حلمت أني ضابط في الجيش

حلمت مره إني ظابط في الجيش وفي مداهمه في مكان معرفوش بس اللي فاكره إ نه اسمه ال6 عزب أو مساحته 6 عزب واحنا واقفين لقيت طفل راكب على عجله وبيجري وبيحذرنا من حاجه وصفها با سم غريب اول مره اسمعه وبعد كده التفت وسألت القائد بتاعي قالي إنت مش عارفها ياعبدالله دي حاجه ربنا ذكرها في القرآن وهتحصل في أخر الزمان وسمعت صوت ناس بتصرخ ببص على شمالي لقيت فيضان رهيب وعالي جدا داخل عليا وقتها مفكرتش في حد ولا في اي حاجه غير إني أجرى وبس وفعلا جريت زي البرق لحد اما الفيضان حاصرني من جميع الاتجاهات وغرقني والغريب إنه فيضان بالقوه دي قدرت إني اعوم وأقاوم لحد اما طلعت على سطح المياه ولقيت سلم حديد مسكت فيه وقعدت اطلع واطلع لحد اما لقيت نفسي واقف على منصه أو برج عالي جدا عن الأرض وببص حواليا ملقتش حد ولا لقيت المياه وببعد نظري لقدام لقيت في شارع طالع منه فوج كبير جدا من الناس ومتوجهين ناحيتي ووقفوم تحت قدام الكبرى أوالمنصه دي. ومن شده الخوف وهول اللحظه مكنش قدامي اي وسيله للهروب أومنقذ غير إني أقول يا رب. وخايف الفيضان يرجع تاني ونغرق كلنا. فضلت أقول يارب احمينا يارب انقذنا والناس ترد ورايا ببص في السماء رجعت بصيت على الأرض لقيت الناس كلهم ميتين وبيتحللو وببص على ذراعي لقيته بيتحلل. أدركت في اللحظه دي أنها نهاية الدنيا ونهاية الناس وإنه مفيش فايده من الدعاء دلوقتي خلاص. والأغرب إني نزلت من على البرج ونمت بنفسي وسط الجثث وسلمت نفسي للموت واللي خلقه. وبعد كده صحيت وأنا مش مصدق وَإنه ده حلم ومش قادر اتكلم ولساني تقيل. منطقش غير بكلمتين بس (الحمد لله).