حق ابني لازم أخدو

السلام عليكم: بصراحة.. الدنيا بتدور وبتلفّ بيّه، ومش عارفة أعمل إيه؟ مقضياها بكى ودموع، أكبر مشكلة في مشكلتي إننا عايشين وسط مجتمع شرقي ما بيرحمش، عوزا تساعدوني وتخرّجوني بأَ من الهم اللي عايشاه. بقالي فترة ملاحظة إنو الواد مش على بعضو، أكل مفيش، لعب ويا العيال برضك ما بيلعبش زي زمان وهو يا عيني ما كنش بسيب ملتش كورة ويا صحابو، سرحان على طول وبعيونو خوف وقلق معرفش من إيه؟ حتى هزار مع اخواتو بطّلو، قلت بنفسي ما فيش غير أطبطب عليه وأسألو لكنو ما جاوبنيش وكبر الخوف بعيونو، لحد ما هددتو بأبوه وقتها قلي ويا ريت ما قلي! تقطعت حتّه حتّه وانا بسمع ضنايا بيحكيلي بدموع عينيه إنه ابن الجيران مغتصبو ومهددو إن قال لحد هيمووتو! ده موتو وقت اللي عملها فيه ابن ال... ..يا حبيبي يا ضنايا! و يا ده اليوم اللي مش هايعدي، أودّي وشي فين من أبوك؟؟ أودّي وشي فين من الناس؟؟ أنا عارفة إن المشكلة مش لازم تعدّي كده، وحق ابني لازم أخدو بس ازّاي؟؟ أصلي خايفة لمّا يعرف أبوه يقوم يرتكب جريمة ده مجنون أنا اعرفو، وممكن يطلقني..، دحنا ناس غلب وعلى أدّينا ماشين ويا الحيط ونقول يا رب الستر، أعمل إيه في المصيبة دي؟ أرجوكم تساعدوني دنا غلبت.