تزوجت مطلق معه طفل وأشعر بالندم

تزوجت مطلق معه طفل وأشعر بالندم، ليش زوجة الأب مظلومة وبعيون الناس ظالمة؟ أنا ما عمري عرفت عن معاناة زوجة الأب إلا لما دخلت بزواج مطلق مع طفل. زوجي إنسان حنون، وهو كشخص ما عنده عيوب، لكن عند الزواج تحديدًا بلشت المشاكل. طليقته تضل تتواصل مع زوجي بحجة الولد، وكلام وضحك ومواضيع كلها بحجة الولد. تعبت نفسيتي حرفيًا، شعور صعب زوجك يتواصل مع إنسانة كان يحبها

صرت أشوفها بتتعمد مقاهرتي، لدرجة إنه باحتفال لابنها حكت لزوجي إنه بس شخصين يروحوا على الاحتفال وممنوع أكثر، وراحت هي وابنها، وزوجي كمان راح. بعد الاحتفال اكتشفت إنها كانت قاعدة جنبه وتحكي معه وتتصور معه بحجة ابنها، ومواقف كتير

حكيت مع زوجي كتير عالفاضي. وحتى ابنها متعب جدًا، حكى لزوجي قدامي: «ارجع لأمي، وهاي هي السبب» (عني أنا)، بالرغم إني ما كنت أعرفه، وتزوجني بعد الطلاق، ومرة رحنا على المسبح، وكان بداية حملي، ابن زوجي عمره ١٠ سنين يعني واعي، خبطني ببطني بالمية ضربة قوية، وبطني وجعني. وقتها حكيت يمكن بدون قصد، لحد ما رجع كررها وصار يضحك، بالرغم إنه قدام زوجي ببين إنه متحمس لأخوه وبدو إياه

وكتير عمل مواقف معي مزعجة، شخصيته مسيطرة جدًا وما بيستحي، بالعكس بس يكون موجود بدو جميعنا نمشي على رأيه، حتى بالأكل وبكل إشي. صار أكثر من موقف منه ومن أمه، لدرجة صرت أكره وجودهم، وبحس حياتي جحيم بسببهم

صرت بس أسمع عن وحدة تزوجت من واحد معه أولاد أحزن عليها وأدعي لها تلقائيًا. في حل لهاي الحياة؟ لأنه الزوج منيح كتير، اللي هيك وضعهم كيف متأقلمين؟