أريد أن أقطع علاقتي بصديقي بسبب كذبها المستمر علي

مشكلتي مع صديقتي بعرفها من ايام الدراسة.... وانقطعت صحبتنا بسبب الكذب... كانت تكذب عليي وقطعت علاقتي معها.... بعد 10سنين رجعنا التقينا بالعمل للصدفة توظفت بشركة وهي محاسبة فيها.... رجعنا نحكي وصرنا صاحبات... تجاوزت مشاكلنا بالمدرسة وحسيتها متغيرة و10 سنين احنا كبرنا واعتبرت كذبها زمان ولدنة.... صارت صديقة مقربة جدا الي.... من فترة رن عليي رقم غريب وتكررت رناتو.... حكيتلها عنو وانو بفتح وما حدا برد عليي.... كنا سوا بالدوام ورن الرقم اخدت تلفوني ووجهها كتير تغير بس شافت الرقم.... فتحت الخط وحسيت انو حدا حكا بس سمع صوتها توترت وعملت حالها بتبهدل اللي عالخط وانو ما بتستحو ومن هالحكي.... بصراحة قلبي ما اطمن... شكيت انو اخوها بس قلت ان بعض الظن اثم.... بعد كم يوم بتقلي انو اخوها في بنت بترنلو وشاكك انو انا وصوتها نفس صوتي... طريقة حكيها ما عجبتني هي بتحكي ع انو مزح او موضوع بيضحك بس زي اللي في اشي.... قلتلها طبعا مو انا واخدت الموضوع ك مزح ومرقتها.... اخوها بيضل يمزح معي احيانا وانا بختصرو وبجاملو لانو اخوها.... اجواؤه مو منيحة وبضل يحكي مع بنات... وهو اصغر مني ...... رجعت فتحت موضوعو وانو بدو يتاكد انو مو انا وانو انا بعمل مقلب فيه.... واخد التلفون منها وحكا معي يسالني وانا عصبت.... حسيت انو بدها تتهمني بيلي هو عم يحاول يعملو معي.... عصبت عليه وهي رجعت حكت معي قلتلها اخر مرة اخوكي بيحكي معي وانو انا بحكي معك انتي ليه هو يحكي وليه بتفتحي سبيكر.... اعتذرت وانو ما تزعلي.... انا مو طايقة احكي معها وبعد هالقصة متاكدة انو اخوها اللي برن وهي عارفة وزي اللي بدها تتمسخر عليي هي واياه... بعد 9 سنين لسة بتكزب وعم تحاول تعمل معي شي مو منيح.... قبل قصة التلفون كانت عازميتني عندها بوقت جوزها بالدوام بتكون هي والاطفال بس بالبيت.... بس انا بعرف انو اخوها بكون بالبيت[ هو ساكن عندها هادي الفترة ].... سالتها انتي لحالك حكتلي اه بس انا والاطفال.... صار معي شغلة وما قدرت اروح واعتذرتلها..... بعد كم يوم بنحكي بموضوع جابت سيرة انو هو يومها كان معطل وبالبيت.... ليه خبت انو بالبيت واصلا عزومتها مفاجئة بدون تخطيط رنت الصبح وعزمتني.... قلبي من يومها مو مرتاحلها وبعدين قصة التلفون..... انا قررت اقطع علاقتي فيها.... شو بتنصحوني اقطع فجأة واختصرها بدون ما اكبر الموضوع.... وللا اثبت انو اخوها اللي برن وعم يخطرلي اسجلو مكالمةعالرقم اللي برن منو بس عشان اثبتلها انو هي اللي غلطانة.... لانو هي بتقلي ليه متغيرة عليي وانو انا عم اكبر قصة مزحة التلفون واني حساسة وظالمتها... كتير زعلانة ومو قادرة اسامحها وقلبي نافر منها بدي اقطع علاقتي تماما معها باسرع وقت وبنفس الوقت بدي اياها تعرف انو انا مو غبية وفاهمة عمايلهم مو لاني ملتزمة ومو زيهم تستغبيني .... اسفة عالاطالة