هل للمطلقة أن تتزوج من أعزب؟

انا مطلقة وموظفة وجميلة جدا علي حسب قول كل قرايبنا ومعارفنا ومستوايا الاجتماعي جيد جدا ، ومن عائلة محافظة ووالدي يعمل بوظيفة مرموقة ،و عندي 25سنة اتجوزت واحد شهرين بس و طلبت الطلاق بعد ظلمه ليا وضربه المبرح ليا اللي مشوه جسمي بعلاماته وخياناته و كذبه واهانته ليا ولاهلي، انا اتبهدلت كتيييير بسببه وانا لسة عروسه وكل ده وكنت بعطيه مرتبي كله وبيديني منه مصروفي بس ،يجي من الشغل يتغدا وينزل يقعد عند امه لحد الليل وبعدين يجي يتعشي وننام وهكذا كل يوم ومش بيقعد معايا خالص ولا في اي حوار بيننا ، كنت بتكلم معاه واعبرله عن ان بيبقي نفسي ما يسيبنيش كل يوم لوحدي وان انا زعلانة انه مش بيحكيلي عن اي حاجة بتحصل معاه كاني غريبة كان يرد يقولي انتي عايزة تمتلكيني ولا ايه.. انا فاهم انتي عايزة توصلي لايه انتي مش عايزاني اروح لماما!!! استحملته كتييير لاني كنت عارفة انه بيكلم واحدة معانا في الشغل بيحكيلها علي كل كبيرة وصغيرة في حياته وحتي اللي بيحصل بيننا وهي كانت بتوجهه وتتحكم في علاقتنا. انا كنت عارفاها دي سنها زي والدتي انا اصلا بشتغل معاه في نفس الشغل والست دي مسيطرة عليه جدا وهو شخصيته ضعيفة معاها جدا ،بيتقوي عليا انا بس. المهم ضربني اخر مرة واهلي اجبروه انه يطلقني بعد ما شافوا حالتي بع الضرب ومنظري ومنظر جسمي كشفت عند الدكتورة وما كانتش مصدقة ان جوزي اللي عمل فيا كدا ده كان حيوان كان مهاجمني.. انا عشت فترة في انهيار بعد الطلاق اخدت اجازة من الشغل وبعها نزلت الشغل تاني بعد ما طلبت النقل واتنقلت علشان اخلص منه وابدا صفحة جديدة. ساعات احس انه خلاص هعيش حياتي عادي وساعات احس ان الدنيا خلاص انتهت بالنسبالي ونفسي اموت واستريح، وكذا يوم كدة ويوم كدة، انا راضية وبقول الحمد لله اني مخلفتش منه ،بس انا انسانة وبضعف من فترة للتانية برجع من الشغل اقفل قوضتي عليا وافضل ابكي بحرقة كان الموضوع لسة كان امبارح. بعدها بشهرين اتقدملي عريس اعزب لم يسبق له الزواج عنده 30سنة عن طريق اخته هي معانا في الشغل بس بابا و ماما رفضوه من غير ما حتي يشوفوه لانه مش عنده شقة غير واحدة ايجار امه قاعدة فيها وفي منطقة شعبية، ومش عنده وظيفة حكومية مثلي ثابتة يعني ممكن يسيب الشغل او يسيبوه في اي وقت فبابا وماما خافوا يكونوا طمعانين فيا لان مفيش توافق في المستويات بيننا ،فالخوف زي ما طليقي كان مختلف عني في المستوي التعليمي ومع ذلك ما اهتمتش ووافقت عليه مع انه خريج معهد وانا خريجة جامعة حكومية وكلية كبيرة وبتقدير ممتاز ومع دلك عمري ما اتكلمت معاه في المواضيع دي خالص عشان ما احرجوش. المهم اهلي رفضوا العريس مع الحاح اخته اكتر من مرة وانا برفض لرفص اهلي وكمان كنت لسة خارجة من تجربة صعبة وبطلت اثق في الرجالة. المهم واصلت حياتي بين يوم حلو ويوم مر واتقربت من ربنا كتيير ولقيت راحة كبيرة والحمد لله. انا غصب عني كتير بضعف وابكي واندب حظي واقول اشمعني انا اللي طلع حظي كدة والله ما كنتش بحلم غير اني اتجوز واحد طيب ومحترم ويحبني واحبه ونعيش مع بعض في امان ويبقي عندنا اولاد ونفرح بيهم ونربيهم احسن تربية. المهم بعد فترة اتقدملي واحد معانا في الشغل مطلق عنده 38سنة وعنده بنت واحدة عايشة مع والدتها هو وسيم جدا وطويل ومظهره كويس جدا ومستواه المادي والاجتماعي ممتاز ، بس اهلي بردو رفضوا من غير ما يقابلوه حتي قعدوا يقولولي انه طلق وساب بنته بسهولة ومحافظش علي اسرته زي ما ساب بنته ممكن يسيبك وممكن يخلف منك ويسيبك ويتجوز واحدة تانية بسهولة وكمان اكبر منك ب13سنة وانتي جميلة وصغيرة واتطلقتي اه بس من غير عيال قولتلهم انا مطلقة فكل اللي هيتقدمولي هيكونوا مطلقين وناد لما يبقي حد مطلق من غير عيال يبقي انا كدة عمري ما هتجوز لو مشيت بنظريتكم ،فماما بتقولي وايه يعني انتي اتجوزتي شهرين بس ومفيش عيال وطليقك كان وحش جدا وليه ظروف خاصة فانتي اتظلمتي وعادي في بنات زيك كتير كدة واتجوزوا واحد اعزب ولم يسبق له الزواج .اقولها يا ماما الراجل بيحب يتجوز واحدة هو اول واحد في حياتها ،تقولي لو علي كلامك ما كنتش واحدة مطلقة اتجوزت. انا مش عارفة حاسة اني زعلانة علي العريس التاني انا كنت موافقة عليه و يمكن تكون طليقته وحشة ومش كويسة وهو مظلوم بردو زيي ليه حكموا عليه انه ما فيش فيه خير وانه محافظش علي بيته واتخلي عن بنته وانه اناني. انا مش عارفة الصح من الغلط هل بابا و ماما عنهم حق ولا لا وهل انا ممكن اتجوز واحد لم يسبق له الزواج ولا لازم اتجوز واحد مطلق او ارمل وهل اهل الولد بيقفوا بيعترضوا اذا فكر يتجوز بنت مطلقة زيي وفي حالتي. نفسي اعرف الناس بتفكر فيا ازاي واذا حد فكر يتجوزني وعرف اني مطلقة هيصر يتجوزني ولا هيبعد نفسي اعرف الرجال بيحسبوها ازاي وبيشوفوها ازاي وهل بابا وماما كانوا صح لما رفضوا ووجهة نظرهم صح ولا غلط. اتمني انكم تجاوبوني علي كل الاسئلة دي لانها تعباني ونفسي الاقي حل واجابة.. انا اسفة علي الاطالة بس حبيت اوضح لكم حالي عشان تفهموني. وشكرا.