صدمتني شخصيتها التي تغيرت وأفكر بالرجوع لها

كان عمري ٢٥ سنة لما زوجوني أهلي بنت عمي اللي ما كنت حبها (اتفاق أهل من لما كنا صغار وكان عمرها ١٥ سنة ما كنت عاملها كزوجة ولا كنت اقعد معها ولا كان في بيني وبينها أي تواصل حتى إني ما نمت معها ولا مرة (يمكن قلة وعي ونضج مني ومنها هي كانت صغيرة وما كان عندها خبرة بالمعاشرة الزوجية تخاف وتبكي وتتعذب كل ما حاولت جامعها (وطبعا كل المحاولات باءت بالفشل وما صار بيناتنا أي علاقة زوجية وكانت مقصرة بكل شي لقلة خبرتها بالحياة الزوجية وعدم تحملها للمسؤولية وكنت حسها عبء على قلبي خاصة إن كل تصرفاتها ولدنة ولما حاول اتواصل معها واخلق جو من الألفة بيننا اشعر بالملل من كلامها اللي كلو عن أفلام الكارتون والملاهي اللي زارتها بالعيد ولما طلقتها تزوجت بنت حبيتها أصغر مني بخمس سنوات وكنت مبسوط معها لأنها ناضجة وفهمانة وبتعرف تتعامل معي واتدلعني بس بعد سنتين طلبت الطلاق مني لأنها ملت من العيشة معي متعودة ببيت أبوها على المصروف الزايد والحياة المرفهة وأنا كنت ما اسمحلها تاخد مصاري من أبوها ولما عرفت إنها عم تاخد منه بالسر حسيت بإهانة وعصبت عليها وهي قالتلي انها متعودة على حياة الترف والسفر وإني يا إما بقبل إن أبوها يصرف عليها يا إما بدها تطلق وترجع لعيشتها القديمة (رغم إني مهندس ووضعي المادي ممتاز وماني مقصر معها بشي ولكن أبوها مليونير وكانت متعودة قبل الزواج تصرف بس على تيابها ومكياجها قد ميزانيتي كلها ولما طلقتها سافرت لظروف عملي وضليت برا البلد ٥ سنين ولما رجعت رحت على بيت ستي أم أبي لحتى سلم عليها وتفاجئت بزوجتي الأولى كانت بالصدفة عندها تغيرررررت كتير وانقلبت ١٨٠ درجة صار عمرها ٢٢ سنة جسمها صاير أحلا وأطول وعندها تفاصيل بتخلي أي رجال يعشقها وصايرة أنيقة وجذابة وعندها طلة مبهرة خاصة مكياجها الخفيف وشعراتها الناعمين دوختني دوخ بس قلت بقلبي شو نفع هالجمال كلو إذا لساتها غشيمة وهبلة متل ما كانت بس لما سمعت أسلوبها بالحكي تفاجئت منها صايرة ناضجة وذكية وراكزة وحديثها كلو رزانة ورصانة وكلامها بيعبر عن إنها بنت مثقفة وفهمانة وعرفت إنها عم تدرس هندسة متلي من يوم اللي شفتها حسيت حالي حبيتها وعيني ما عم تشوف النوم بضل فكر فيها وبضل اسأل أختي الصغيرة (رفيقتها من لما كانو صغار عن أخبارها وتمنيت لو ارجع اتزوجها بس خايف ترفضني لأني عرفت من أختي إنها عم ترفض كل عريس بيتقدملها وإنها بتضل تقول لأختي ما بدها تتجوز وخايف أكتر من ردة فعل أهلها لأن من لما طلقتها صار زعل ومشاكل بين الأهالي وهنن من وقتها ما بيحكو مع بعضهم وخايف افتح هالسيرة مع أهلي لأن عمي كتير جرح أبي وأحرجه بكتير مواقف قدام الناس رغم أن أبي ما ذنبه أبدا وكان رافض فكرة الطلاق من أساسها لدرجة إنه خاصمني سنة كاملة لما طلقت بنت عمي وخايف اتقدملها وأهلها يرفضو حتى يردو اعتبار بنتهم لأن أهلها لهلأ حاقدين علينا كتير وبيحكو علينا حكي كبير وعملو مع أهلي كتير قصص ما في ضرورة لذكرها رغم إن أهلي ما ذنبهم وكانو ضدي (بعرف إنه حقهم يعملو هيك من قهرهم على بنتهم ولكن أنا لما طلقتها ما أذيتها ولا عملت شي يضرها بالعكس أنا فارقتها بالمعروف بس عنجد هالزواج كان دمار إلي وإلها وكان غلط الأهل مش غلطي أبدا وهلأ بدي نصيحة كيف فيني ارجعلها؟ لأني عنجد حبيتها كتير وعرفت إني لما كنت مسافر سألت أختي أيمت ناوي ارجع فهل معقول سؤالها بيدل على إنها بتفكر فيني أو مجرد فضول؟