مللت من نكد زوجتي وزعلها على كل شيء أقوم به

add_commentأضف إجابتك

thumb_downلم يعجبني0

سلام عليكم ورحمة الله وبركاته .. الحمدلله الذي انعم علينا من فضله . اود ان اطرح مشكلتي بين اياديكم وارجوا من الله ثم من سعادتكم ان تجدون حل لي والله لا اتيت هنا وإلا انا في ضيق الحال انا شاب عمري ٣٥ سنه متعلم ولله الحمد ومن عائله مرموقه .. تقدمت لفتاة من ناس والله طيبين واخلاق من ناحية الأم والأب .. من ناحية الأم . والله احيان استحي منها يوم تقولي انت والله واللي يحفظ عيالي والنعم فيك اعرفك واعرف اهلك وعمتك اختي قبل صديقتي .. وهذا نعمه من الله زوجتي عمرها ٢١ سنه الله يحفظها لي ولا يحرمني وجودها .. أخلاق متربيه تخدمني .. ارتاح نفسياً والله اذا انا انا بنفسي أهديها اي شي . كل يوم اصبح عليها واحتضنها ونطلع ونبسط .. رغم والله اني كنت ادلعها واساعدها بكل صغيره وكبيرة وما أخبئ عليها شي . ومصارحين مع بعض بكل شي . الحمدلله ياربي لك الحمد .. احبها وأعشقها وهي كذلك والله تحبني وتغار علي من كل شي صار لنا سنيتين متزوجين .. يعني عشان أكون صريح معاكم . في شويه مشاكل بس والله مو مدح في نفسي احلها في دقيقه وحده وكل شي يرجع زي الحلاوة .. للمعلومية انا موظف جهة حكومية . وراتبي الحمدلله لا باس به وساكن بيت ملك مع الأهل فيلا وانا لي شقة رزقني الله بمولود الله يحفظه يارب .. والله يا اخواني اني أساعدها في البيت والطبخ والغسيل رغم اني اجي من العمل تعبان .. ما ابين لها صحيح تسألني كيف العمل ايش سويت .. أقول ولا شي افكر فيك تفرح على طول .. المهم . حتى الله يكرمكم انظف ولدي . واروشه واسوي له حليب .. لدرجة انه أهلها وخاصة امها تمدحني وتحبني . وتعرف اني اساعد زوجتي بكل شي هي صارحتني وقالت لامها والله زوجي ماهو مقصر معي في شي .. لدرجة امها تقولها يبنت استحي على وجهك . انتي ست البيت حسسيه انك مسؤوله على بيتك وزوجك وولدك خلي زوجك يرتاح.. تقولها طيب انا أقوله ارتاح وانا بسوي هوا يشوفني اسوي شي يقوم يساعدني.. وانا من محبتي لها مو عيب اني أساعدها والله بالرغم اني ماني مقصر فيها مصروف وأعطيها وان نقص عليها شي ازود من عندي مطبخي اجيب كل شي ناقص يوم كذا جيت من العمل وجلسنا بصلاه على النبي وقالت ايش رأيك نغير بعض العفش .. ونسوي باركيه رغم انه العفش والله نظيف والبيت سراميك قلت أبشري بس اللحين ما اقدر انتي عارفه انه عندي بنك والتزامات وبنك التسليف وانتي عارفه انه سيارتي ما راح تستمر معاية لانه كل ما اصلح فيها شي يخرب شي اللين غيرت مكينة قلت بعدين اطلع سياره اخلص التزاماتي واطلع المهم قالت طيب بس نشيل العفش ونستنى عادي شوي شوي نغير . قلت لا وكيف نجلس قالت نخلي الكنبه اللي بالصاله . قلت يروحي انا احب اشوف بيني كامل فيه كل شي وما احب اشوف شي ناقص ارتاح نفسياً وتبخري ذاك البخور اذا تحبيني اصبري عليا ومالك الا احلا عفش وباركيه كم وحده عندي غيرك ومن الكلام .. قالت طيب وعادي ومشي اليوم الأول . اليوم الثاني جالسين ونسولف واشوفها مركزة على شي . قلت وش فيك سرحانه قالت لا لا بصراحه بشيل العفش ماني مرتاحة قلت ليش منتي مرتاحة معاية قالت الا مو عليك قصدي . على العفش قلت برضوا فتحنا الموضوع ثاني مو وعدتك وقلت لك أبشري مو تحبيني وتبغي تعيشي معاية قلتي لو صندقه . وين الكلام هذا سكتت ومشيت الأمور على ما يرام .. أسبوع أسبوعين واشوفها والله صارت تقلل تنظيف البيت يجلس ٥ أيام أسبوع عادي . ما فتحت الموضوع ولا شي قلت أجيبها بطريقة ثانيه . نزلت عند الوالدة الله يطول عمرها لنا يارب .. سلمت عليها جلست شويه معاها