بعد رعايتي لابن زوجي تأتي طليقته وبكل سهولة لتأخذه من حضني، فما الحل؟

زوجى كان متزوج قبلى بفتاة وحصل انفصال بعد اول سنتين كان فيه بينهم طفل عمره ٦ شهور وتم الانفصال اتجوزته والابن اتربى معايا لان والدته تركته لزوجى زى ما بنقول سابته حته لحمه حمره المهم هى ركزت فى حياتها وانا سيبت حياتى كلها عشان جوزى وابنى مش هقول ابنه لا هو ابنى انا كنت دكتورة فى جامعه كلية طب اسنان وسيبت شغلى عشانهم اهتميت بابنى لغاية ما دخل هندسة بترول وبتفوق وعندى بنت فى اولى طب بشرى فجاءة ظهرت زوجته القديمة وراجعه ندمانه انها اتخلت عن ابنها وعايزة ترجعه لحضنها ابقى انانيه لو حاولت ابعده عن امه بس داه ابنى مكنتش بتحمل اشوفها وهى عماله تمثل دور الحب والامومه مكنتش سابته زمان هنقول صدقنا انها راجعه لابنها ليه على طول مكلمات مع زوجى بحجة تتطمن على الولد طب ما ممكن تطمن عليه من خلالى او تكلمه شخصيا مش انا لوحدى اللي حاسين بكدا حتى ابنى اقصد ابنها شايف رجوعها ليه هدف تانى الا بنتى وزوجى شايفين ان انا ببالغ فى ردة فعلى وانها فعلا عايزة تحتوى ابنها لغاية ما شوفت رسالة منها لجوزى الساعه ٣ الفجر وهو كان نايم بتقولوا وحشتنى اوى ايامى من بعدك ملهاش طعم غلطت زمان بس دلوقتى مستحيل اسيبك انت وابنى انتوا ليا لوحدى اول ما شوفت الرسالة حذفتها زى الغبيه خفت ليشوفها ويحن ليها روحت حكيت لبنتى مكنتش مصدقها وقالتلى ورينى الرسالة قولتلها حذفتها قالتلى عرفى بابا روحت حكيتله زى ما تقولوا مصدقش وانفعل عليا وقالى داه ابنها غلطت زمان مش هنعلقلها حبل المشنقه الست بتحاول تقرب من ابنها معملتش حاجة غلط متكبريش الموضوع قولتله اولا داه ابنى انا ثانيا انا مش همنعها من حاجة الولد كبير ويقدر يقرر اما انت ازاى يبقى ليها حق انها عايزاك هو مصدقنيش وقالى بطلى تخترعى روايات ولو انا عايز ارجعلها انا حر اتصدمت صدمت عمرى مش داه الانسان اللي اتجوزته هو عمره ما كان كدا عمره ما جرحنى بلفظ او حتى نظرة الشيطانه دى لعبت فى عقله سيبت البيت ومشيت روحت قعدت فى شقه لوحدى الشقه دى شقه ملك لينا بس فى منطقه تانيه بقالى ٥ اسابيع الاولاد بيحاولوا يصالحوا وهو بردة دمان على كلامه حتى ابنى قالى انتى اللي امى ومحدش يقدر ينكر داه وبابا غلط سامحيه بس انا مش قادرة احساس ان كل حاجة اتخليت عنها عن حياتى عن نفسى عشانهم ويجى هو بمنتهى السهولة يقولى انا حر انا مش عايزة يعظمنى بس مكنتش اتوقع ردة فعله دى مش قادرة اسامحه ولاول مرة افكر فى الاتفصال خلال العمر داه كله