خيانة زوجي مع زوجة أخي دمرتني فماذا أفعل

خيانة زوجي مع زوجة أخي دمرتني فماذا افعل؟ وجى عاوز يجننى، فى البدايه، عندى 36 سنه، جوزى 50 سنه، مخطوبه وانا عندى 13 سنه ونص، واتجوزت 17 سنه، أنا طالعه من اسره كلها مشاكل، ما صدقت لقيت جوزى حسسنى بالاهتمام والحنان والحب، اتعلقت بيه جدا جدا، أول يوم جواز مكنتش مصدقة أن إحنا مع بعض، كونت بحبه بجنون، بس بعد شوية بدأت المشاكل، زى أى اتنين متجوزين، كنت بعدى، وهو عنده قدرة على السيطرة عليه، اى حاجه يقولها اصدق

بعد كده اكتشفت إنى كنت مخدوعة فيه، له علاقات نسائية، أى واحدة تكلمه بدلع، يطب على بوز، والمصيبة إن كل ده قدامى، ولو اتكلمت يعرف يثبتنى كويس أوى، مرة دول إخواتى، مرة أنا مش  شايف حد غيرك، لحد المصيبة الأكبر، وهى إنه على علاقة مع مرات أخويا، والعلاقة خدت سنين، وأنا عطيته الامان، لحد ما عرفت، حلف أن ده شطان، وإن هو غلطان، ومش هيعمل حاجه تزعلنى تانى، عشان ولادنا، وأنا بعد فترة من العذاب والتعب النفسي، عشت عشان أولادى، والفضائح اللي هتحصل ليا أنا واخويا، فقررت مقولش لحد، بس من جوايا مش قادرة أنسى أو أسامح، عشت، بس عشت ميته، ومضطرة أتعامل مع زوجة أخى عادى، ربنا وحده كان عالم بيا وأنا بتعامل معاها، معدتش بخلى جوزى يروح عند أخويا، والمعاملة بيني وبين مرأة أخويا على قد الطلب، وقنعنى أن معدش فى أى حاجة

وبعدين، فى يوم، كنا مع بعض فى لقاء حميمى مع بعض، وندانى باسمها، برر طبعا زى كل مرة، وكان المبرر إنه كان عايزنى أغير، بس أنا مقتنعتش، بس سكت، وأنا بموت، وخسيت جدًا، وعدتها لغاية ما جاب موبايل جديد، فيه خاصية التسجيل، وبعد اسبوع، اكتشفت مكالمات بينه وبين مرات أخويا تانى، بس المرادى سمعت بنفسى، وهو أد ايه هيتهبل علشانها، وإنه مشتاق إن المرة الجاية تكون عريانة، وكلام مش هينفع اكتبه، وحصل خناقه بينى وبينه، وسكت زي كل مره، بس سكوتى المرادى عشان ابنى كان فى إمتحان آخر السنة، ومن بعد مش عارفة أعيش

انا عارفه أن فى ناس هتسأل، ليه مطلبتش الطلاق، لأن انا معنديش مكان تانى أروحه، معنديش بيت أب، والمشكله إنه مخلاش ليه حد أروح له، بعدنى عن الناس، ولا ليّه صحاب، ولا جيران، ممكن مطلعش من البيت بالشهور، وصلنى للإنهيار، ومعدتش قادرة أعيش، بيحلف طبعًا زاى كل مرة إنه بيحبنى، والحبة بتوع كل مره، أنا تعبت، معدتش بصدقه، حد يريح قلبى، وبلاش لوم عليه، محدش عارف ظروفي