وطلعت اول ما فتحت باب الشقة ناديتها باسمها ي فلانه ي روحي ي عمري قالت ها نعم قلت اوووه هذا شي جديد من متى بيننا نعم فين هلا عيوني .. عيونها . قالت ذحين ليش نا ديتني ايش تبغى قلت ابد سلامتك بس ايش النبره هاذي ايش فيك تكلميني كذا .. قالت ولا شي مافيني شي قلت متاكدة قالت ايوه . قلت طيب وخليتها عادي لاني عارف ماسويت شي لها وواثق ثقه انه عشان العفش . قلت ياولد بسيطه أقوم اكنس وهي بتجي والله واكنس المدخل وهي ولا اي حركة . قلت اكمل وخلي اليوم يمر على خير . هذا الكلام الخميس .. الجمعة طلعنا تغذينا ورحنا البحر ابغى أغير نفسيتها قلت امكن تسولف معي أسولف ابغى احد يتكلم معي . وهي ساكته أكلمها ترد كلمة وتسكت . فتحت مواضيع أيام الملكة قلت الله مع ابتسامه تفتكري يوم كذا ايش سوينا قالت ايه وبس رغم اليوم ذا ماتت ضحك منه .. قلت بالله اللحين حلو الوضع هذا قالت ايه قلت اني اكلمك ولا تسولفي معاية وأدري انك زعلانه عشان العفش قالت كويس انك عارف . قلت لها طيب وانا ماقلت لا اروح اتسلف عشان أغير عفش واسرمك عشان ترضي وهنا صدمتني والله .. قالت ايوه اتسلف مو كنت تراضيني .. قلت والله اذا انتي ترضي عليا اني اتسلف عشان اراضيك وفعلاً والله خلتني أشيل الأشياء بعد الزن والزعل الكثير وانا بصراحة والله ما احب النكد ..اقسم بالله انه بيتني الان فاضي غير وجود كنبه وغرفة النوم ومطبخ وخليت الوضع كذا ٤ شهور اللين ركبت باركيه بيتي صار فاضي من العفش .. صارت طلباتها كثيرة وأن قلت لها لا على طول تبكي وتزعل والله نكد زوجتي عليا اللين اكره نفسي وعلى هذا الموال . تتعدل وترجع افهمها وترجع زن زن زن اللين تخليني أروح اتسلف اخر مره شفت الموضوع زاد وديتها بيت أهلها وعلمت امها والمسكينة عندها السكر الله يشفيها وهي تنصحها بكل شي والله ماتبغى بنتها تخرب بيتها المهم ي اخوان ادري طولت عليكم بس والله اني متضايق وكلهم قالوا انت السبب حتى امها قالت انت دلعتها الأمور كل مالها جالسه تتزايد والنكد والزعل الكثير الكثير على اي شي تزعل صارت تعايرني على وضعي والله صرت أكره اجلس في البيت حتى الخرجة مع أصدقائي صارت قليلة مرره .. أوصف لكم ايه وأخلي ايه وصل الموضوع والله اني في معاناه.. قلت طيب ايش اسوي معاها جلست معاها فهمتها علمتها احاديث الرسول اخرجها والله اني ابغى أكون مبسوط معاها لا اكثر ولا اقل ابغى استقر في حياتي اسوي قدر المستطاع عشان احتفظ بيتي . الموضوع ما تبغاني اقولها لا في اي شي ان دلعتها زادت وان ارضيتها زادت وان رفعت صوتي عليها تبكي وتقلب وجهها علي بأيام .. حرمتها هجرتها طنشتها رفعت صوتي عليها أكلمها بأدب تهز رأسها لي .. وانا مافي اي فايدة اجلس أتفاهم معاها تقولي طيب ثاني يوم تقلب . وترجع .. وترجع تقلب .. اخر مره علمت ابوها بالوضع . طبعاً ما عجبه الوضع هذا .فهمته كل شي قلي مالك الا يرضيك . خلها عندي وأجيبها لك وفعلا طلعت غلطانه وماني مقصر في شي معاها رجعت والله مافي أسبوعين . ورجعت حليمة مثل ماهي صارت ما تسمع كلامي والله على طول لو طلبت منها تسوي لي شي . تقول طيب وتجلس نص ساعة بعدين تقوم . أكلمها في شي بعد ايش ترد عليا . اجلس اتفرج تقوم تجلس في غرفة النوم ما تجلس معايا مثل اول .. وانا والله من كثر ما ابغى أتنكد عشان أشياء تافهه صرت اطلع قلت امكن تتغير . اجي أقول تبين شي انا طالع عند خيلاني بتنزيلي عند اهلك . تقولي لا والله نص الطريق ترجع تقولي تعال وديني . وانا اسكت وأقول . طيب مافي ساعتين وإلا هي تدق تبغى تروح البيت .. اقولها اجلسي شويه مع اهلك وانبسطي تقول ما ابغى فيها نوم وانت والله مستحي من خيلاني كل مره نفس الشئ نتفق على شي أقوم انا وأروح بسبب زوجتي . واجي اوديها البيت والله حتى صارت نفسي خلاص متضايق من حركاتها اي مكان اروحه أغير عن نفسي شويه تجلس تدق تدق تبغى تنكد علي باي طريقة ..