هل أستمر في هذا الزواج رغم الخيانة والإيذاء؟

السلام عليكم، هل أستمر في هذا الزواج رغم الخيانة والإيذاء؟ بدي نصيحة من أخواتي وإخواني، مشان الله، لأن ما عم أقدر فكر بشي من قد ما أنا مقهورة، أنا تزوجت على بلد أجنبي وزوجي الحمد لله صايم ومصلي وما بقصر بشي، بس من البداية حسيت بنفور من زوجي بالعلاقة، بلبس وبهتم بحالي، ولا يتحرك ولا في شي، فكرت إنو بس لحتى نتعود على بعض، بس صار هالشي يطول أكتر، أول شي كل أسبوعين، وبعدها صارت بالأشهر

وبهالفترة صرت حامل، لما فتحت موبايلو لقيتو يتفرج على أفلام، وينطر اللحظة يلي أطلع فيها من البيت كرمال يتفرج، خانقتو، وحكالي خلص آخر مرة، وراح يغير رمز موبايلو، وقال لي خصوصية، بس ضل مستمر بهالأفلام ورا ظهري، ووصل لهجران لسنة كاملة، وبعدها اكتشفت إنو بلش يحكي مع وحدة متزوّجة، وصاير بيناتن بوس وأحضان، وما بعرف إذا وصلت لعلاقة كاملة، أنا جنيت وخانقتو، وصار عم يحط اللوم عليّ، وإنّي نفسية، قلتلو: من عمايلك، من هجرانك إلي، ما بقى أعرف لإيمتى

قام ضربني كف، قمت طلعت أنا وبنتي، وضليت شهرين كاملين عند أختي، ولا حكى ولا اتصل، وبعدها إجا بعد ما حكى مع بابا عالتلفون، وما اعتذر ولا حكى شي، بس إنو هالشي غلط وخلينا نرجع، رجعت معو، وضل هجرانو

ولما حكيت معو قال لي: عادي، طبيعي، كل شهرين أو أربع شهور، العمر إلو حقه، عمره 46 وأنا 33، وهو لسا يشوف أفلام، ما بقى عرفانة شو أعمل، خيانتو إلي ما عم أقدر أنساها ولا هجرانو مشان الله، بس حدا يجاوبني