خسرت حب حياتي بسبب خلافات بين الأمهات

السلام عليكم ورحمة الله وبركاته تحياتي إلي كل القائمين علي هذا الموقع الطيب الأثر تحية طيبة اليكم بصراحه انا امر بفتره صعبه جدا وهي اصعب مرحله بحياتي واريد ان اطرح مشكلتي لديكم واتمنى ان القى حل يردلي طعم الحياه الي فقدنه من سبب هالمشكله . مشكلتي بالتفصيل هي اني حبيت بصدق واخلاص بنت من سكان الحي كانت تزورنا مع اهلها وكتمت حبها بصدري من وانا عمري 17 سنه وحطيتها هدف بحياتي وخططت لكل شي بالتفصيل من حيث اتخرج بمجموع جيد واتخرج من الجامعه وارسل اهلي واخطبها والتحق بالوظيفة الي احلم فيها ثم اتزوجها . والحمد لله كل شي صممت على الوصول له وصلتله تخرجت من الجامعه وارسلت اهلي وخطبتها ووافقو اهلها بس قالو خلو الولد يستنى سنه لما البنت تتخرج وستنيت سنه وتخرجت البنت ورجعت وخطبتها وشفتها الشوفه الشرعيه بعد انقطاع عنها 10 سنوات وما اقدر اوصف الفرحه وقتها كنت دايم ابكي من الفرح وبعدها بفتره قصيره التحقت بوظيفتي الي حلمت فيها وهذا الكلام كله بالضبط قبل سنه من ذحين وحاليا ابلغ من العمر 27 سنه . المهم بعد فتره صارت البنت تتواصل مع خواتي واخوانها يتواصلون معي والعلاقه بيننا من احسن مايكون لاكن المصيبه هي بين امي وامها دايم بينهم مشاكل امها لامباليه لدرجه البرود الشديد وامي عكسها تماما متسرعه وعجوله وتغضب بسرعه وكل مشاكلهم اقل ما يقال عنها تافهه . وكانت البنت ترسلي رسايل حب لي عن طريق اختي وانا كذالك ارسلها عن طريق اختي ولم استطع محادثتها مباشره بحكم العادات والتقاليد وكانت اخر رساله منها لي قبل المصيبه بيوم . وفي يوم مشؤوم (يوم المصيبه)كنت راجع من سفري وكان عندي انتداب بحكم العمل ورجعت لمدينتي وياليتني لم ارجع . رجعت لقيت امي وامها متهاوشين وواصله الامور بينهم لابعد حدود الكره والغل وكانت سبب المشكله هو يوم تحديد الفرح . كانت امي تبغاه بوقت ام البنت لم يعجبها فقالت لها امي بعصبيه اليوم تحدد واحنا حجزنا واذا ما اعجبك اليوم خلي بنتك عندك وكانت هذه هي الطامه الكبرى . اتصلت ام البنت وقالت لامي مالكم نصيب عندنا ووقتها امي صعقت من الرد وتهاوشو وقطعو العلاقه بينهم وبعدها اتصلت في اختي وقالت ان البنت زعلانه وتقول اني ماضي بحياتها وانتهى وتهاوشو اختي وحبيبتي الي شقيت بعمري عشانها وانتهت العلاقه بينهم وبعدها بدقائق كلمني اخوها وهو في حالة صدمه وقالي لازم اشوفك وحين قابلته اعطاني الهديه الي جبتها لاخته بيوم الشوفه وقالي بصريح العباره الله يسامح الحريم ضيعوك . ومن وقتها وانا مصدوم وماني مصدق الي صار وحاولت ان اجد حل ووقتها ذهبت الى اخوها واخبرته بكل التضحيات الي سويتها عشان اخته وان ابوه ليه ما تكلم مع ابوي في ذا الموضوع وقتها صعقت من طريقة كلامه معي كانه بيتهرب مني ولاكنه اخبرني بلي صاير فبيتهم وانه والده مسافر وان اهلي كلهم يبغونك بما فيهم اختي ولاكننا ما نبغى امك لانها تفرض رايها علينا وقلتله اني بروح لعمتي تتوسط عند امك وتحل الموضوع فوافق وقال لي روح لعمتك واذا عمتك ما جابت نتيجه مع امي استنى ابوي يرجع من السفر وكلمه و من لحظتها رحت الى عمتي كي تصلح المصيبه الي ضيعت عمري وذهبت عمتي لام البنت وحاولت ان تصلح الامور ولكنها رجعت معصبه من ام البنت وقالتلي نصيحه شوف غيرهم . رجعت البيت لقيت امي تدور لي على عروسه غيرها وحاولت اقنعهم ان الموضوع ما انتهى وانه الافضل نستنى ابوها يرجع وابوي يكلمه لاكنهم رافضين الى بشرط ان ابوها يتصل على ابوي ويتفاهمون . وانا اعرف طبع ابوها ماحيسوي كذا هو رجل متدين وطيب ويحبني كثير ولاكنه غير مبالي بشيء حوله ويسمع لكلام زوجته ضعيف شخصيه . افكر اجلس مع ابوها واقوله كل الي بنفسي لعل وعسى ان يحن علي ويعرف اني شاري بنته واني مالي دخل بلي صار ويرد الامور لمجاريها وبنفس الوقت اخاف ارجع مكسور القلب والخاطر . وانا الى الان منقهر وزعلان وعايش عيشه انسان ميت بجسد حي وحرام الي قاعد يصير في والحياه اصبحت بلا لون ولا طعم ولا رائحه ودايم يا ابكي يانايم يا بالعمل ولا اعرف ماذا افعل ودايم اشوف رسايل البنت عني اتحسف على الي صارلي . الرجاء افيدوني كيف ارد حلم عمري الي مسكته بيدي وطار بتفاهه من امي وام البنت ؟ وهل اصبح مستحيل