انزل عند اهلي تفتح الباب وتنادي . وانا معلمها من اول باب الشقة لا تنفتح تقول طيب وترجع نفس الشئ وانا بصراحه استحي على وجهي .. ما ابغى اكلم ابوها امها والله اني استحي . ايش راح يقولوا واقولها هذا الشئ .. والله تقولي بكل برووود عادي وانا والله مالي غير الصبر الصبر الصبر اللين متى راح اصبر .. شفت الموضوع زاد .. وديتها بيت أهلها خليتها أسبوع كامل مطنشها ولا اتصل ولا شي .. امها كلمتني ايش الموضوع يولدي قلت والله كل اللي بقلبي . وانا ما ودي اقولها والله أجبرتني اني أقول لامها يا انها تبطل الدلع اللي فيها وشغل التنكيد والزن وإلا ماتلوم الا نفسها وامها عارفه بنتها انها زنااانه تطلع قرونك انا قلت راح تتغير مع الولد راح تتغير .. ومافي فايدة . المهم رجعتها .. بعد الاتفاق انه لا تضغط علي وكلهم عارفين انه عندي ظروف .. امها قالت والله لو معاك صندقه بنتي مستوره مع إنسان طيب مثلك ورجال ويخاف الله . ماهمني والله في اي شي ثاني .. كذا اوك اتفقنا كذا .. بعد ٣ أسابيع من الرجعة والله ي اخوان مثل ما اقولكم اتصلت علي الوالدة قالت الله يرضى عليك روح اشتري لعيال اخوك اكل . اخوك في العمل و عيال اخويه مقابل شقتي واشتري لهم اكل ورجعت البيت والله سوت مشكلة عشان رحت اشتريت لهم . قلت ليش ايش السبب فهمت منها عشان لا اظلمها . طلعت تكره زوجة اخويه ايش السبب . قالت كذا ما اطيقها قلت طيب عيال اخويه ايش ذنبهم قالت زي امهم طيب .. فهميني ايش سوت لك عشان اعرف .. تخيلوا تقولي ليش تكشف عليك .. والله ي اخوان عندنا البيت كشف مافي . يوم ننزل الجمعة عند الوالدة كل وحده لابسه شرشف صلاه ومره وحده اكلنا مع بعض نخلص ونطلع وعيال اخويه أطفال أساساً أطفال . شفت كلامها ماهو مقنع ولا يوجد سبب مقنع مانفذت طلبها .. وهذا الشي اللي خلاني أتأكد وديت عيال اخويه وولدي البقاله اشتري لهم والله سوت مشاكل وصياح ورفضت انه عيال اخويه يدخلوا بيتي تقول ما بغاهم .. قلت لا ما ترضي على زوجك انه يصير بينه وبين اخوه حساسيه اتصلت على ابوها قالت يا انا يا هما .. طيب ايش الموضوع علميني ليش قالت حره . وانا لو قلت في نفسي لو اخويه سمع شي بالله ايش موقفي وهوا يحب ولدي اتصلت على ابوها وفهمته بكل شي .. والله زعل زعل وكان بغى يدعسها قدامي . بس مسكته قلت له مو الضرب كل شي .. استحي على وجهك فشلتيني مع الناس ذولي عيال اخوه ..تبغي تسوي فتنه قالت ايوا ما يدخلوا ي انا يا هوا .. والله وراحت بيت أهلها بأذني طبعاً والليحن لها ٤ أيام وانا مطنشها واعتذرت من امها ابوها .. اني ماراح اجي وقبل اعتذاري وقلي والله مالك الا يرضيك .. رحت اليوم والله عشان نحل الموضوع .. طلعت زوجتي شاكه فيني انه بيني وبين زوجة اخويه شي .. هل هذا يكفيكم يا أهل المنتدى ولا أزيدكم .. يوم سمع ابوها كذا يا صفقها كف ريح خاطري ولا والله كنت بطلقها وبطلع بس مسكت نفسي عشان ولدي قلت هنا وبس وطلعت من البيت .. لحقني برا البيت معليش يولدي والله اني منحرج لسا صغيرة قلت صغيرة عقل بس لسانها اكبر منها قلي مالك الا اربيها لك .. والأن انا بين نارين .. للعملومية اهلي محد عارف فيهم هذا الشي .. ومابغيت الموضوع يكبر وتصير مشكلة بيني وبين اخويه .. والحين انا مطنشها .. ماني عارف ايش اسوي والله متضايق ومحتار. واني ما أنام .. ما ابغى اخرب بيتي عشان جاهله .. ايش رأيكم احد عنده نصح ينصحني

