أختي يضيع مستقبلها وتستنجد بي، ماذا أفعل؟

أنا شاب عمري 27 سنة أختي عمرها 17 وأبي وأخواتي الكبار شبين عمرهم بالتلاتينات.. طلعوها لأختي من المدرسة بعمر صغير لأنها بلغت وممكن تجبلهم العار ودبرولها عريس وهي لسا عمرها 14 بس الحمدلله ما تم النصيب لأسباب ما في ضرورة لذكرها.. وهي كانت دائما تبكي وتقلي بدها تكمل تعليمها وتصير دكتورة متلي بس أنا ما طالع بإيدي شي لأن عقولهم كتير متحجرة وكلمتي مالها مسموعة عندهم لأني بنظرهم متحرر وتفكيري سطحي وكلامي كلام كتب وجامعات وحكي فاضي، بس بعد ما صارت بعمر بيسمحو فيه ببلدنا إنها تقدم بكلوريا تحايلت على أبي ألف حيلة وحيلة وأقنعتو إنها ممكن تقدمها حرة بدون مدرسة وبدون ما تطلع من البيت فوافق حتى يسكتني ويخلص من كلامي وإلحاحي المتواصل وصرت ساعدها ودرسها رغم إن إخواتي يضلو يتمسخرو علي بإني حاطت عقلي بعقل بنت وإني بهتم بأشياء تافهة وبلا قيمة بس كنت مصر إني ساعدها وهي بنت كتير ذكية وعندها طموح وكان هدفها إنها تدرس بكلية الطب ولما كنت مسافر لحضور مؤتمر طبي اتصلت فيني وكانت مبسوطة وخبرتني إن نتيجتها طلعت ومجموعها عالي كتير وبيطلعلها طب ولما رجعت على سوريا لقيت متقدملها شخص عمره 40 سنة وهنن موافقين يزوجوها رغم إنه مطلق وعنده أربع ولاد وبده زوجة تربيهم لأنها بنظرهم كبرت وما تقدملها حدا غير هالرجال ولما عارضتهم هجمو كلهم علي وقالو إن نحنا ما عنا بنات يدرسو ويصيعو بالجامعات، وأنا هلأ مقهور عليها وما عم يطلع معي شي وهي بتضل تستنجد فيني وبتقلي ساعدني وما تتركني.. شو بعمل بترجاكم ساعدوني والله رح جن عليها حرام يضيع مستقبلها هيك. أبي رغم تعصبه وعناده ممكن يلين شوي إذا تحايلت عليه بس المشكلة إن أخواتي قادرين يلعبو بعقلو وهو بيسمع منهم لأنه بيشوفهم أرجل وأقوى مني لأني أنا مسالم وهادي ورايق أما هنن عكسي عصبيين ومتسلطين وبيحبو المشاكل.