ماتت بهدوء وتركتنا في العذاب للأبد

ماتت في هدوء وتركتنا في العذاب للأبد أنا من متابعين لصفحة حلوها وبتفاعل معاكم كتير على المشاكل والأسئلة عايزة أحكي معاكم على حاجة حصلت النهارده وأثرت فيا جدا وأعتقد انها هاتأثر فيكم ويارب تدينا كلنا درس قوي القصة مالهاش علاقة بيا لكن ليها علاقة بصديقتي واللي ممكن جزء منكو يكون عرف القصة من على السوشيال ميديا النهارده / اتعرفت عليها في مكان الشغل كانت أطيب إنسانة خلقها ربنا، روحها حلوة وهادية بشكل مبالغ فيه وبتساعد الناس كلها لما تشوفها تبقى عايز تضحك لوحدك وتحس إن الدنيا لسه بخير فعلا ولسه فيها ناس طيبة من الناس اللي تقول عليها صاحبة الكل بتكلم الناس وتسأل على كل اللي غايب موجودة وبتبارك في كل الأفراح وبتواسي في كل الأحزان فاكرة مرة والدة زميلتنا اتوفى خدت إجازة من الشغل أقامت معها في البيت أسبوع وفي فرحي أنا شخصيا فضلت موجودة من بداية اليوم رغم أنها ما كانتش قريبة مني أنا بحاول أوصف لكم قد إيه كانت رائعة وودودة مع الكل ورغم ذلك ما كان ليها صديق أو صديقة يقرب منها انقطعت عن الشغل فجأة وكلمناها قالت انها مريضة وأخذت أجازة في شهر 11الماضي وكنا بنتكلم من وقت للتاني وطبعا مع الانشغال المكالمات قلت وكله انشغل لغاية ما اتفاجئنا كلنا النهارده بأنها اتوفت طبعا صعقنا وزعلنا وكتبنا بوستات حزينة مع صورها ودعينالها بالرحمة لغاية ما جت الصدمة الاكبر أنها ماتت من شهرين!!!!!! عارفين يعني ايه تموت ومحدش يعرف غير بعد شهرين بعد ما كانت بتقدملنا كل الخير والعطاء ده ماتت في هدوء شبه روحها محدش فينا فكر فيها اكتر من دقيقة يتصل ولو ماردتش خلاص أو يبعت رسالة ومايستناش رد وما يسألش هي ما ردتش ليه وكأنه أداء واجب عارفين احنا كنا بنبص لبعض ازاي النهارده وكأن كل واحد فينا مسئول عن موتها عارفين كل واحد فينا هايروح بيته وهايبقى حاسس بايه النهارده حاسس بالندالة والعجز وقلة الحيلة والندم هايغمض عينه تظهرلنا صورتها بنقائها تقولنا ازاي سيبتوني أموت كده وازاي ماخطرتش على بال حد فيكو وازاي محدش يودعني وازاي سيتو اهلي لوحدهم من غير حتى ماتوسوهم وتقولولهم انا كنت ملاك ازاي وبساعدكوا ازاي بس هايفيد بايه كل ندمنا وكل تبرراتنا لنفسنا بان الدنيا بتسرقنا والشغل بيلهينا انا النهارده سألت على كل صحابي وزمايلي وهافضل اسأل عليهم ماتخلوش الشغل والحياة تدوس علينا أكتر من كده حسسوا الناس قد ايه هم مهمين عندهم اسألوا على صحابكم ومايلكم وزوروا قرايبكم وقابلو كل اللي تعرفوهم يمكن ساعتها نحس اننا بشر ولما يحصلنا حاجة نلاقي اللي يكونوا معانا