add_commentأضف إجابتك

thumb_down لم يعجبني 0

إجابات السؤال

صورة علم United States
أضف إجابتك على السؤال هنا
  • أخصائية علم النفس والتثقيف الصحي ميساء النحلاوي
    أخصائية علم النفس والتثقيف الصحي ميساء النحلاوي verified_userشكرا لك سيدي على ثقتك بموقع حلوها . يبدو أنك رجل على خلق كريم ، تحب زوجتك وتريد إرضائها ولا تبحث إلا عن حياه زوجيه مستقرة ، ولكن زوجتك تستغلك مع الأسف وتختلق النكد والمشاكل وتزيد من طلباتها لأنها تعلم تماما أنك ستستسلم . يجب أن تقسو عليها ولا تهتم لتصرفاتها ، والقسوة هنا لا تعني الضرب والتعنيف أبدا ولكن اتخاذ موقف حازم منها وعدم الاستجابة لطلباتها التي لا تناسبك ما دمت غير موافق عليها وليست ضمن إمكانياتك فالاستدانة لتلبيه طلباتها أمر مرفوض تماما . لا يحق لها تدمير علاقتك بأخيك واتهامك إتهام باطل بزوجه أخيك لتحرم أطفالهم من دخول بيتك. لماذا تستجيب لها عندما تغير رأيها وتفرض عليك العودة لإحضارها من بيت أهلها ، فتخجل من أقاربك في كل مره تخرج فيها معهم . لا بد لها أن تدرك أن هروبك من البيت وخروجك هو بسبب تصرفاتها السلبية والنكد الذي تعيشك إياه ، هددها بالطلاق حتى تتخيل نتيجة تصرفاتها وكيف قلبت طيبتك وحبك لها إلى حزن دائم ونفور منها ، لعلها تدرك قيمه رجل مثلك .
  • صورة علم Kuwait
    صورة علم Kuwait
    مجهول

    يعني بالعربي راكبه فوقك وانت السبب طبعا ليش تتزوج وحده ازغر منك بكتير وتعمل كل الي بدها اياه برغم ظروفك هاي مش بنت عيشه و مكيوده ورح اتضل طول عمرك انت راكض تراضي فيها يا اما اهلها بربوها يا اما ما بتلزمك

  • صورة علم Saudi Arabia
    صورة علم Saudi Arabia
    مجهول

    زوجتك متيقنة من حبك وطيبتك واعتبرتك امر مسلم للأسف، لا أعتقد انها تاخذ تهديداتك بعين الاعتبار اعتقد المشكلة الحقيقة هي أن زوجتك تشعر بالمملل والفراغ والروتين الذي يجعلها تختلق المشاكل انا لا أعتقد أن المشكلة هي عفش جديد أو عيال اخيك هي فقط غير قادرة على التعبير عن ما تريده حقيقة لأنها هي نفسها لا تعرف ماتريده وهي غير قادرة على معرفة قيمتك وكم انت زوج جيد و صالح بسبب صغر سنها وربما عدم وجود نماذج لزيجات سيئة حولها لتعرف كم هي محظوظة ماهو الحل، حسنا اعتقد اولا ان عليك عدم قبول شروطها التعسفية، عليك أن تكون حازم وتتعامل بجفاء لفترة قد تطول لاشهر وحتى عند عودتها للبيت لا تحاول الحصول على ودها كن قويا وان صالحت، فإن استقامت وطلبت رضاك وهدأت عاملها بالحسنى والطيب وناقشها واخبرها كم تحبها لكن للأسف هي كانت سبب لتغير مشاعرك وهي سبب قسوتك عليها، وبعد فترة من الوقت بعد المصالحة، حاول ان تجد لزوجتك شيء تحبه لعمله كأن تشجعها على الدراسة او اخذ دورات او القيام بانشطة اشياء تشغلها عن البحث والنظر في اشياء فارغة كالعفش وأبناء اخيك واختراع القصص والمشاكل حيث سيساعدها ذلك على تكوين صداقات نسائية ويساعدها على النضوج

