هل يجوز طلب الطلاق بسبب سفر الزوج

هل يجوز طلب الطلاق بسبب سفر الزوج أحس انى ظلمت نفسى ظلم كبير وظلمت زوجي معي لما قبلت به هو أساسا كان بيسافر بس كنت لسه صغيرة وغير ناضجة وعلي ضغط من أهلى لأنى كنت الكبيرة عشان أوافق بالرغم من انه اتقدم مرتين قبل كدة واترفض وسبحان الله النصيب برضو بس لما جربت وعشت التجربة المؤلمة بسبب الغربة قولت يارتنى كنت أخدت واحد عارف مسؤولياته كويس تجاه أهله ومش بيتهرب ويسيبهم ويسافر كل فترة ويخلى الوحدة تنهش فيهم واتحمل مسؤلية راجل وست وانطفى

كل مرة يدينا وعد أنها آخر سنة ف الغربة وينزل بعد سنة شهر ويرجع يسافر تانى وخلاص ما بقتش أصدق وعوده وعملنا ليه زيارة ماستحملش مصاريف ٣ شهور ونزلنا بعد شهرين ونص بس لعله خير ولعل ربنا ليه حكمة فى اللى بيحصل وأنا مش شايفاه وكان ممكن لا قدر الله الأمور تكون أصعب من كدة والحمد لله على كل حال

بس نفسيا الموضوع مرهق جدا علي وصعب وحياتى متأخرة ومش عارفة اتقأقلم ولا أعيش بالوضع ده مش عشان أحمد بس غايب ولكن عشان الوحدة صعبة جدا عليا وبتأثر على نفسيتى وصعب انى أرجع أعيش مع مامتى وفنفس الوقت المسؤولية والضغط بيزيدوا عليا والأمور بتبقى أصعب كل ما بيزود في الغربة

دلوقتى أنا وبنتى عايشين فى شقة لوحدنا بعيد عن اهلى وأهله كمان وما فيش حد بيساعدنا وربنا يعلم انى كمان فاقدة الإحساس بالأمان ويكون خايفة طول الوقت وفكرت كتير قبل الحمل التانى في الطلاق بس اهلى رافضين الفكرة تماما وحرفيا هتمرمط أنا وبنتى ونتبهدل آخر بهدلة والجواز حتى لو على الورق فهو أرحم بكتير من الانفصال والبهدلة غير أن عندنا اللى بتطلق من الصبح بيدورولها على عريس تانى مش مهم كبير في السن أخلاقه زفت أو أيا كان وإلا الالسنة ما تبطلش تجيب في سيرتها ويطلعوا عليها كلام وحش وربنا يعافينا

الحل لكل الأزمة دى حاجة من الاتنين يا ياخدنا نعيش معاه برة وده مستحيل لسببين مرتبه ضعيف جدا ما يعرفش يعيشنا بيه وماليه أوراق رسمية يعملنا إقامة بيها غير فيه احتمالية اخسر شغلى ودراستى في مصر أو ينزل هو يستقر معانا وكل فترة بقوله كدة وآخر مرة قالى أنه خلاص نازل نهائى بإذن الله وهيستقر معانا  بس للأسف قال نفس الكلام كتير قبل كدة بعد مشاكل وخناقات والله أعلم هيعمل كدة فعلا ولا هيبقى زى المرات اللى قبلها

أنا فوضت امرى لربنا وما بقتش احط أمل كبير على وعوده وكلامه عشان ما تصدمش فيه زى كل مرة ممكن تقولى حلول تهدى اعصابى ونفسيتى لحد ما امورنا تتحسن بإذن الله عدى على زواجنا ٤ سنين