هل مرض أخي النفسي سيمنعني من الزواج؟

هل مرض أخي النفسي سيمنعني من الزواج؟ أنا حاليًا بنت جميلة، الحمد لله، وناس كتير بتشوفني وتقول إني جميلة، ودي نعمة من ربنا، وأهلي ناس محترمين، والدي كان شغال في وظيفة محترمة، لكن توفاه الله من 7 سنين، وأمي تعمل في بنك، عندي أخ واحد بس، وأنا عندي 25 سنة، وخريجة كلية الآداب

أهلي، أبويا وأمي، معروف عنهم الاحترام، وعيشتنا متوسطة، لكن عمرهم ما حرمونا من حاجة خالص، وطالعين شبعانين الحمد لله، ومتربين على الدين والصلاة، وإننا ما نبصش لحد، وعندنا قدر حلو من الدين اتربينا عليه من الصغر

مشكلتي في موضوع الجواز، عندي أخ واحد بس، ماليش غيره أنا وهو، وهو أكبر مني بـ5 سنين، لكنه بيعاني من اضطرابات نفسية من زمان، ممكن منذ ولادته، زي ثنائي القطب، والاكتئاب، وفرط الحركة ونقص الانتباه، ولما كبر دخل في مراحل ذهان، لكنه بياخد علاج، وبيكون كويس بصراحة طول ما هو ملتزم بعلاجه

بس نظرًا لمرضه، أحيانًا بتطلع منه تصرفات ما تطلعش من شخص طبيعي، وبتضايق الناس، وردود أفعاله بتكون غير متوقعة أوي، لكن إحنا أهله عرفنا نتأقلم معاه، أنا عاذراه جدًا، لأنه مريض وما اخترش يكون كده

لكن المشكلة في المجتمع، فيه عرسان كتير بيتقدمولي، ولما يعرفوا موضوع أخويا بيرفضوا، أو يقولوا إن اللي عنده ممكن يتنقل، أو إن تصرفاته ناس كتير ممكن ما تستحملهاش، وده أثر عليا لأنه حصل مع أكتر من عريس،

ولما الناس تسأل، ممكن يقولوا إنه بيتعالج وممكن تحصل منه مشاكل، لأن أخويا فعلًا عنده حساسية زيادة عن الناس في الكلام، وممكن يفهم الكلام بشكل غلط ويزعل، لكنه طيب، ومش بإيده، وغصب عنه

بس ليه المجتمع يحاسبني على حاجة دي قدر ربنا؟ طيب هل أقبل بناس أقل من مستوايا علشان هم اللي ممكن يوافقوا؟ يعني آخر عريس كانت سمعته بين الناس سيئة جدًا، لكنه كان موافق على موضوع أخويا لأنه هو نفسه عنده عيوب كتير

طيب هل أقبل بحد أنا مش راضية عنه من ناحية الدين والخلق علشان الموضوع ده؟ أنا بقعد أفكر مع نفسي، خصوصًا إن أصلًا مش بيتقدمولي عرسان كتير عمومًا، وعاوزاكم تنصحوني وتقولولي كلام يهون عليا، ولو حد عنده حل أو مر بظروف زي دي يقول لي أعمل إيه،

وهل فعلًا الموضوع ده ممكن يأخر فرص جوازي أكتر؟ وادعولي ربنا يرزقني بالزوج الصالح اللي يوافق بكل حاجة، وأكون له الزوجة الصالحة