هل يجوز ان اكره امي بسبب المشاكل

هل يجوز ان اكره امي بسبب المشاكل انا امراة متزوجة وعمري ٢٣ سنة وعندي ولد عمره سنتين قصتي بدات من الصغر ولدت ببيت فيه ام واب ما بطيقو بعض مشاكل وخلافات وللاسف يكون الحق على امي اغلب الاوقات لانها مش راضية بابي هو مريض وعنده كتير اوجاع وامراض يعني بالمختصر بتكرهه وبتكره احنا ولاده نكون منحبه كبرت بهالجو المشحون الذي لا يخلو من التحريض على الاب واهل الاب من خلال البكاء والاستعطاف وبطبيعة الحال كرهت ابي واهله

كبرت وتزوجت شخص كتير محترم وخلوق وعلى قدر عالي من الالتزام والاخلاق ولكن هذا الشيء ما كان يعجب امي كانت تضل تتمسخر علي وعليه ولكن مش امامه كانت خلال فترة خطوبتي تفتح تلفوني انا ونايمة وتقرا كل شي بحكيه مع خطيبي علما كنا عاقدين القران يعني افيق الصبح الاقيها بتعرف كل شي حكيناه وبتصير تضحك علينا وعلى كلامنا وبتعرف كل الاسرار عنه وعني وانا اضل ساكتة بحكم انه شخصيتها كتير قوية وما بقدر ادافع عن حالي

بقينا على هالوضع لغاية ما تزوجت ولما تزوجت انا بقيت على تواصل يومي مع امي واهلي علما اني كنت كتير اعاني من امي وتدخلاتها وكل هاد الشي ما كان يعرف فيه زوجي لغاية ما صارت تكتر المشاكل بيني و بينها تتهمني اني ما بهتم فيها وما بحكيها وانا كنت احكيها باليوم اكتر من ساعتين بس هي بدها يكون مضمون الحكي غيبة على زوجي واهله فصار يعرف زوجي المشاكل وصار يفهم شخصية امي ورغم هيك كان يحترمها وما يحسسها بشيء

مرت الايام وحملت بابني وخلال فترة الحمل كانت تعمل معي كل يوم مشكل على اشياء ما بدها مشاكل مثلا رحت عند دكتورة نسائية تخانقت معي ليش اروح عندها بدون ما اخبر امي اني رايحة بدها ياني عند كل مراجعة اخدها معي ومن هاد القبيل كانت المشاكل صار وقت الولادة وانا كل هالوقت اسكت وابلع واجي الها من تحت واعتذر حتى لو ما كنت غلطانة وهي تحاربني وما ترد علي عالتلفون لغاية بيوم بعد ما ولدت بشي اربع اشهر اجت حكتلي ان زوجي بيوم ولادتي كان يصرخ عليها ويمنعها من تصوير المولود وبمعنى طردها من المستشفى لما رجعت عالبيت واجهت زوجي بالموضوع وانكر بشدة بس على العكس كان يكرمها ويحسن الها بس هي حكتلي العكس تماما وقتها زوجي اخد موقف منها وما رجع ينزل عند اهلي بس بقيت انا انزل وهي ما اعتذرت بالعكس طلعت بالعالي ولامتني ليش اروح واواجهه انا كان هدفي اتبين في حال عمل هيك مع امي اكيد ما رح يهون علي بس للاسف طلعت عم تخترع قصص حتى تعملي مشاكل مع زوجي

رجعت بعد فترة طلعني زوجي سياحة على تركيا ولما رجعنا ما قالتلنا الحمد لله على السلامة بالعكس رحنا نسلم عليها صارت تحكي بمواضيع تانية وما عبرت فكرة السفر لتركيا ما تفاعلت على شيء ولا حتى سالتنا كيف كانت سفرتنا اجو مرة اهلي كلهم عندي زيارة صدفت انو امي ناسية تلفونها عندي فانا اجيت بدي ارن من تلفونها لبابا كتبت بالبحث اسمي طلعلي محادثات هي واخواتها عم يحكو علي حكي كتير بشع وصارو يتمنولي الطلاق وانو تخرب حياتي وتمنت انو زوجي يتزوج علي عشان اعرف انو ما الي غيرها ما حبيت اواجهها بالحكي لان ممكن تترك الموضوع وتصير تلومني ليش افتح تلفونها فحكيت لبابا بس للاسف ما عمل شيء وحكالي ان هي بتحكي على جوزها اكيد رح تحكي عالدنيا كلها فما استفدت شي

بعد بفترة شي سنة تقريبا كنت عندها بالبيت عم بخدمها لانها مريضة وناسية كل المواقف اللي عملتها معي مرقت من جنبها لقيتها عم تحكي هي وامها علي اجيت انا بدون ما تعرف اخدت محادثات تلفونها نقلتن على تلفوني وشفت مصايب لقيتها عم تدعي علي وعلى زوجي بالموت وخراب البيت وانو انا بغار منها وبتدعي على ام جوزي وعلى اخته انو ما يجيها ولاد وبتتمسخر على شكلي وعلى جسمي وكلام كتير بشع جدا انا صابني انهيار عصبي فعرف جوزي بالموضوع وبسرعة واجه بابا واعطاه الادلة وهلا انا عملت لامي بلوك و ما عم بزورها وقطعت علاقتي فيها بس عم بحكي مع بابا واخواتي

انا ربنا اعلم فيني شو تحملت منها وشو ذقت انا كان رح ينخرب بيتي بسببها وبسبب الخبث اللي للاسف بقلبها انا بحكيها بصراحة ما بحبها وللاسف وصلت لمرحلة الكره مقاطعتي الها ما اجت من فراغ بل من بعد استنزاف عاطفي وعصبي ونفسي وسايرتها كتير على حساب صحتي ونفسيتي وحياتي بس ما رح اسمحلها تخربلي بيتي هل هيك انا غلطانة علما ان زوجي شيخ ومتعلم للشريعة الإسلامية ومرجع بالامور الدينية وخيرني بينها او هو