هل يمكن أن يظل صديقي صديق بعد خيانته لي مع زوجتي؟

هل يمكن أن يظل صديقي صديق بعد خيانته لي مع زوجتي؟ اتصدمت صدمة كبيرة في مراتي وصاحبي المقرب جدًا مني، كنا خارجين أنا ومراتي عادي، وفي الشارع واحد خطف الموبايل من إيد مراتي وطلع يجري بسرعة، لقيت نفسي بجري وراه بأقصى سرعة، ولما لقاني قربت أمسكه خلاص، قام حدف الموبايل من إيده على الأرض وكمل جري، أنا طبعًا أخدت الموبايل من الأرض، وكان فيه تلفيات حصلت فيه، فقلت هوديه لواحد بتاع موبايلات يصلحه، لقيت مراتي بتطلب مني إني ما أصلحوش وتجيب واحد تاني خلاص، ومصممة على كده، وأنا كمان صممت إني أصلحه ونفذت كلامي، لاحظت إنها مش عايزة تديني باسورد الموبايل، فقلت خلاص، هخلي الراجل بتاع الموبايلات يتصرف ويفتح هو الموبايل، وبالفعل فتح الموبايل ولغى السوفت وير بتاعه، وكنت طالب منه يحفظ كل محتوى الموبايل عشان يرجعه عليه مرة تانية بعد التصليح

بعد ما استلمت الموبايل، وكنت مستغرب ليه مراتي رفضت إني أصلح لها الموبايل، فضلت أقلب فيه كتير وأنا منتظر في مكان برا البيت، لحد ما وصلت لملفات ومحادثات كتير مخفية تمامًا، اكتشفت إن الهانم بتكلم صاحب عمري بدون علمي، وفي بينهم محادثات وغراميات وصور، فضلت أقلب لحد ما عرفت إنهم اتقابلوا أكتر من مرة، وحصل بينهم تجاوزات كمان، أنا فعلاً في صدمة وذهول من اللي عرفته، ولا يمكن كان يخطر ببالي نهائيًا

أنا لقيت آخر محادثة بينهم من حوالي شهرين ونص تقريبًا، هو اللي بيطلب منها إنهم يقطعوا علاقتهم ببعض، لأنه حاسس بالذنب ناحيتي أنا، وخايف يخسرني باعتباري صاحبه المقرّب، لكنها هي اللي عايزة تكمل معاه ومش عايزة تسيبه، وحاولت تكلمه كتير بعدها لكنه ما بيردش عليها، وعايزاه يرجع تاني يعمل معاها اللي كانوا بيعملوه، لكنه رافض، طبعًا أنا هنا في ذهول وصدمة رهيبة بالنسبة ليا، وحقيقي مش عارف أعمل إيه في الموقف ده، هل ينفع أكمل حياتي تاني مع مراتي بعد اللي عرفته؟ وكمان صاحبي ده، هل ينفع يفضل صاحبي تاني؟ ولا كده خلاص، معدش ينفع