ما حكم فسخ الخطوبة بسبب الأهل

ما حكم فسخ الخطوبة بسبب الأهل انا من البحيره لكن تربيت وكبرت في الاسكندريه و حبيت اسكندريه وحبيت كل حاجه فيها وحبيت العلم و بقي عندي حلم اول حاجه أنجح و أنجح و اتخرج و ارفع راس وابي وامي لكن بعد ما كبرت تقدم لي ابن عم امي للزواج و انا دائماً كنت عندهم في البيت لأني انا كنت احب اخته و لما كنت بروح عند جدي في الاجازه كنت بعود عندهم اكتر ما بعود عند جدي و بعد ما اتقدملي انا في البدايه كنت عايزه اكمل تعليمي و يبقي معايا شهاده و اتجوز واحد متعلم و اعيش في اسكندريه احسن ما اروح و اعيش في البحيره لان انا مش هاقدر اتأقلم مع الوضع هناك و كمان لأن هو مش متعلم و بيشتغل حداد لكن عشان هو قريب ماما و خافت عليا وافقت وانا لقيت انه انا محبتش اعارض ماما فوافقت

اتخطبنا و بقى لنا دلوقتي سنه و في يوم ماما كانت عايزه حاجه من عمها اللي هو حماي و هو قلها تعالي و ماما راحت له و قعدوا مع بعض لكن حصل خلاف و ماما كانت بتتكلم معاه راح قال لها قومي امشي و قال لها انا اخد بنتك عشان عيالي وطبعا كان بيزعأ فيها و كان قدام حماتي وسلفتي واخوه لكن ماما مردتش و سكتت وبعدها بثواني ماما قامت مشيت و رجعت تقولي وانا اتضايقت

هي قالت لي لما يتصل خطيبك قولي له على اللي حصل و قولي له ازاي يقول لماما كده وفعلا اتصل و قلت له على كل حاجه و هو الصراحه رد علي كويس وقال لا مينفعش بابا يقول لمامتك كده وقفل معي و راح يكلمهم يفهم ايه الي حصل هما قالوا الغلط على ماما ولما رن علي تاني و قال لي قولتله حتى لو الغلط عليها ما ينفعش يقول لها كده اومال لو اتجوزنا و حصل خلاف باباك هيرجع يطرد ماما وانا ساعتها هعمل ايه

بعدين ماما قالت لي ماردش ولا ارن عليه وفعلا عدى ١٠ ايام مرنش و لما رن ماما قالت لي ماترديش انهارده استنيت تاني يوم رن علي و ماما ماكنتش في البيت و رديت عليه وفضل يقول لي انا مارنتش المفروض انت ترني ومش لازم انا دايماً الي ارن لأن انا الصراحه ماكنتش برن عليه غير أحياناً لما يتأخر ارن عليه و لما قلت لماما انه رن و انا رديت زعلت وهي دلوقتي بتقولي اسيبه وانا بفكر اسيبه و اكمل طريق حلمي لكن في نفس الوقت انا شايفه انه على الرغم من انه مش متعلم إلا انه شاب جدع و ذكي و عنده اخلاق و دين و راجل بجد وانا دلوقتي محتاره هل اسمع كلام ماما و عقلي و اكمل تعليمي ام اتزوج