  • صورة علم Saudi Arabia
    صورة علم Saudi Arabia
    مجهول

    يا اخي زوجتك متعبة صراحة انا متزوجة من سنه ونص وكنت عايشة بمستوى مادي احسن قبل الزواج لكن اقلمت نفسي لان زوجي انسان طيب وطموح ويحبني ويشتغل على نفسة زوجتك لازم تاقلم نفسها على حياتكم وانت لازم تشد عليها طالما انت تقدم لها كل الي عندك ومحترمها مش من حقها تطلب منك فوق طاقتك رائي اذا استمر الامر طلقها طلقة وحده عشان بس تحس فيك واذا هي مش حابه تخرب بيتها بتتادب معك لانها استضعفتك للاسف لازم تعرف قدرك

  • صورة علم Saudi Arabia
    صورة علم Saudi Arabia
    مجهول

    المستجدات التي صارت اليوم ...؟ تبغى ترجع بشروط الشرط الاول :- عدم دخول ابناء اخي لبييتي الشرط الثاني : معد تبيني اشتري لهم اي شي لو طلبت من الوالدة طبعاً قلت هذا الشي أنا رافضه رفض تام وانا عمهم وولي أمرهم طبعاً ي اخوان ابوهم دوامين صعبة يجي ويرجع بسبب ظروف العمل ومن واجبي اخدمهم هذا امر الله .. تخيوا بالله معي بكرا ابني يكبر وطردوه من البيت قلت خلاص خليك اللين عقلك يرجع وتشوفين ان الشي هذا غلط وعرفتي اني غلط بيتك موجود في اي وقت . وخرجت

  • صورة علم Saudi Arabia
    صورة علم Saudi Arabia
    مجهول

    اللهم ألف بين قلوبهم ، واصلح ذات بينهم ادعي ربك يسهلك أمرك زوجتك تحتاج حد ينصحها قريب منها وتعزها

  • صورة علم Saudi Arabia
    صورة علم Saudi Arabia
    مجهول

    تتربى بالتطنيش حتى لو شهر او شهرين او ٣ حتى . لا تسأل الا عن ابنك ولا يهمك هيا واح تفكر فيك وتعرف غلطها وترجعوا احسن من الاول . العلاقة يسير فيها فتور احيانا من الرجال او الامراة . وهذا الحل الوحيد

  • صورة علم Saudi Arabia
    صورة علم Saudi Arabia
    مجهول

    اما فيه شخص ثاني في حياتها او انها ما تحبك من الاساس .. والحياة بين الزوجين مبنية على الثقة والاحترام اذا غاب احدهما فلا يمكن ان تستمر الحياة بينكما والباب اللي يجيك منه الريح سده واستريح

  • صورة علم Germany
    صورة علم Germany
    مجهول

    طيب طنشها ولا تحاول أن تراضيها، خليها تزعل، لا تشتر أشياء ليست ضرورية إذا كان وضعك المادي لا يسمح بذلك ولا تأخذ قرض من أجل أشياء لا تلزمك ويمكنكما شرائها فيما بعد، أنت عودت زوجتك على هذا، جميل أن تساعد زوجتك وتكرمها وتحسن إليها ولكن ليس إلى هذه الدرجة، خير الأمور أوسطها

  • صورة علم
    صورة علم
    مجهول

    ان كنت لم تنجب بعد فلا داع لان تضغط نفسك بلا داع وانهي الامر فلا معنى لان تتمسك بها لانها ان اكملت بهذا الشكل واوجدت مشكله من اي شيئ فلن تتمكن من العيش معها ابدا مهما حدث فكن اكثر حكمه في التعمال مع الامر 

صورة علم United States
أضف إجابتك على السؤال هنا