اهمال زوجي لعواطفي جعل مني إنسانة حزينة

انا متزوجة من 5 سنين ولي ابني الله يحميه.. زوجي حالياً مسافر وممكن يطول شهور في الغربه.. انا مشكلتي اني انسانه حساسه ورومنسيه واحب اسمع كلام الحب والدلع من زوجي زي اي انسانه.. تقلبات الحياة جعلتني اتغاضا عن هذا الموضوع واعذر زوجي بسبب ظروف الحياة مع العلم انا بوضح لزوجي طبيعتي وابين له قد ايش هذا الموضوع مهم بالنسبه لي هو طبعه كتوم يحبني كثير بس مو كثير يطلع مشاعره لكنها بتطلع اوقات.. ودحين مع سفره بحس بإحتياااااج كبييير للعاطفه وانا كنت بحكيله انو لمن بيشوفني كثير معصبه ومتوتره بس يضمني اهدأ.. وانا اوقات بأنوع بطريقة تعبيري لحبي له سواء فعليا ولا قوليا وحتى أحياناً بكتبله خواطر وانا اطلع كل كلمه من صميم قلبي ودموع عيني ويقرأها ومايرد واذا جيته بمزح يعني اقله ايش رأيه يقلي انفع اكون كاتبه وشاعره ومن ذا الكلام..... وانا قصدي ابغا رأيه من ناحية المشاعر مو من ناحية ادبية.. ولا يرجع يقلي انتي قوليلي ايش تبغي تسمعي.. اقله بس قلي ايش تحس ومايعرف.. وهو مفكر انو لو حكالي احبك او ايش انا بالنسبه له خلاص هذي تكفي لسنين.. والله انا مو طالبه شيء مستحيل احيانا بتمنى الصفه هذي اقدر انزعها ومشاعري تكون زي الرجال من جليد و مايفرق معاي بشيء المشكله انا اعصب واحس اني متوتره وهذا الشيء مو بيدي من يومي وانا صغيره احب الحنان واحس بأمان بس امي و ابوي يضموني وبعد ماتزوجت خلاص يفكرو اني كبرت مع اني اقلهم قد ماكبرت حضنكم عندي بالدنيا بس ماادري ممكن يستحو وانا كمان بخجل اطلب منهم او اني ابادر.. بس دحين انصحوني كيف اخلي زوجي وهو في الغربه يحس فيني ومن غير مايزعل وانا أوضحله من فتره لفتره بس انا ماأحب كذا لأن الحب شيء ماينطلب وهو يشوف الحب انو بس افعال وانا والله مقدرة اللي بيعمله عشاننا انا وولدنا بس مو بيدي و المشاعر اللي بداخلنا ترتوي بإحساس صادق من كلام وافعال.. حتى وقت العلاقه هو عنده الأحاسيس اللي بيطلعها وقتها هي الحب وانا اشوف الشهوه هي اللي تحركه وجزء بسيط من الحب يعني حضنه وقت العلاقه شيء والحضن اللي كله احتواء وحنان وأمان من غير شهوه شيء ثااااااااااااااني .. وانا ماأدري اذا طبيعة الذكر تختلف عن الأنثى من هذي الناحيه....وكمان انصحوني كيف اقدر اخفف من احتياجي العاطفي لأن احاول واقاوم شعوري وارجع اتعب واعصابي تتعب... وشكراً.