كنت أتخيل أني سأعيش قصة حب خيالية لكنه كان أكبر وهم

السلام عليكم شكرا كتير على مساعدتكم وربي يسعدكم ... مشكلتي للاسف في الحب اللي كنت بتخيله رح يكون اعظم حب بحياتي كنت بحس انه الدنيا من دون حب ما الها فايده كانت عيني حلوه للدنيا وفجأة لاسف تغير عندي هالمعنى وصرت احس انه انا بس عايشه علشان اشتغل وهاد اكتر اشي حاليا بفكر فيه للاسف... انا طالبة ماجستير وعمري ٢٤ سنه الحمد لله رب العالمين ربي اكرمني بالجمال والحمد لله وهاي اكبر نعمه عندي ولكن من عمر المراهقه وانا متلي متل اي بنت ملامحها حلوه بكون نسبة المعجبين فيها اكتر وانا الحمد لله رب العالمين من بيت محافظ ومخافة رب العالمين اولا وقبل كل اشي ، ولكن عاطفة البنت للحب كبيره وللاحلام ولفارس الاحلام برضوا كبيره وكنت واعيه لهاد الاشي وانا بعمر ١٤ سنه انه انا عندي هدف وهو انجح في دراستي واحقق حلمي وفعلا بنيت هدفي خطوه بخطوه باصعب الظروف واتحملت والله العظيم ظروف ما في اي انسان بقدر يتحملها وبفضل الله حققت جزء من احلامي وبعدت تفكيري عن الحب والعلاقات المحرمه وكنت ابعد كل هالبعد عن هالطريق وكنت اواجه مشاكل مثلا لو ما قابلت اعجاب الشخص اللي معجب فيني وكأني بصير عدوته ولكن انا كنت ارفض بطريقه ما تجرح حدا وكنت بحاول بكتير مرات ما انتبه لاعجاب اي شب في مرحلة البكالوريس علشان ما اضطر ارفضه وأذي مشاعره لانه ممكن يكون صادق ولكن شاء القدر في السنه التالته اني اعجبت في زميلي وكنت امدح فيه بطريقه مو طبيعيه كنت احسه شخص محترم ومثقف وطموح وملتزم والله انه كانوا يستغربوا مني صاحباتي انه كيف غير افكاري ولكن انا كنت ملتزمه الصمت وصعب ابينه مشاعري وهو كان ببادلني نفس المشاعر وكان مهتم واستمر هاد الاهتمام فتره طويله لكن هو ما صارحني ابدا وانا كنت احس انه بحياته ما رح يصارحني لاني انتبهت انه اهتمامه بزيد وقت ما يكون اصحابه معه وفعليا اتأكدت من اهتمامه بزيد كل ما كان مع اصحابه وطبعااا انا حزنت كتير لاني كنت على نيتي وكنت شايفته شخص محترم وملتزم وفجأة اكتشفت انه هاد الشخص بلعب بمشاعري وقلبي وكانت اسوء فتره بتمر علي بحياتي ما اصعب انه الشخص اللي حلفت بحياته يطلع بلعب فيك وهيك وقفت مشاعري كليا عن كل اشي بالحياه وانا مو عارفه شو ابرر لنفسي مو عارفه اقنع نفسي باللي صار وانسحبت بكل هدوء وهو حس انه لعبته انكشفت وهيك خلصت قصتنا مع اخر ايام التخرج وانا فوضت امري لرب الكون وصبرت وحاولت اقنع نفسي انه كل الي صار كان خير اللي وانا مو عارفه شو ذنبي ولكن الحمد لله على كل اشي وبعد كم شهر من تخرجنا سجلت في جامعه تانيه ماجستير وشاء القدر انه تجمعنا الصدفه في نفس تخصص الماجستير لكن انا مشاعري بهتت اتجاهه واتجاه كل اشي بالحياه وهو صار بالنسبه اللي شخص عادي جدا ولكن ما بفقد احترامي اله حتى لو هو اذاني لاني قدرت احول هالمصيبه لقوه اكبر وانا ما بعرف احقد ما بعرف اكره لكن هو للاسف حاقد علي وبتعامل معي بتصرفات للاسف ما فيها اي زوق وكانه شخص تاني تماما وكاني عدوته وكأنه مو هاد الشخص الملتزم المثقف اللي كنت اشوفه والي ما شفت حدا قبله و مو عارفه كيف اتصرف وله كيف اتقبل الوضع انا مشاعري صارت عادي اتجاهه لكن هو لأ في حقد في استفزاز مستعد يعمل اي تصرف بس علشان يأذيني وانا والله بس مركزه في دراستي وتقديري امتياز الحمد لله معقوول انا غلطانه لاني مو عارفه احقد عليه واتعامل معه بكل انانيه وانا اصلا نادرا لحتى اتعامل معه في الدراسه لكن مو قادره استوعب اللي بصير مو قادره اقنع نفسي انه هاد الشخص كان بارع بالتمثيل وهو ملتزم الصمت معي يعني ما في اي امل بقصتنا وتقريبا صرلنا سنه في الماستر يعني كل اشي مااات للاسف... الله يسعد قلوبكم ساعدوني