خايفة يفضحني بصوري بعد طلاقي منه

انا واحدة عندى ٢٦ سنة ،عايزة اصرخ بعلو صوتى ،عايزة اطلع اللى جوايا مش لاقية حد يسمعنى، انا عانيت من الظلم بشكل كبير اتجوزت واحد دمرلى حياتى وقلبها عذبنى وقهرنى ،علمنى يعنى ايه ظلم وخيانة وطمع وبخل وقسوة .ليييييه عمل فيا كدة مع انى كنت قايدة صوابعى العشرة شمع ومدلعاه اخر دلع كنت بتمناله الرضا يرضى وبعامله زى ابنى ،كنت مش بعرف اقوله لا ابدا ،علمنى انى علطول اقول حاضر ونعم.انا جميلة جدا ومتعلمة تعليم عالى فى احسن الجامعات ودلوقتى موظفة وراتبى عالى والحمد لله.هو اتقدملى وبعد ما سالنا عليهم لقينا كلام كويس بس ملهمش علاقة اوى بالناس فمعرفناش معلومات كتير عنهم.المهم اتخطبنا و انا كنت فرحانة بيه كان بيقولى كلام حلو وبيقولى بحبك ومقدرش اعيش من غيرك وهو بصراحة كان اول واحد فى حياتى طول عمرى محافظةعلى نفسى من انى اتكلم ولو زمالة مع اى راجل غريب.انا اتعلقت بيه جدا ولو يوم غاب عنى ما اتصلش بيا او اتاخر فى اتصاله كنت بقلق عليه وافضل اكلمه لحد ما يرد عشان اتطمن عليه،يعنى كنت بهتم بيه وابينله حبى الكبير ليه. انا اتعلقته بيه جدا لدرجة انى حسيت انى ممكن اضحى باى حاجة عشانه وانى مش هقدر اعيش من غيره. بعد فترة بدا يطلب ليا صور وانا قاعدة فى البيت عشان يشوف شكلى وانافى البيت، رفضت جدا ورديت رد عنيف وقولتله ما ينفعش وما يصحش لما نتجوز هتبقى تشوفنى براحتك ،زعل منى جدا وقالى انتى مش بتحبينى وبتخبطى فى الكلام ،واتخاصمنا شوية وبعدين رجع يتحايل عليا ايام لحد ما ضعفت وقولتله علشان اناواثقة فيك بس وصورة واحدة وخلاص كدة كنت لابسة بيجامة بيت عادية ،المهم فرح اوى بالصورة وقالى شكلك حلو اوى وانتى قاعدة فى البيت .بس بعدها فضلت اعيط وحسيت بذنب فظيع لانى عمرى ماعملت كدةابدا علشان ده عيب وحرام واحنا من عائلة محافظةجدا. بعدها كنا كويسين مع بعض جدا ومبسوطين وكل حاجةماشية زى ما احنا عايزين .بعد فترة بدا يتكلم معايا فى الجنس ،كنت بصده ردو فكان بيقولى انا بعودك عليا بس فكنت بضعف قدامه و بسيبه .الفترة دى انامكنتش حاسة بحاجةخالص كان عاملى غسيل مخ يا اما اعمل اللى عايزه ياا ما هيزعل ويقلب عليا ،كنت ماشيةوراه ووراء اوامره وطلباته لدرجة انه كان بكلمنى ساعات فى الجنس ويبعتلى صور جنسية و مع الوقت بقيت بفكر كتير بالجنس ، شوية شوية بقى بياخدنى الشقة بتاعتنا يقولى هفرجك على اخرحاجة عملتها فيها وبعدين يتجاوز بعض التجاوزات مش علاقة كاملة يعنى يقبلنى ويحضننى فقط ،وبعدها اروح وافضل ابكى واحس بالذنب الفظيع و اتفقت مع نفسى انى اواجهه واقوله ده عيب وحرام وهيزعل ربنا مننا ، و عملت كدة وكنت فر حانة انى قويت نفسى وقولتله الكلام ده. المهم اتجوزنا وعشنا اول فترة تقريبا كويسين ،بس بان على حقيقته معايا، عايز ياخد كل فلوسى و بيشتمنى وبيضربنى وبيبهدلنى وبيهددنى لوعرفت اهلى بمعاملته السيئة لياهيقول على تجاوزاته معى اثناء الخطوبة لاهلى.بقى بيكلم عليا ستات فى التليفون ويضربنى وعايز يمنعنى من شغلى ولواعترضت بيهددنى ،اناعارفة انى غلطت لما سمحتله بتجاوزه معى بس توبت وخلاص كان شئ بالماضى وانتهى فضل يهدد فيا ويقول معاه صور ليا والله اعلم حقيقة ام كذب،تعبت منه و من خياناته وتهديده و ضربه، طلبت الطلاق وتطلقت بعد معاناه ، وبدون اطفال الحمد لله. انادلوقتى خايفة منه يفضحنى بعدالطلاق ويقول اللى بيهددنى بيه للناس ،ارجوكم قولولى ايه رايكم هل ممكن يقول ولا مش هيفضح نفسه الموضوع اتقفل وخلاص ؟؟؟