ماذا أفعل لكي أجبر زوجي على فسخ خطبته والعودة لي؟

السلام عليكم دخلت كلية هندسه بغير رغبتى كان ارضاء لاهلى حبى وميولى من صغرى للرسم بعشقه وبالتدريب فى البيت و اشوف فيديوهات على النت بقيت رسامه مبدعه خلصت جامعتى بتفوق ورفضت اشتغل مهندسه وصممت اكمل طريقى وابقى رسامه عالميه والحمد لله حاليا محققه انجازات كبيره فى مجالى وقريبا باذن الله هوصل للعالميه اتجوزت انسان حبيته 6 سنين فى بداية جوازنا مكنش فيه اى اعتراض على شغلى لغاية ما حملت وانا فى اوخر اشهر الحمل حصل خناقه بسيطه بسبب ان واحد ابن صاحب بابا وصلنى البيت كنت تعبت وهو روحنى عشان جوزى كان معاه قضيه مهمه وقافل موبايله هو مستشار واجبرت انه يوصلنى هو اتلكك وقالى انتى فى اواخر الحمل ومينفعش تشتغلى وفعلا سبت شغلى انا عارفه ان الكلام داه مكنش منه انا عارفه شخصية زوجى كويس ومتاكده ان كلام حد من اهله هو عنده اربع اخوات ولاد منهم 3 بيشتغلوا فى مناصب مهمه بالاضافه ان حمايا لواء فى الجيش وعرفت ان عيلته كلها معندهمش ستات تشتغل بيعلموهم ويعيشوهم احسن عيشه وطلباتهم مجابه كلها الا الشغل خلفت بنوته بعد ما بنتى بقى عندها 6 شهور فتحت معاه موضوع شغلى كان رده مش موضوعنا دلوقتى اهتمى بالبنت وانا لما اقصر معاكى فى حاجة ابقى قولى اشتغل كنت حاسه ان انا عصفورة محبوسه حكيت لبابا وماما كان ردهم استنى لما بنتك تكبر شويه واحنا هنكلموا انا اتربيت فى بيت مفيش فرق بين راجل وست ماما وبابا الاتنين مهندسين سكت بس سكوتى مكنش راحه كان بيخنقنى وبعد اسبوعين من خناقات مستمره كنا فى عزومه لناس صحاب جوزى وسمعت كلام جوزى وهو بيشجع مرات واحد صاحبه انها تشتغل وتتفوق فى مجالها وكان بيحمسها وقالها لو احتاجتى اى مساعده انا فى الخدمه واتقلبت القعده كلها عن تشجيع جوزى لمعظم الستات الى كانوا موجدين والكل فضل يحسدنى عليه روحنا اتخانقنا خناقه عادية بس انا مقدرتش افضل قاعده حسيت ان محتاجة اسيب البيت وابعد شويه على ما اعصابى تهدى دخلت لميت هدومى وهو دخل اوضه الاطفال ينام وانا فضلت سهرانه لغاية ما النهار طلع وكلمت بابا جيه خدنى جوزى صحى على رنت الجرس مكنش يعرف انى لميت هدومى اصلا هو كان دخل اوضه الاطفال ينام فيه عشان اتخانقنا وفضل سهران فى شغل حتى مفكرش يجى يصالحنى ومشيت مع بابا وبابا رفض يسمعه عشان شكلى كان تعبان وعنيا وارمه وحمره وخت بنتى ومشيت جوزى جيه هو وحمايا وكان معاه مرات عمه وعمه عشان يصالحونى بس كلام مرات عمه ساعتها خلانى قلت لازم ننفصل وفضلت تسخن فى القاعده لغاية ما اطلقنا كلام جوزى ساعتها ان مكنش لازم اسيب البيت وانه كنا نقدر نحل المشكله بدون تدخل الاهل عشان المشكله كبرت جدا بتدخل الاهل انا لما مشيت من البيت متوقعتش لحظة انها ممكن تكون اخر لحظة فى بيتى منها لله مرات عمه المهم انفصلنا وبابا كام ليه دور كبير انه حسن علاقتى بجوزى بعد الاتفصال والمحافظة على علاقتى الطيبه والقويه باهل جوزى وانفصلنا بشكلل متحضر جدا وبعد انفصال 3 سنين اهلى ماتوا فى حادثه من ثمان شهور ونص جوزى وحمايا واخوات جوزى وقفوا معايا كانوا اهل ليا المهم قبل رمضان باسبوعين جوزى خطب ايوه خطب بنت عمه هى ارمله وطبعا الفضل لمرات عمه بعد خطوبته وانا بقيت مش قادرة ابص فى وشه انا لسه بحبه ولسه بغير عليه انا كان عندى امل اننا نرجع وبالاخص بعد وفاه بابا وماما انا حاولت ابوظ الخطوبه بس مقدرتش ومعرفتش اتصلت بيه يوم وبته قلتله الحق بنتك تعبانه جيه يجرى والبنت كان عندها سخنيه وروحنا للدكتور وفضل معايا فى للمستسفى دلوقتى انا سبت البنت ليه وانا بموت بحجة شغلى هو استغرب لانه عارف قد ايه انا متعلقه بالبنت بس حاولت اعمل اى حاجة تخليه يرجعلى انا انكسرت بعد موت اهلى الكل بقى يبص ليا على اساس مطلقه وعايشه لوحدها وبقى الناس يتكلموا لو ابتسمت وانا ماشيه انا بسافر كتير بره مصر واوقات باخد البنت وساعات بسيبها مع باباها الناس يفضلوا يتكلموا حتى ابن خالى حاول يقرب منى بنيه زباله انا حاليا كل حاجة راحت من ايدى اهلى وجوزى الى كنت حاطه امل انه يرجع ليا انا بقيت كارهه شغلى مع ان فى ستات كتير حواليا بقوا واخدنى مثال رائع لانجزات الست بس انا مش عايزة شغل انا عايزة جوزى وحبيبى الى حبيته واتجوزته مش الراجل الى كان عايز يقيدنى فى البيت احنا بعد ما انفصلنا رجع تانى الشخص بتاع زمان الى حبيته هو لسه بيحبنى بشوف حبه ليا فى عنيه وكلامه وخوفه عليا وانا مسافر ولهفته عليا لما برجع مصر انا عايزة ارجعله ومستعده اسبب الدنيا والعالم كله عشانه انا بدعى كل يوم على مرات عمه انها سبب انفصلنا ساعدونى لو سمحتوا