عصبية زوجتي لا تُطاق ولا أريد الطلاق

السلام عليكم هذه اول مره بحياتي اطرح مشكلة على الانترنيت او حتى افاتح بها شخص غريب وما غريب الا الشيطانعلى العموم اني متزوج من شي ثمان شهور وحياتي صرت احسها جحيم بسبب تصرفات زوجتي الوصلتني المرحلة الجنون ! زوجتي انسانة متربية ومتعلمة وواصلة ومخلصة دراستها وبنت محافظه على نفسها بس يعيبها العصبية وتدخل احيانا بحالات هستيرية تبدي تصيح وتصرخ ومستعدة بنص الشارع تسويها ومتهتم للجيران او الاشخاص الغرباء انا بعيد حاليا عن اهلي استقريت بنفس المدينة الي كبرت هيه فيها بسبب ظروف عملي الحالية وبنفس الوقت اتوقعت انه ما اريد احرمها من امها واخليها قريبة عليها لان على البنت اكيد تكون صعبة بس للاسف صرت احس القرار خطأ كان! بدت المشاكل من فترة الخطوبة اللي استمرت تقريبا سنة، السبب لان ما وفرت الوقت الكافي الها وخلصت حياتي بس عمل حتى اكدر اجمع مصاريف الزواج لان المطلوب مني مكان بالشي البسيط مع هذا الحمد لله والشكر كدرت اسويلها احلى عرس تحلم بيه كل بنت واستمرت المشاكل الى ما بعد الزواج وصبرت نفسي وقنعتها انه كل زوجين بالبداية اكيد تكون بينهم خلافات شخصية او بالاحرى اختلاف بالاراء وهذه تبدي تزول مع الوقت بس للاسف الفترة الاخيرة صارت تدخل اهلها من تصير مشاكل الي اسبابها جدا تافه !! وصارت تتهجم على اهلي وتتجاوز عليهم لان قصرو بحقها وما دعوها الى مدينتهم او ميسالون عليها بشكل دوري وتتوقع انه همه يكرهوها وتقلي بنفس الوقت شوف اهلي معاك وشوف اهلك واني اقلها يابنت الناس علينا بحياتنا علينا في بيتنا وتهدئ الامور مع العلم اهلها وصلت مرحلة سقطو من نظري !! على العموم وراها ترجع تشتعل من جديد من يكون مزاجها معكر...اتصايحت مرة مع امها ورفعت صوتها عليه ورديتها بالمثل وبكل مره اهدي اعصابي واقول ما اريد اهدم بيدي وهذا الشي اتكرر اكثر من مرات ..اخير شي بسبب شي تافه بدت تصرخ وتكسر اضطريت اضربها ضربه خفيفه حتى اسكتها (هذا الشي غلط وميجوز بس اني ايضا بشر واعصابي تلفت!!) يتصل عليه ابوها (ويأمرني) ارجع لمدينتي وصار يعلى صوته بنفس الوقت رديته بنفس الصوت ومتحملت اسكت راح الاب يتصل على اهلي ويشكيلهم بحالة عصبية وصار يتكلم مع امي ويصرخ عليها! وهذا الشي ميجوز لان الرجل لازم يكلم الرجل وليست المرأه !!! وامها تصارخ بنفس الوقت على التلفون وامي تحاول تهدي الامور وتقله هذي امور بينهم لا ندخل نفسنا وهو يرد اني بنتي متنضرب ولا تنهان! زوجتي حملت غراضها وراحت عند اهلها واني متاكد ابوها يمنعها من الرجوع للبيت ويحاولون يقرون براسها انه هيه الصح واني الغلط !! بالنسبة لشخصي اني مو انسان كامل ...اني عصبي ومتقلب المزاج بس بنفس الوقت محارمها من اي شي !! مدخولي جيد ومشتريلها سيارة ومدللها احلى دلال وما مقصر وياها باي شي، وبالنسبة الها بيتها غير نظيف وصلت مرحلة اني صرت انظف من افرغ لان بدت تلعب نفسي، متطبخ ولاتهتم لاكل زوجها ممكن مره او مرتين بالاسبوع وجبتين تعمل فقط!! وبهذا الوقت مزاجها يكون منفجر لذلك يجب تجنبها متاخذ الامور بجدية وتاخذ كل شي بالسهل وكل رجل من يحلم يتزوج ويحقق الحلم يتوقع ابسط متطلبات الحياة الزوجية موجوده ويكدر يعيشها مع زوجتة بس للاسف عطيت وقت بما فيه الكفاية وما اشوف اي تغيير !! اني مرات احمل نفسي الغلط ايضا اقول ممكن اكون انا ايضا السبب بهذا وسامحتها كثير بس والله مو غرور بس بهذا الزمن صعب البنات يلقون الانسان البعيد عن الامور التعبانة والسهر والصحبة والاصدقاء والشرب حياتي عبارة عن عملي وزوجتي وبيتي بس رغم هذا متدمرة نفسيتي !! الطلاق من اخر الاحتمالات لان هذا من ابغض الامور اللي تهدم البيوت وتخربها وبنفس الوقت بنات الناس مو لعبة اسف على الاطالة وراح اكون متابع لارائكم تحياتي الكم