كيف أعالج حبوب الوجه من الداخل

بنات أبي مساعدتكم والله تعبت وما عاد عرفت شنو أسوي كيف أعالج حبوب الوجه من الداخل أنا أعاني من حبوب في بشرتي أغلبها تطلع برأس أبيض وتكون مؤلمة وبعدها تترك آثار سوداء وعندي بعد تصبغات حول الفم ووجهي صار غامق جدا وهالات غامقه جدا جدا والمشكلة إني فيني تكيس مبايض ومقاومة إنسولين وأحس سبب مشاكل بشرتي داخلي أكثر من إنه خارجي

المشكلة إني مو قادرة آخذ أدوية الهرمونات لأني خايفة منها وأدوية تنظيم السكر تسبب لي لوعة شديدة وأنا أساسًا عندي ارتجاع والتهاب في المعدة استخدمت الروكتان لكن ما شفت منه فايدة ويمكن لأن الجرعة كانت 10 ملغ فقط وعندي بعد نقص حديد ومهما أخذت أدوية أو مكملات ما يرتفع عندي الحديد ولا مخزون الحديد وحتى إبر الحديد عندي حساسية منها

والله يا بنات ما خليت سكين كير إلا وجربته وصرفت فلوس وايد لكن أحس ما في أي نتيجة لأن أصل المشكلة من داخل جسمي وحتى جسمي والمناطق الحساسة فيها تصبغات وشعري يتساقط بشكل مو طبيعي تعبت نفسيًا وايد وصرت أحس إني فقدت الأمل إذا في وحدة كانت حالتها مثل حالتي ولقت حل سواء مع دكتور معين أو علاج أو حتى تغيير بأسلوب الحياة ياليت تفيدني أبي أسمع تجاربكم يمكن ألاقي شيء يفيدني لأني فعلًا تعبت