أشعر أن سلفتي تستغلني لرعاية طفلها

السلام عليكم، أشعر أن سلفتي تستغلني لرعاية طفلها، ارجوكم انا عايزه حل لمشكلتي، انا متزوجه من ٣ سنوات ولسه مفيش نصيب في الخلفه، وبسعي انا وزوجي في العلاج، ربنا كريم، واخو زوجي تزوج من سنه وما شاء الله ربنا كرمه هو ومراته اول جوازه وانجبت ولد

احنا عايشين مع بعض في نفس الدور، لكن هي في شقه وانا في شقه، علاقتي بيها كانت كويسه جدا، وكنت بدخل اساعدها واشيل ابنها وقت ما تكون عايزه تنام او وراها حاجه، ومكنتش بسيبها ابدا، لحد ما حصلت بينها وبين زوجها مشكله، ومنعها تعطيني الولد لانه كان شايف انها مهمله ومش قد المسؤوليه، والمشكله كبرت واهلها اتدخلوا، للاسف انا سمعت الكلام من شقتي من غير قصد، وعرفت ان اخو زوجي شايف ان ابنه اكثر امان يكون جنب امه، ومش حابب يدخل عندي كتير

وعرفت ان حماتي قالت لها اقفلي على نفسك علشان سلفتك اللي هي انا بتغير منك، وامها قالت لها انتي متعرفيش هما بيعرفوا عنها ايه، قلبي وجعني، لاني مقدرتش اعمل لحد منهم حاجه وحشه، ومع ذلك قررت ابعد، لكن معاملتي مش هتتغير مع سلفتي لانها كانت كويسه معايا، ووقت ما بحتاجها بلاقيها زي ما انا بعمل معاها

لكن مع الوقت حصلت مشكله تاني بينها وبين زوجها واهل زوجها، وكلهم كانوا زعلانين منها، حتى انا غلطت في نفسي لاني رحت زيارة حماتي وقت المشكله، وهي فهمت اني رحت علشان انقل لهم الكلام، ودخلت كلمتني، وعرفت من اخت زوجي انها بتنقل كل كلمه بتحصل بيني وبينها ليهم، وانها بتغير من افعالي معاهم، فقررت ابعد نهائي عنها

وعرفت انها رجعت واتصالحت معاهم تاني، لكن انا بقيت في حالي، ولا بقيت ادخلها ولا حتى عاتبتها، واكتفيت انها لو احتاجت مني شئ هعمله لله فقط، وبصراحه مش حابه اتدخل اكتر منعا للمشاكل، ومش حابه اخد ابنها زي الاول

لكن هي بعد ما رجعت برضه بتيجي تدهولي لما يكون وراها مشوار او حاجه في البيت، وانا مكنتش عارفه ارفض ازاي، لحد ما مره اخدت الولد وفضلت اكلمها استعجلها، لحد ما هي فهمت اني مش حابه اخد ابنها تاني، وانا كنت اقصد ذلك، لاني مش حابه اي تدخل نهائي

حاسه ان المهم عندها مصلحتها، يعني تعرفني علشان اساعدها فقط، نظرتي ليها اتغيرت، ومشاعري كمان مبقتش زي الاول، وكمان مش بتقدر اني ممكن يكون ورايا حاجه في بيتي، وشايفه انه انتي لوحدك ما عندك ولاد، وزوجك مسافر، ايه المشكله انك تساعديني، فحاسه انها بتفرض نفسها عليا بالعافيه، وانا كرهت كده

دلوقتي من اخر مره انا حاسه اني ارتحت انها فهمت كده، ومش فارق معايا تقول عني ايه او تعمل ايه، انا مش غلطانه، كل واحد حر يعمل او ميعملش، بس في نفس الوقت حاسه بتانيب ضمير، لان ده طفل صغير ومالهوش ذنب باللي بيحصل، لكن في النهايه انا عايزه اعمل حدود