زوجي يريدني أن أختار له زوجة ثانية

السلام عليكم ورحمة الله وبركاته، أنا متزوجة عمري الآن 35 عامًا، وعندي أبناء الحمد لله، مشكلتي مع زوجي أن زوجي يريدني أن أختار له زوجة ثانية، وكل فترة يطلع لي بسبب ممكن من خلاله الزواج بثانية، رغم أنه ما في سبب، وأنا ما أكون سويت شي، كذا تطلع براسه هرجة ويقول: لو صار لي كذا أو لو سويتي كذا، راح أتزوج

الآن، قبل أسبوع، كان يتكلم مع عيالنا لأني حامل، إنه مرة يحب الأطفال، وإنهم زينة حياته، وإنه إذا شعر بضيق، الصغار يشيلون عنه الضيق والهم، وكنا مبسوطين، وفجأة بوسط الكلام قال: مستحيل يمر عليه 3 أو 4 سنوات من غير طفل، والتفت لي وقال: والله لو بطلتي تجيبين لي أطفال، لأتزوج وحدة ثانية

أنا ساعتها انفعلت وقلت له: أنا، على فكرة، الإنجاب ما عندي أي مشكلة فيه، ليش تتكلم كذا؟ كل شوي تهددني بهذي السالفة، الحين إذا صار فيني شي لا سمح الله، على طول ح تتزوج؟ يقول: أيوة، والله العظيم أتزوج، ما أحرم نفسي من حاجة أحبها

وتخاصمنا، مشيت من عنده وأنا أبكي مقهورة، قام لحقني: سامحيني، مو قصدي، وأنا المفروض ما أتكلم كذا، أنتِ ما فيك شي، طنشته، ما رديت عليه، تجاهلته تمامًا، رجع لي: خلاص، انسي اللي صار، قلت له: أنا ما رفضت أبدًا إني أنجب، وأنت عارف قد إيه أنا أحب الأطفال، وحلمي تكون عائلتي كبيرة، وقلت له: يكون في علمك، أنا مستحيل أتقبل أعيش معك وأنت متزوج غيري

قام زعل وقال: إذا أنتِ تفكرين كذا، أنا ما تناسبني حرمة زيك، بدل ما توقفين معي بشي أنا أحبه، بتصيرين أنانية! ويقول: أنتِ أصغر مني بسنتين، راح تدخلين سن اليأس قبلي، من حقي أتزوج، والمفروض تكوني حرمة عاقلة، ترضين بزواجي وتساعديني ألاقي بنت الحلال،

قلت له: مستحيل أنا أسوي هذا الشي لو تموت، عصب وقال: لو أنا أهمك، كنتِ تزوجيني وتفرحين، كيف أنتِ لما ولدك يكبر تزوجيه وتفرحي له، مو لأنك تحبيه؟ أنا نفس الشي، خليكي عاقلة وفكري بعقلية، مو تفكرين بقلبك، أنتِ لما تدخلي سن اليأس، طبيعي تشوفين لي بنت الحلال، والرسول كان معدد، ومن ذا الكلام،

وتخاصمنا مرة، ونهاية كلامه، لما طفش من الجدال معي، قام يحلف إنه ما راح يتزوج خلاص، وقال: ويلا، امسكي الحلفان عليّ، وإن شاء الله أموت قبل ما أنتِ تدخلي سن اليأس،

وثاني يوم جاء وقال لي: انسي اللي صار أمس، مشكلة أمس خلاص انتهت، وأنا آسف، حاليًا أنا متجاهلته، لما يصحى أنا أنام، وإذا كان موجود أشوف طلباته وأتركه، وأنشغل بعيالي وأي شي ثاني، مو طايقته، أحس إني حاجة ممكن يستبدلها لما تنتهي صلاحيتها

عشان كذا أفكر إنه هذا الطفل آخر طفل أنجبه له، وأصارحه إنه يتزوج ويعيش حياته زي ما يبغى، أنا ما عاد أبغى أجيب له أطفال، ولا عاد بسوي له شي، والأفضل يستبدلني وأنا صغيرة بكامل صحتي، ممكن تكون عندي فرصة أبدأ حياة جديدة من غيره، ولا إنه يستبدلني وأنا حرمة كبيرة عاجزة