زوجتي فقدت مشاعرها تجاهي فماذا أفعل؟

السلام عليكم، زوجتي فقدت مشاعرها تجاهي فماذا أفعل؟ أنا إنسان ملتزم ومحترم وبخاف الله، وما بعمل علاقات حرام، شو الحل مع الزوجة التي لا تعطي زوجها حقه من المشاعر والحنان؟ يعني مثلًا: حضن، بوسة، بس يطلع، بس يدخل، بس ينام، كلام حلو، حب، مثل "بحبك يا قلبي"، ولا إشي عندها، وهي أصلًا ما بتحكيلي من أول ما تزوجنا، والإشي تطوّر مع الوقت ومع المشاكل ومع إنجاب الطفل

مشكلتها حساسة وما بتنسى إشي، حكيتلها مرة: "احكيلي عشان أنا أحكيلِك كلام حلو"، ما ردت، وقالتلي إنها ما بتحب، وتطور الإشي لقدام، علمًا أننا متزوجين من 5 سنوات وعندنا طفل، طلبت منها الاهتمام لحد ما زهقت، وهي بتحكيلي: "مش قادرة، لأنك زمان كنت تهملني بالمشاعر وما كنت تلبيلي طلباتي، فـأنا ما بكرهك، بس بطلت أحبّك زي زمان، وبطلت أحس تجاهك"، وصارت أي إشي أطلبه منها تتحول عكسه، وبتحكيلي إنها مضغوطة نفسيًا، مع إنها مش مضغوطة

يعني إذا قلتلها: "زبطي لبسك، عملي هيك، لا تحطي مكياج"، يعني شغلات بسيطة، بس لأنها حساسة بتفكرني متحكم فيها، وبتحكيلي: "ارجع زي زمان، أيام الخطوبة، يمكن أرجع زي قبل"

مع العلم إن أغلب المشاكل كانت منها هي مش مني، ما بنكر إني قصرت معها عاطفيًا، بس مش دايمًا، لأنها كانت تعمل مشاكل معي، ومع هيك أنا محترم معها ومخلص، وما عمري مديت إيدي عليها، وبجيب لها كل فترة هدايا، وبحكيلها إني بحبها، وبحكيلها إني تغيرت وصرت أحسن من زمان، وبعتذر عن غلطاتي، فبتحكيلي: "بعد أيش؟ بعد ما أرهقتني وتعبتني نفسيًا؟"

طبعًا الحق عليها لأنها ما كانت تحكيلي، أنا شو بعرفني إنها هيك؟ هي كتومة، بتعطيني حقي الشرعي، لكن مشاعر ما فيه، لا أحضان ولا بوسات، وبتحكيلي: "مش قادرة أعطيك إشي"، حكيتلها: "طيب اضحكي علي، مثلي، اعملي أي إشي"، بتحكيلي: "ما بعرف أمثل أو أكذب"

شو الحل معها؟ شو أسوي؟ ما بدي أطلقها، عندي منها طفل ولسه بحبها، يعني ممكن أتزوج زوجة ثانية، بس هي رافضة، شو الحل؟ والله تعبت معها، راح أجن، معقول كل النسوان هيك؟ وشكرًا إلكم