ما الحل مع إهمال الزوج وارتباط الزوجة عاطفيًا بصديقه؟

ما الحل مع إهمال الزوج وارتباط الزوجة عاطفيًا بصديقه؟ أنا مترددة كثير، مش عارفة شو أعمل، أنا بدي رأيكم وانصحوني، أنا متزوجة من 9 سنوات، وعندي بنت وولد، زوجي مهمل، أنا صغيرة وهو أكبر مني بعشر سنوات، يتركني في البيت أيام ويسهر مع أصحابه ويشرب الخمر، وكل الصفات السيئة موجودة فيه، مهملني، ما بسأل عني، ما بيحكي معي كلام حلو، ما بيقعد معي، ولكن ما خانني بيوم من الأيام

في مرة كان غايب عن البيت أسبوع وخفت عليه، رنيت على صديقه أسأل عنه، أعجبني كلامه معي واهتمامه، ولما حكالي شو ما بدك أنا جاهز وبعطيك وبجبلك، اهتم فيني، طولت المكالمة وكان كل كلامنا عن زوجي، وبعدين تطورت الأمور وصار يحكي معي كل يوم ونطول بالحكي والواتساب

في يوم من الأيام، تطورت العلاقة، حكالي إنه بده يشوفني، وصار يحكي معي كلام غريب، وإنه نفسه في، وأنا، لأني مش لاقية الاهتمام، استمريت معه بس على الواتساب، وما طلعت معه، لكن الكلام بيننا تطور بسرعة، وصرنا نحكي عن كل شيء، لدرجة إني تعلقت فيه، لأنه زوجي مهمل، تمر أيام ما بسأل عني ولا بيحكي معي ولا يهتم

شو أعمل، أنا عايشة بندم وخوف إنه زوجي يعرف، وللعلم أنا بحب زوجي كثير وما بقدر أتخيل حياتي بدونه، لكن ما بعرف ليش تعودت على الكلام الحلو مع صديقه، ما بقدر أطلق، لأني بحبه، ودائمًا بطلب منه يهتم فيّ وما يهملني، لكن ولا كأني بحكي معه، أنا بحاجة لحب واهتمام، ولقيتهم مع صديقه، شو الحل