أعاني من آثار صدمة خيانة صديقتي ولا أستطيع استعادة طاقتي

السلام عليكم، أعاني من آثار صدمة خيانة صديقتي ولا أستطيع استعادة طاقتي، مشكلتي أني أعاني من آثار ما بعد الصدمة، والموضوع صار له سنة، أنا فتاة ملتزمة والحمد لله، كنت معجبة من بعيد بشاب خلوق ومتدين بالجامعة، بس بغير كليتي، وكان في صديقة لي، هي كانت تقرب له وبنفس الوقت مخطوبة، كانت تعطيني تلميحات أنه ممكن تجمعنا سوا عن طريق خطبة، وأنا ما كنت أوضح لها أني أمانع الموضوع، بس بنفس الوقت ما صرحت بإعجابي ولا بشيء أمامها، بس هي شكلها انتبهت من حالها

استمر الموضوع سنة، وفجأة بسمعها بالصدفة تحكي مع خطيبها عني بطريقة سيئة، وأنه أنا معجبة بذاك الشب ورح يعملوا أي شيء ليبعدوني عنه وما يجمعونا، أنا قلبي انكسر والثقة اللي كانت بيننا اختفت، ولما واجهتها بالأمر أنكرت وقلبت عليّ الطاولة

وأنا كنت أقول بنفسي إني ارتحت لها لدرجة كانت بمثابة أخت إلي، وأنه إذا خانت ثقتي بيوم ما رح أقدر أوثق بحدا مرة تانية، وطلعت من الغرفة المشتركة، وكنت بسنتي الثالثة بالجامعة، وضغطت على حالي كتير مشان أرفع كل موادي، والحمد لله فعلتها

بس أنا الآن مو متل أنا قبل، أنا وقتها ما بكيت وحطيت بقلبي وفكرت أن الموضوع انتهى هيك، بس أنا عم أشوف النتائج الآن على نفسيتي وجسمي، عندي سنة تخرج وعندي كتير التزامات، وأنا من جوا بدي أشتغل وأنجز، بس مو قادرة، دائمًا فيني شعور أنني مريضة (فحصت وما فيني شي)، أو مقيدة، أو ما عندي طاقة، يعني شعور لا يوصف

وأحس حالي خففت من العبادات وقت كنت أدعي بذاك الشخص، وهذا الشيء عم يحسسني أني أنا تقربت من الله بسبب شيء دنيوي، الحمد لله لسه ملتزمة، بس مو متل ذاك الوقت

والآن عم أعاني من حالة الخمول الدائم وتعذيب الضمير، يمكن أنني تخطيت الموضوع هذاك، بس ما عم أقدر أرجع نفسي، بتمنى تساعدوني وتعطوني طرق أو أي شيء أستفيد منه، وهل تنصحوني أروح إلى معالج نفسي أو أي شيء من هذا؟