أعيش ضحية بخل وطمع والدي في هذه الحياة

مش عارفة ابدا كلام منين .. انا كل اللي اقدر اقوله اني بنت عادية زي باقي البنات كنت بتمنى احب و اتحب و اتجوز و اعمل عيلة يعني زي اللي ف سنى .. دخلت الجامعة و اشتغلت فترة و انا بدرس .. اتقدملي ناس كتير بس رفضت .. لسبب واحد بس هوا انه احنا ماعندناش صالون و لا فرش و لا سفرة .. والدي و والدتي كان بينهم مشاكل ف أبويا حبس العفش ف شقة غير اللي ساكنين فيها .. و

قاعدين على فرش جدي و جدتي القديم اللي من السبعينات .. كنت لما شاب يجي يطلب رقم والدي عشان يخطبني كنت ف الأول بفرح .. بعدين بفتكر ظروفي ف اعتذرله .. لحد م جيت من فترة حبيت شاب و حبني و طلب يخطبني انا مقدرتش اقوله لا لأني حبيته و مقدرش أتخيل مستقبلي من غيره .. بس قولتله اديني مهلة بس عشان بابا عنده شوية مشاغل .. مرضيتش اطلع سر بيتي بره .. حكيت لماما عليه و هوا حكي لوالده و والدته عني و لقى منهم قبول للموضوع .. كنت بأجل انه يكلم بابا علي أمل أنه يجيب الفرش و نظبط الشقة و يجوا يخطبوني و كان بابا موافق ف الأول رجع امبارح جاي يقولي انا مش هجيب حاجة و لا هنقل قشاية من الشقة خليه يجي ف الشقة القديمة و هيا السيراميك بتاعها مكسر و سقفها مبهدل حتى مش موافق يصلحها .. مع أنه يقدر ، انا ضحية طمع و بخل أبويا عليا .. مع أنه ف الفترة اللي كنت برفض فيها كان بيعايرني ببنات اعمامي اللي مجوزين و عندهم أولاد .. على اساس اني أمري بايدي مش لازم اخد الأذن منه قبل م اشتغل أو أجور و الله لو كان ينفع كنت اتجوزت اللي بحبه حتى لو ف عشة صفيح . انا بس مش عايزة احس اني قليلة قدام أهله .. كمان انا فعلا مش قليلة انا عندي حاجات بس ممنوع اتمتع بيها ..و عمري و الله م بصيت لرزق حد لا ف جواز و لا ف خلفة و لا ف إي حاجة بس انا نفسي افرح زي باقي البنات .. حتى الشاب ده كويس معايا و حنين و طيب و فيه كل اللي اتمنيته بس نفسي اتخطبله بس مش بايدي و كل المشاكل اللي بتحصل بيننا بسبب موضوع أبويا .. مش عايزة الراجل الوحيد اللي حبيته يحس اني مش عايزاه ف الحلال .. كمان بحس بالذنب عشان بتكلم و بنتقابل ف السر .. بس لو كان أبويا كريم معانا كان زمانه جه قابلني ف بيتي .. انا قبل م أعرفه كان واحد جه خطبني بس أهله استقلو بينا بسبب موضوع الفرش ده .. انا حتى لو فيه احتمال أقل من 1% أنه ده يحصل ف انا مش عايزة اجازف .. و بنفس الوقت مش عارفة اشرح لحبيبي ظروفي مش عايزاه ياخد عن أهلي فكرة وحشة .. الكلام صعب و السكوت أصعب ... ارجوكم ادعو لي و حاولو تساعدوني لانى خلاص فاض بيا .. مع العلم أنه مفيش اي إمكانية مادية عند والدتي اننا نجيب فرش تاني لأنها مديونة