ما رزقني ربنا لكن لاحظنا تأخر بالنمو الحركي بالرغم من ذكائها الشديد وكمان أتكلمت بدري عن العمر المتوقع لأي طفل تواصلنا مع عدد كبير من الاطباء والكل كان يقول سبب ضعف جسمها مأثر عليها لحد ما تمت 7 شهور وقدرتها على الجلوس صعبة قدرنا نتواصل مع دكتور مخ وأعصاب وطلب إشاعة على المخ وأكتشف إن عندها ضمور في خلايا الحركة وكانت أكبر صدمة لما الدكتور قال إن ملهاش علاج غير العلاج الطبيعي وهتمشي بعد 7 سنين ويمكن متقدرش تمشي كان الشعور صعب وعدم تصديقه وصلنا أننا نروح لكل الدكاترة في أماكن مختلفة وسافرنا وللأسف الكل أجمع أن مفيش غير العلاج الطبيعي وبعض العمليات لتطويل الأوتار للحفاظ على رجلها وعشان حالتها ما تتأخرش أكثر بدأنا معاها مشوار العلاج الطبيعي يوميا وبعدها بـ 3 سنوات ربنا رزقني بابنتي الثانية وبعد شهر من ولادتها أخدناها لدكتور أطفال وأول ماشافها بص في الأرض وهز دماغه وقال ربنا يعوض عليكم البنت من متلازمة داون وأعملوا التحليل ده عشان تتأكدوا أكيد الكلام مستحيل يوصف المشاعر اللي كنا فيها وقتها حسيت أوقات كثير الدنيا وقفت وسرعان ما فقت من الصدة وربنا زرع حبها في قلبي لدرجة لا توصف كنت ببص في وشها كأني شايفة ملاك وبعدها عرفنا أن عندها عيب خلقي في القلب ومحتاجة عملية ونجحت ورجعت لحضني بدأت أقرأ وأثقف نفسي وأتطور وأعرف أزاي أتعامل مع النمو الذهني عندها وبدأت أطبق معاها كل حاجة بتعلمها والحمد لله مع مرور الوقت اكتشفت أن الأطفال من متلازمة داون من أجمل أطفال الدنيا يمتلكون من الطيبة والحنان والشفافية ما لا يمتلكه أي بشر كانت مصدر البهجة والسعادة والضحكة معاها من القلب وكنت بضحك وهي بتلعب ضحك لا يمكن أضحكه مع أي شخص ربنا بعتها لأختها عشان تكون سندها ومصدر سعادتها كان دائما يقابلني مشكلة في شراء اللبس خصوصا أن بنتي الكبيرة ما كانتش بتمشي وكنت بضطر أشيلها دائما وأنا بشتري لها ملابسها غير أنها كانت نحيفة جدا وصعب ألاقي لبس يليق عليها وكانت عندي هواي التفصيل من صغري فقررت أجرب وأعمل لبنتي بنفسي وكان عند حماتي ماكينة منزلي صغيرة طلبتها وأتفرجت على فيديوهات كثير وأتعلمت لحد ماوصلت لمرحلة كويسة جدا وبفضل الله لقيت ناس بتطلب مني أعمل لبس لأولادهم فقررت أعمل براند خاص بيا طبعا الموضوع صعب في صعوبات وتحديات كثيرة يمكن النوم أصبح معدوم غير كلام محبط من ناس كثيرة وتفاصيل صعبة مع بناتي والناس من حولي غير صعوبات التسويق والانتشار خصوصا أني كنت بشتغل فترة وأوقف وأرجع نظرا لظروفي لكن كان عندي شعور أن ربنا حطني في المجال ده عشان فيه خير وبالفعل قررت عمري ما أوقف شغل مهما كانت الظروف وقررت أن يكون بناتي هم الموديل بتوعي وأواجهه بيهم المجتمع وأعرض كل شغلي عليهم تعلمت كثير وأدركت أن قربي من ربنا هو المنجي الوحيد وبناتي فعلا مصدر سعادتي ونعمة ورزق راضية جدا بوجودهم في حياتي وممكن أتحدى بيهم الحياة والناس ورب الخير لا يأتي إلا بالخير