ما الحل في صعوبة الاستجابة عند طفلة عمرها سنتان

السلام عليكم، ما الحل في صعوبة الاستجابة عند طفلة عمرها سنتان؟ بنتي عمرها سنتين وشهرين وأنا بحيرة كبيرة وخايفة يكون عندها لا سمح الله توحد، بنادي لها باسمها ما بترد علي، وفي مرات قليلة جدًا بتطلع علي بطرف عينها لما بنادي لها، بس بخاف تكون صدفة، طبعًا مثل كل الأطفال بتفضل الـ TV والموبايل، بس أنا صارلي فترة شبه لغيتهم إلا للضرورة القصوى

ما بتحكي إلا ماما وبابا، ومن جديد صارت لما تجوع تحكيلي مم، ولما بدها شي مثلًا مي بتسحب إيدي عليها أو بتجيبها لعندي، بالمقابل في أغاني بتغنيها وشبه واضحة حافظاها من الـ TV، بتلعب معانا وبتضحك معانا، ولما تشوف أطفال بتنبسط كتير، بس ما بتعرف تلعب معهم، وما بتستغرب العالم برا، بس ما في تواصل مع العالم إلا إنه ممكن تبتسم ابتسامة لهم، وما إنها متعلقة فيني عادي يعني، بس كمان بحسها ما بتفهمني، يعني مثلًا اعطيني هاي أو خدي هالشغلة ما بتفهم علي، ومرات قليلة لما بحكي لها تعي بتيجي

والله أنا متحيرة وضايعة، العالم كلها خوفتني، بس أنا بضل أحكي لأنه نحن ببلد غربة وما في إلا أنا وهي طول النهار تقريبًا، ولسا أول بيبي، بما إنه بتخلق جوها هون، بتلعب وكل شي بيشبه بعض لازم يترتب جنب بعض أو فوق بعض، ما شاء الله بطريقة ذكية كتير، وحتى الـ Lego والأشياء، عادي بتلعب لحالها بس ما بتلعب مع الأطفال، خوفوني قالولي طريقة اللعب هي بتدل إنه لا سمح الله عندها توحد

مع إنها بتستجيب، يعني مبارح علمتها الأرقام وبعد ساعة حفظتهم وتكررهم، بس بعد كم يوم اللي بعلمها ياه ما عاد بتعيده، مو مثل أغاني الـ TVـ بعرف حكيت كتير بس شرحت أبسط تفاصيل ممكن، ارتاح أو تريحوني أو توجهوني