صورة علم Jordan
من مجهول
منذ 3 سنوات 10 إجابات
0 0 0 0

خلال 7 سنوات لم أحظى ببيت أستقر فيه!

انا متزوجة منذ 7 سنين ، خلال 7 سنوات لم احظى ببيت استقر فيه لاكثر من 8 شهور ، بمعنى زوجي كل يوم ببلد ، بتقاتل مع مرؤوسيه بالعمل وبطردوه وما بعرف كيف بلاقي شغل تاني بمكان تاني بسهولة ، خلال السبع سنين عشت بالسعودية (الرياض _ جدة ) وفلسطين ، واندونيسيا وكندا والولايات المتحدة ( طبعا الولايات المتحدة قارة بحالها فيها خمسين ولاية انا عرفت منهم 6 ولايات ) وكل ولاية بلد بحالها بعيدة عن التانية ساعات بالطيارة ، مرة


بالشمال وبعد اقل من اربع خمس شهور اضطر اكب كل اغراضي ونرحل ع الجنوب انا تعبت ، تعبت كثير من هالاسلوب بالحياة ، وغير هيك انا عندي ولد المفروض السنة هاي روضه ، كيف بده يدرس ويتاقلم اذا كل يوم ببلد ، ابوه بقول الروضة مش مهمة ، حكي فاضي ، طيب ولما يصير بالمدرسة ?! قال لما يصير بخليكم بالمنطقة اللي بتكونوا فيها وانا بسافر ، طيب شو جابرني اعيش ببلاد حتي عربي بعرفوش ، ليش ما اضل عند اهلي ، استاجرلي بيت ، واستقر فيه والولد بدرس براحته واهلي حوليي بديروا بالهم عليي وع اولادي ، قال لا ، هلا انا اجيت انا وياه والاولاد بعد ما انكحشنا من اندونيسيا ، وكانت النية اقعد معه يومين بالاردن وبعدها اسافر معه عببن ما يلاقي شغل باي بلد وع الاغلب امريكا ، اهلي استاجرولي شقة مفروشة قريبة منهم ، ع اساس عبين ما اولد ( انا حامل بالشهر الثامن) وقالوله سافر ع لحالك ، بنتنا تعبانة وانت مش رايح تستقر هناك واصلا ما الك حدا غير امك هناك ، روح جيبها وتعال اقعد مع مرتك واولادك ،عبين ما يطلعلك شغل برا ، بدك تسافر سافر وخليها وكل ما صحتلك فرصة بتيجي بتشوفها هي والاولاد ،،بالاول وافق ، وبس سافر ، ابصر مين لعب براسه ، وغير رايه ، هلا بهدد فيي اما بلحقه وانا حامل ومعي ولدين اطفال ، او القانون بيناتنا واللي ممكن ينتهي بالطلاق المشكلة انا كنت موظفة بالحكومة وظله ورايي حتي خسرت وظيفتي وما عاد الي مصدر رزق استقل فيه عن مصاريه ،،،بس انا تعبت ، تعبت ، نفسي يكون لي بيت احفظ كل تفاصيله ، كل بقعة قصارة ساقطة من حيطانه ، كل زاوية من زواياه ، نفسي بغرفة نوم خزانتها مخلوع بابها من كثر الاستخدام ، وتخت مش حامل حاله ، فراش هافت لانه فديم ، من يوم زواجنا وصار لازم نغيره ، تسريحة مكسورة مرايتها ومخلوع جارورها ، نفسي بطقم كنب مسانده وسخين وما بنظفه قد ما اغسلهم ، صار لازمه تنجيد ، او حتي تغيير ، طرابيزات مقحطين من كتر كاسات الشاي اللي انكبوا عليهم وكتر المسح نفسي بثلاجة يعز عليي اغيرها لانها هدية اهلي يوم زواجنا ، نفسي بجارات اقعد معهم ضحويات ، افضفض واحنا بنشرب فنجان قهوة ، صاحبات ازورهم بالمناسبات او اتصل فيهم تلفونات اعتذر منهم لانه ما قدرت اقوم بالواجب وبعدين ننسى حالنا واحنا بنحكي ،،،نفسي اولادي يتعرفوا ع اطفال زيهم يتعاملوا معهم وياعبوا معهم ، اولادي اول ما سكنا الشقة المفروشة كانوا يعملوا حفلة لما حدا يدق ع الجرس ، يصيروا يصيحوا ، اجا ناس ، اجا ناس ،،،بالنسبة للهم الناس كائنات فضائية ، لانه عمرهم ما عاشو هالشي ، كل بلد كنا نسكنه ، نقعد اربع خمس شهور عبين ما نتعرف ع الناس اللي فيه ، واول ما نتعرف ونبلش نتاقلم ، بيجي زوجي وبقول يلا شدو الرحال ،،،وهيك علي طول ،،،هاد هو حالي ،،،انا طولت عليكم بس مش عارفة شو العمل وشو الصح ...انتو شو رايكم ?

أضف إجابتك

صورة علم United States
السؤال التالي