رصيده من الحب انتهى في قلبي ولم أعد احتمل أكثر

مشكلتي مع زوجي تزوجته من 14 سنة وسافرت معه لإحدي الدول العربية وهناك اكتشفت انه مرتبط بأهله زيادة عن اللزوم لدرجة انه مش قادر يستمر في الغربة ولا قادر يشيل مسؤليتي انا والاولاد .اي مشكلة في العمل يجري يتصل بأخوه او امه يشكيلهم ويطلب منهم بيع الارض عشان يقدر يرجع يكونله مبلغ مالي يبدأ بيه جنبهم.وتم الرجوع بناءا علي رغبة امه وهي شخصية نرجسية ومتسلطة وكل همها انها حاطة براسها اني انا اللي مغرباه وعاوزة ترجعه بأي شكل من باب العند وشعورها انها هي المتحكمة الوحيدة والمسيطرةوكمان عشان اخدمها ودي عندها اهم .نظرا لانها قامت بإرجاعي مرة من قبل وقضيت معاها سنة عاملتني فيها زي الجارية ودوقتني عذاب انا محكيتهوش له.ولماقرر يسافر تاني رجعت معاه فضلت تحرب لما رجعتنا بكل الوان الكذب ادعاء المرض واحيانا انها خلاص بتموت .ومن بعد رجوعنا وانا في مشاكل ملهاش حصر بتدخل في تفاصيل حياتي وبيحكيلها كل حاجة...طلع ابن امه فعليا بجد مبيعملش اي تصرف الا اما يأخد الرأي وانا كتير طلبت منه مساحة من الخصوصية وكتمان اسرار بيتنا .نظرا لطبعي كتومة وبحب الخصوصية وعشت في الغربة في خصوصية وحرية في حياتي نظرا للبعد .انما اكتر ما قهرني ومحسسني بالظلم هو انها لو جرحتني بكلمة او اسأت لي بتصرف وتجرأت وحكيته من ضيقي وزهقي ورغبتي انه يدرأ عني الاذي ده ينهرني ويكذبني وحتي لو الموقف حصل قدامه يقوللي انا لو قلتلك معلش بيني وبينك هتبقي وحشة في حق امي حتي لو هي غلطانة.مطلوب مني ما اشتكيش واتحمل التحكمات ومستناش منه حتي يطبطب عليا بيني وبينه .في حاجز كبير قوي بقي بيني وبينه ورصيده من الحب عندي خلص خلاص ومش عارفة لا عمري ارد ولا اخد حقي ولا هو بيدافع عني ولا عارفة اعمل ايه .مش حاسة غير بأني غريبة مليش سند ومقهورة ومش قادرة اكمل حياتي كدة