حماتي تنغص عليَ حياتي

السلام عليكم ورحمة الله وبركاته مشكلتي في حماتي فهي دايما ما بتدخل في حياتي واكتر حاجة بتضايقني هيا وقت ما بتيجي تزورنا في البيت مع الاسف هيا فضولية جدا بتحب تفتح كل حاجة وتفتش في كل حاجة تفتح دولاب الخزين علشان تعرف جواه ايه تفتح التلاجة تفتش فيها الفريزر تفتح الادراج والمشكله انها مش بس بتفتح وتفتش دي كمان بتروح تتكلم عليا يعني مثلا مرة بنتي كانت في التويلت وانا كنت سايبة اكل علي النار طلبت من جوزي يطفي عليه فا قالت انها هتطفيه ومادخلتش المطبخ نهائي غير علشان تطفي علي الاكل المرة اللي زرتها بعدها فضلت تتكلم ان درج مطبخي مش متروق ومكركب وكان بنتها قاعدة وكذا حد من قرايبها مع العلم ان معايا طفلة صغيرة كل ما اروق الادراج بتقلبهالي تاني لو طبقت غسيل تقولي سيبيه ارصهولك انا علشان تفتح الدواليب تفتش فيها او مثلا تعمل انها عاوزة تساعدني علشان نخزن الغطاء الشتوي فا تقوم تفتح شنطة شنطة متخزنة تشوف فيها ايه تسيبني انزل مع بنتي تمرينها مثلا ارجع الاقيها فاتحة ادراج المكتبة او حتي الجزامة تفتش فيهم وانا بصراحة تعبت من فضوليتها الزايدة لدرجة بقيت بكره زيارتها ومش برضي اتكلم او احرجها بس في نفس الوقت مش عارفة اعدي وقلت لجوزي مرة قبل كده وهو قالي انا مش فاهم هيا مالها وبتعمل كده ليه وراضاني بكلمتين وخلاص بس مقدرش كل مرة اقوله كده واضايقه وهو ملهوش ذنب وهيا برضه امه مرضاش انه يزعلها بس في نفس الوقت ملهاش اي حق تقتحم خصوصيتي او تفتش في بيتي فا احلها ازاي مش عارفة واسفة للاطالة بس حبيت اوضح مشكلتي وارجو الاقي الحل عندكم