أتمنى رجوعي لزوجي من أجل طفلي فقط

انا متزوجة من سنه ونص ولي طفل صارت عندي مشكلة مع زوجي اني كشفته يكلم حريم وطبعا واجهته وقلت له بروح لاهلي ماراح اقعد عندك واتصلت ع اخوي وجاء عند الباب قال انا برا اطلعي الا زوجي متمسك بعباتي ويقول اقعدي وخلينا نتفاهم كسر خاطري وقلت لاخوي خلاص امش وبعدها فهمني ان هالشي نزوه ومدري وش ومرت الايام وصار ينشب لي على اي شي ويدقق على اي شي اسويه ويعصب ويزعل علي وهو ماكان كذا قبل ابد لين قلت له انا تعبت نفسيتي ودني لاهلي وانا فعلا مرضت لدرجه ماقدرت اتحرك بالفراش بس اسبوع كامل وقلت له بوقتها ودني المستشفى ورحنا وسوينا تحاليل وعطوني مسكن ابرة وقالت الدكتورة انتي مرضك نفسي بس ارتاحي عند اهلك وانسي كل شي ورجعنا وقلت له الدكتورة كذا تقول قال لي انتي كذابه وتتمرضين وتمشوريني تبين تشغليني وزعلت قلت مقدر اتحمل ودني لاهلي وهو شاف نفسه غلطان وقال خلاص بوديك بس روحتك هذي مو زعل بس تغيير جوا قلت طيب ولما وداني بالطريق يقول لي ياويلك اذا الولد تعب ولا صخن واهتمي فيه خليكي ام ولو مره طبعا طنشته لين نزلت لاهلي وسكتت عنه وكل يوم اتصل فيه اسئل عنه بس واسكر وبعدها بكم يوم ارسل لي انا من اخذتك وانا طاقه روحي منك وانا طايبه نفسي منك وانتي وانتي واللحين معاك خيارين بس ياتتغيرين للاحسن ولا الطلاق وهو اقرب حل انا مارديت شاورت اهلي وقال لي اخوي قوليله يكلمني ومايصير الا كل خير واحضريه بعدها وارسلت له كلم اخوي عنده الجواب قال انا ما انتظر احد لين يصحى ادق عليه ولا تعلموني شنو اسوي وارسلي لي كول وانا بتصل عليك واقولك هالكلمة وما ارسلت شي وقال بتصل اذا مقفل تراك طالق ولقاه مقفل وكتب طالق وبعدها اتصل على اخوي بعدها بساعات قال لحظة غضب وطلعت غصبن عني ومدري ايش وقعدنا اسبوع محد كلمه ولا هو كلمنا وبعدها رجع اتصل على اخوي يبي يرجعني وانا بصراحة طابت نفسي منه بعد خرابيطه مع الحريم ولا انا اموت بالارض اللي يمشي عليها بس للاسف ما قدر كل شي سويته له اللحين هل ارجع له ولا لا ؟ لاني خايفه على الطفل اللي بيننا شلون يتربى بدون اب وانا احبه بجنوووون