كيف اتعامل مع زوجي الذي لا يتوقف عن الخيانة

السلام عليكم ورحمة الله وبركاته انا عضوة جديدة هون بس من ايام كنت صغيرة وانا اي شيء يصعب علي ادور حل بهذا المكان كيف اتعامل مع زوجي الذي لا يتوقف عن الخيانة انا امرأة متزوجة من 3 سنين ونص عندي بنت عمرها سنة ونص انا حياتي ووضعي انا وزوجي كله مشاكل من لما تزوجنا مادي ومعنوي بالمختصر كنا عايشين رغم كل مشاكلنا واخدنا بعض عن حب وكتير بنحب بعض رغم كل شي مرينا فيه واصلاً ضلينا 4 سنين لحتى اهالينا وافقو عالزواج

حدثت لي صدمات كبيرة مع زوجي خلتني ما اشوفو سند الي بس ماراح اذكرها لانو مو هاد موضوعي موضوعي هو الخيانة اول صدمة بالخيانة كانت وانا والده الي 20 يوم بس صارت مشكلة كبيرة بيناتنا وما اعترف بالخيانة وبعدها انصلحت الامور مجبرين لانو كان مشاكل خارجية المفروض نسكت ونحلها ونضل عايشين وصابرين ع بعض ولسه البيبي مولود جديد

الصدمة التانية كانت لما شفت مسج من وحدة كاتبه له انت بحياتك ما حبيتني تعاملت مع الموضوع بهدوء وواجهته بالمسج اول شي انكر انو بيعرفها وبعدها على ما اعتقد كذب ما كان صادق معي وحكالي انو هي وحدة من قبل ما نتزوج بيعرفها وكل مدة بتبعتلو وتتحارشو وهو ما بتواصل معها عديت الموضوع للمرة التانية وسكتت

الصدمة الثالثة كانت لما تغير علي وعلى بيتو وبنتو وصار مهمل ونحن اخر اولوياته وما يرجع عالبيت لنص الليل بحجة شغله وبطلت اعرف باسورد موبايله وصار في دردشات مؤرشفة بالواتس اب لاجى يوم وحكتيلو شو هدول الدردشات تلبك وصار وشه اصفر وصار يحاول يغير الموضوع اصريت اني اعرف ما رضي يفتحهن ولما اخدت الموبايل منو تحول لوحش بس كرمال ما افتح واشوف وصارت مشكلة كبيرة وصلت انو يضربني ويحلف يمين طلاق ووقع يومها اول يمين بينا بعدها اعدنا وحكينا وانكر كل شي بالبداية طبعاً بس بعدين صدمني انو اعترف ورمى الذنب كلو علي وطالعني انا السبب بتصرفو انا بعترف اني مقصرة بنواحي معينة بس نحن عايشين بوضع صعب كتير وهو بيعرف وشايف انو انا ضعيفة وطاقتي ما عم تتحمل كل هالمسؤوليات والبنت ما شاء الله كتير متعبتني

انا ما عاد عم بعرف كيف اتصرف ولا عندي كبير استشيرو من ناحية ما بدي اخرب بيتي ومن ناحية تانية حاسة اصلاً هو مخروب وما عاد يتصلح ومستحيل اوثق فيه وايام بفكر كيف بدي دوس ع كرامتي رغم كل اللي صار وسامحو وضل عايشة او كيف بدي اضمن انو يرجع لبيتو وما يكرر هالشي انا ضايعة والشيطان عم يلعب فيني بترجاكم تساعدوني وتنصحوني شو اعمل وكيف اتصرف للعلم انو كمان رجعت سامحتو واعتذر وحالياً عايشين ع اساس ما في شي بس تصرفاتو كلها بتدل انو لسه عم يحكي مع حدا بترجاكم انصحوني والله يجزيكم كل خير يارب وبعتذر عالاطالة