أشعر بالعجز والخوف من فقدان زوجتي بعد الحادث

أشعر بالعجز والخوف من فقدان زوجتي بعد الحادث، اتصرف ازاي في اني حاسس بالعجز وقلة الحيلة وحاسس اني عبء وحاسس ان زوجتي هتكرهني بالبطء، السلام عليكم انا شخص طول عمري معتمد على نفسي في كل شيء وفوق دا انا شخص رياضي اصلا فمعتاد على الحركة وجسمي قوي ويمكن يكون فيا عيوب كتيرة اوي ربنا يهديني بس الكسل مش واحد منها ودائما بتشاف شخص قوي

ربنا رزقني بزوجة صالحة والحمد لله بتحصل بيننا مشاكل من وقت للتاني ولكن بشكل طبيعي ولسه ربنا ما رزقناش اطفال من 8 شهور عملت حادثة قلبت كل الموازين عندي كسور مضاعفة في الرجل وكسر في الحوض والكتف وكدمات في العمود الفقري كنت بتعذب بمعنى الكلمة كل شيء مؤلم رحلة علاج مؤلمة جلسات علاج طبيعي مؤلمة جدا وغير كدا الحركة العادية اصلا كانت مؤلمة

زوجتي شافتني في حاجات ما كنتش حابب حد يشوفني فيها ابدا تقريبا كل صورتي قدامها اتغيرت وانا نفسي ما بقيتش عارف مين الشخص دا شافتني بصرخ من الوجع وشافتني بعيط كتير احيانا يوميا وبقيت شخص كئيب لاقصى الحدود حتى لو جه لنا اي خبر جميل انا ما بقيتش بعرف افرح تقريبا

فات 8 شهور على الحادثة وانا ولله الحمد احسن كتير دلوقتي بس مش زي ما في بالكم انا لما بحتاج اروح الحمام بصحي مراتي توديني لاني مش قادر لسه اعتمد اعتماد كلي على العكاز وده تحسن بالنسبة لي لاني كنت في وضع اصعب من كدا فانا مش بعرف اروح الحمام حتى لوحدي

حالنا ميسور جدا والحمد لله فما حصلتش ازمة مادية كبيرة لكن مراتي بسبب وضعي سابت شغلها الاساسي وبقت تشتغل اونلاين عشان تعرف تخدمني ومدى احتياجي ليها كبير جدا دا غير اني بقيت شخص سلبي وانا خجلان وانا بقول كدا بس اوقات من الاحباط او الوجع كنت بزعق لها واتعصب عليها الحمد لله انا دلوقتي اهدى من كدا وما بقيتش اعمل الهبل دا قدر المستطاع

دلوقتي انا حاسس ان مراتي بتتغير وحقها هي لا عارفة تخرج تغير جو ولا عارفة تشتغل الشغل اللي بتحبه وقاعدة مع شخص نكد زيي حاليا هي ما بتتذمرش بس واضح اني تقيل من غير ما تقول اذا كان انا بقيت حاسس اني تقيل على نفسي

اعمل ايه انا حقيقي مش عارف وحاجة زي دي مش هتخلص قريب للاسف واحتمال كبير اصلا ما ارجعش بالكامل زي الاول انا حاليا واصل لدرجة اني كاره حياتي كلها وفوق كل دا حاسس اني بخسر مراتي بالبطء