أفكر دائما بالمواقف ولا أنساها

مرحبا..لو سمحتم بدي اطرح مشكله يمكن تكون مكرره هون في موقع حلوها بس بحاجه لكلام مباشر الي ولمشكلتي.. مشكلتي اني كتير بفكر بالمواقف الي بتصير معي وبضل قريب الشهرين بعد موقف معين وانا هالموقف ببالي وبفكر فيه وبضل فكر بردود فعل تانيه كان لازم اعملها لهالموقف يعني بضل بدواااامة التفكير بالموقف والاشخاص الي فيه...وهاد الشي كتير متعب ..مشان اكون واضحه اكتر...اخر مواقف صارت هي بتخص سلفتي واخوات زوجي صار في اخر فتره مواقف ومشاكل (( غير مباشره)) بيني وبينهم ...ووصلت اني لاوووول مره بحكي لزوجي بالبدايه فكرت انها هاي بداية انتصار الي بعد سنين من الظلم ...لانو تفهم كلامي وحس اني انظلمت لسنوات ...بس بعدين للاسف خواتو رجعو لصفهم وحتى سلفتي رجع معها كان شئ لم يكن...طبعا انا ما بدي يقاطع حد منهم بس شعوري انو هلأ فاهم اني انا كبرت المواضيع واني بفهم المواقف غلط ...لانو هو طبعو ببسط الامور وكتير طيب وكتير بينغر بالظاهر الي بيشوفو منهم... والمشكله الاكبر انو صار يربط اي موقف الي معو بان تفكيري انا غلط واني نظرتي للامور غلط وهاد الشي معناتو اني مع سلفتي وخواتو هيك تصرفت وهيك كبرت المواقف الي صارت..والمشكله ان هالموضوع صارلو من شهرين لتلت شهور منتهي ..بس انا لليوم بفكر بالي صار كانو صاير اليوم...وبندم عشغلات وببكي وشاعره بان موقفي كتير ضعيف قدام الكل...بس مو قادره افتح الموضوع مع زوجي كل ما اجي احكي بيسكر الموضوع وما بدي ابين قدامه عقلي صغير بيكفي الفكره الي اخدها عني..سدقوني اني كتير انظلمت من خواتو ومن سلفتي بس هن كتير قويات وهو كتير طيب وبينغر فيهم وانا ندمانه اني حكيت وبينتلو موقفي منهم لاني لا كسبتو هو ،ولا كسبت كرامتي......وهلا انا على هالحال من اكتر من شهرين كل يوم بندم وبفكر وبندم على مواقف بيني وبينهم وعلى تصرفاتي قدامهم مع العلم اني ما واجهت اي وحده فيهم باي شي بس صارت مواقف مو لطيفه معهم لهلا بندم عليها مع اني ما '' خبصت'' بس كتير بفكر لو اني حكيت شي تاني وبفكر اني لما التقي فيهم كيف رح احكي وكيف اتصرف...وعفكره صارلي شهرين ما شفتهم ولا التقيت بحد منهم للاسباب خارجيه... وهاي مشكلتي الي حبيت افضفض عنها ..وشكرا الكم على هالفرصه ..بعتذر عالاطاله ...