نصيحتي لكل المتزوجين .. إليكم هذه النصائح

هي مش مشكلة لكن نصيحة لكل راجل قوم بدورك في الحياة ومترضاش بأقل منه ومتعتمدش على انها بتشيل عنك وبتعمل كدة وهي مبسوطة وراضية لأن كلها كام سنة ومش هتبقى راضية وهتبقى شايفاك مش راجل كفاية وسبب من أسباب تعبها في الدنيا.. حتى لو هي بتشتغل مينفعش تدفع زيك أو اكتر منك، مينفعش هي اللي تفضل توصل الولاد مشاويرهم ودروسهم وتدريبهم وتودي وتجيب كأن مالهومش أب، مينفعش هي لوحدها اللي تروح اجتماعات أولياء الأمور في المدرسة وتوديهم للدكتور وتشتريلهم احتياجاتهم ومينفعش الولاد يحسوا بكل دة. الدنيا ليها نظام لو اختل محدش فيكم هيكون سعيد. الست ليها مسئوليات مهمة. شئنا أم أبينا توازن البيت و لم شمل الأسرة واحتواء الولاد دة مسئوليته على الأم بشكل أكبر بما فضلها به ربنا من سمات شخصية وبال أطول والمفروض عندها وقت أكتر. ولو البيت فاضي مفيش فيه لا أب ولا أم يبقى هنعمل فلوس لكن غالبا هنربي رجالة مش فاهمين المسئولية وبنات ميصلحوش أمهات ولا مربيات لولادهم وتدور الدايرة كدة للستات مش بقول متشتغليش اشتغلي بالمعقول واصرفي بالمعقول وافتكري شروط القوامة اللي ربنا حطها مش من فراغ والله لو اختلت هتتعبوا انتوا الاتنين. اشتغلي بالقدر اللي يسمحلك تهتمي بأكل البيت اللي يضمن صحة ولادك مش يبقى كل أكلهم فاست فود، بالقدر اللي يسمحلك تتابعي دراستهم وتبقي ليكي دور فعال في بناء شخصيتهم، بالقدر اللي يخليكي عندك وقت تسمعي ولادك وتكلميهم، بالقدر اللي يخلي بناتك يبقوا عايزين يطلعوا زي ماما، مش شايفين ماما متقطعة بين ١٠٠ حاجة ومش عارفة تنجح تماما في أي حاجة منهم. وأخيرا عشان محدش يقول اني ضد حقوق المرأة والكلام المحفوظ دة، أحب اقولكم أنا ست في مكانة عملية واجتماعية مرموقة جدا بس الوصول لدة وانا راجل وست مع بعض مأسعدنيش ولا خلاني أنا وزوجي قدوة كويسة لولادنا. أكيد من حقوق المرأة كمان انها ترتاح وتبقى عبئها في الحياة عبء داخل نطاق احتمالها. مفيش ست خارقة لدرجة انها تبقى في قمة النجاح في حياتها العملية وأم ومربية ممتازة تهتم بولادها ودراستهم ونفسيتهم وتربيتهم وتنشئتهم الصحيحة و في نفس الوقت مهتمة بتفاصيل بيتها وصحة أسرتها وأكلهم الصحي اللي المفروض يبني جسمهم صح وبرضه كمان مهتمة بجمالها وانوثتها ومظهرها. كدة تحميل عليها فوق طاقتها واللي بتحاول تعمل كل دة بيجيلها وقت تنهار فجأة لكل زوجين: كل واحد ياخد دوره ونبهوا بعض واستحملوا دة عشان متندموش بعد كدة أرجو النشر للإفادة