خائفة من الطلاق والسبب...

السلام عليكم انا اسفه هطول فى مشكلتى و ارجو مساعدتى فى الحل انا كنت بحب واحد فى الكليه و اتخطبنا و حصل مشاكل و فسخنا و حاول مع اهلى كتير علشان نرجع لبعض و رجعنا و فسخنا تانى و بعد محاولات مره اخرى و رفض من الجميع رجعنا لبعض و اتجوزنا فى محاولاته مع اهلى قال لوالدتى هاجى اعيش في بلدكم بس وافقوا و خدى عليا اي ضمانات انى مش هعمل مشاكل تانى بس وافقى والدتى وافقت عليه و عيشنا فى شقه فى بيت امى و هو دفع جزء من تمن الشقه و كتب بالباقى شيك و والدتى قالتله و براحتك خالص فى باقى فلوس الشقه مش ملزم بوقت محدد و هو قال ان الشقه فى بيت عيله فمينفعش تكون باسمه فوالدتى قالتله مش هتكتبها باسمى دلوقتى لانى ممكن اليعها عشان خاطره بس بينى و بينها قالتلى انها هتكون بتاعتى و كتب شيك بمؤخرى و ماكتبش قايمه لاننا فرشنا غرفتين بس فكتب شيك بالقايمه و اتجوزنا من سنتين ..الخناقات بيننا مالهاش اسباب قويه تهد بيت لكن فى مشاكل كتير بتحصل بيننا و فى اغلب المشاكل بقى يشتم جامد و يغلط و يتكلم باستهزاء و يغلط فيا حاولت معاه كتير بس مره فى مره بقيت برد عليه و كل مشكله يهددنى بالطلاق وانه ينزلنى مصر لاننا كنا فى بلد عربى و بقى يكلم امى فى التليفون يزعق و يعلى صوته و يغلط فيا قدامها و انه مابقاش طايقنى اخر مره قالها هديهالك بالجزمه و اشحنهالك فى شنطه لدرجه انى قولتله انت مش راجل ..الراجل مش بيهدد بالطلاق كأن ربنا شرع فى ايدك الطلاق لعبه و بتطلع اسرار بيتك بره و تتصل بماما تعلى صوتك عليها رغم ان انا الست مش بعمل كده. و بيتدخل فى كل تفاصيل البيت لدرجه فظيعه و اخر مشكله حصلت بيننا و كبرت على مكان غساله ..تخيلوا؟. و والله قولتله براحتك انا قولتلك رأيي و حطها فى المكان اللى تحبه. راح قايلي ياللا غورى فى داهيه فروحت راده عليه ماقدرتش استحمل اكتر من كده و لما المشكله كبرت راح مكلم ماما قايلها هديها بالجزمه و اطلقها و اشحنهالك فى شنطه و مابقتش طايقها. وكده كده كنت نازله مصر علشان هو كان عنده حاجه يعملها فى مصر فنزلنى قبله بيومين و هو بيوصلنى المطار قالى فكرى فى الطلاق لانى نازل اطلقك و انا عملت عشانك كتير و مضيت على شيكات و زيك واحسن منك كتير و يقبلوا باقل من اللي قبلتى بيه و كل مشكله والله يقولى شيكات شيكات و شقه فى بيتكم مع ان والله ما حد جاب سيرة الحاجات دى ابدا ولا ضايقه. بعدها اخويا كلمه بهدوء و قاله كل مره تقولها هطلق فخلاص احنا موافقين .قعد يقوله انتو ما صدقتو و قعد يقوله انى بتعامل بنديه و انى برد عليه و انى مستقويه باهلى و الشيكات و من ساعتها ماقالش كلمه واحده كويسه ليا ولا لاهلى و بيقفل كل اللى حصل و يقول الحل اعيش فى شقه تانيه فى بلده هو رغم ان الاتفاق قبل الجواز ماكانش كده و رغم ان اصلا المشكله ماكانتش ع الشقه. المشكله على اسلوبه معايا. قال عنى كلام بعضه حصل و كتير منه ماحصلش والله و ظلمنى. و كل حاجه يقول امك امك امك و عملت و سوت و هي والله ما عملت حاجه غير انها ماكانتش موافقه قبل الجواز لكن بعد الجواز بقت بتعامله احسن منى. ماقالش اي كلمه تبين انه شارى حتى كل كلامه ان مابقاش فارق معاه وانه مابقاش شارينى و المشكله انى خايفه جدا من الطلاق ولسه جوايا مشاعر كتير ناحيته لكن هو لا راضانى ولا رضا اهلى و انا خايفه جدا يبهدلنى او يبعدنى عن اهلى و ابقى مكسوره و فى نفس الوقت خايفه اتطلق ...اعمل ايه؟