السؤال

قبل 1 شهر (7 اجابه)
7 اجابه

هذه قصة زواجي وطلاقي وعذابي!

انا عمرى ٢٤سنة مطلقة .انا الحمد لله جميلة وعلى خلق ودين بشهادة الجميع ومحافظة على صلواتى.هحكيلكم قصتى ،قصة طلاقى وعزابى ،وهى ......انى اتخطبت لزميل فى العمل عن طريق مديرة تعمل بنفس المكان ولكنها ليست مديرتى ،كانت مديرته قبل نقله لادارة اخرى ،المهم هى لم تكن تعرفنى لكن هناك شخص فى العمل مدح اخلاقى امامها فرشحتنى ليه وهو اعجب بيا واتقدملى وبعد الخطوبة كانت تفتعل المشاكل بيننا وتقول له اثناء الشجار امامنا بقيت بتكلمها فى التليفون ومبتكلمنيش زى زمان وانا كنت استغرب من كلامها واقول ربنا يهديها هى عاملة عليا حماه ولا ايه وكنت اتكلم معاه بخصوص غرابتها يضحك ويقولى انها بتعزه جدا زى ومتقصدش حاجة . المهم بعد كدة هى بقت بتفترى عليا وبتقوله حاجات بالظلم انا معملتهاش وكان بيجى يسالنى وتهمنى كل كام يوم انتى عملتى كذا وكذا وشوفتيها ومسلمتيش عليها او شوفتيها وبصيتى عليها بقرف كل ده محصلش اصلا وانا كنت بدافع عن نفسى واقوله انت المفروض تبقى واثق فيا وبعدين يقولى ماشى خلاص انا بسالك بس علشان اتاكد وهكذا استمرت فترة الخطوبة وكنت بقول معلش استحملى بكرة ربنا هيظهر الحق وانى صادقة وبريئة وانها بتكذب وقولتله الست دى انا تعبت منها ومليش علاقة بيها تانى بروحلها كل يوم فى مكتبهااسلم عليها واسال عنها وهى بتسلطه عليا وبتظلمنى وتقول عنى كلام محصلش ،راح قالى براحتك متروحلهاش تانى ،انا قولت بينى وبين نفسى الباب اللى يجىيلك منه الريح سده واستريح فقولت ابعد عنها ومشاكلها انا استحملتها كتير علشانه بس لحد كدة كفاية ،المهم هى بعد ما بطلت اروح اروح عندها زادت فى الافتراء عليا وتقوله انى بقول لزمايلى فى الشغل انى مش عايزاه يروحلها تانى ويقطع علاقته بيها وكل ده من تاليفها هى حسبى الله ونعم الوكيل فيها.انا كنت بستغرب انها تعرفنا على بعض وبعدين تبقى عايزة توقع بيننا ،مكنتش فاهمة ليه بتعمل كدة وكانت علطول بتروح معاه من الشغل فى عربيته و كنت بقول معلش دى ست كبيرة اكبر منه بحوالى ١٧ سنة تقريبا . معلش دى زى مامته ،بس كنت دايمامش مستريحة من علاقته بيها بالذات مرة قبل ما اقطع علاقتى اتخانقت فى الشغل معانا فى مكتبها وطردتنا منه وهو نفسه كان زعلان منها وبيشتم عليها وساعتها قعدنا اتكلمنا واتفقنا انها بتعملنا مشاكل وان احنا الاتنين هنقطع علاقتنا بيها وخلاص ساعتها دى انا قولتله لحدكدة وخلاص وهو قالى اه طبعا خلاص متزعليش واتفقنا . المهم بعد فترة امه قالت لماما خلاص كل واحد فى حاله يدوب ..سلام وبس .وبعد فترة جت سيرتها روحت سالته انه ملوش دعوة بيها مش كدة راح قالى ليه هو ايه اللى حصل استغربت من كلامه وقولتله هو مش احنا اتفقنا قالى ليه هى عملت ايه قولتله انت نسيت كذا وكذا...قالى خلاص بقى علشان احنا فى شغل واحد بلاش الخصام وكلام الناس قولتله انت ليه مقولتليش انك رجعت تكلمها واستنيت لمااسالك قاللى علشان مش عايزك تعملى مشاكل ،بس انا زعلت منه علشان الناس كلها عرفت انهم اتصالحو زى زمان وبيروحلها كل يوم المكتب وبمواعيد محددة وانا اخر من يعلم .زعلت شوية وبعدين قولت خلاص يمكن هو ادرى منى علشان الشغل والناس .انا كنت ببقى خايفة طول ما هى معاه وكمان رجع يروحها معاه فى عربيته زى زمان .وكل كام يوم من قعدته معاها بيتاثر بكلامهاعليا ويجى يقولى انتى بتحكى للناس اللى معاكى فى ادارتك عن اسرارنا و انا اقعد احلفله انه ما حصلش وبقوله لازم تبقى واثق فيا مينفعش انك تشك فى صدقىى ليك. كل ده مكنتش بحكى حاجة لبابا وماما علشان ميكرههوش ويزعلوا منه،وهو دايما كان يقولى متحكيش حاجة لحد ولا لباباكى ولا لمامتك .المهم مرت فترة الخطوبة بنفس الاسلوب وانا عندى امل ان بكرة ربنا هينصفنى عليها وهيبين الحق من الباطل وانا كنت صابرة علشانه هو بس علشان بحبه جداجدا .. المهم اتجوزنا وعملنا فرح كبير وحلو اوى وعشنا اول شهر كويسين تقريبا وبعد كدة بان على حقيقته واتغير معايا وبقى بينتقدنى فى كل حاجة وبيقلل منى مهما عملت علشانه ،كان كل همى انى اسعده كنت بحبه بجنون وكنت بستحمله علشان بحبه وبدارى عليه دايما وقبل الجواز حصلت مشاكل بينه وبين بابا علشان كان بيغير كلامه فى الاتفاقات الجواز وخلانا دفعنا فلوس كتييييير زيادة مكانه عن اللى كنا متفقين عليه وده كان بطلبى من بابا علشان كنت بحبه مع انه كان بينكر اصلا انه اتفق على الحاجات دى وده كان مزعل بابا انه مالوش كلمة وبيرجع فى اتفاقاته . المهم بعد الجواز بقى بيعاملنى وحش وبنرجع من الشغل كل يوم نتغدا ويسيبنى يروح عند امه يرجع بالليل على ميعاد العشاء وياكل وينام ومبيتكلمش معايا فى اى حوار مش بيشاركنى فى اى حاجة ،ولو يوم منزلش من البيت يقعد فى القوضة التانية او الصالة يتكلم فى التليفون بالساعتين بصوت واطى جدا ولو دخلت عليه يسكت لحد ما اطلع وبعدين يتكلم براحته.مرة دخلت عليه لقيته نايم على السرير وبيتكلم بصوت واطى بطريقة دلع زى ماكان بيتكلم معاياواحنا مخطوبين ،واجهته قعد يقول اى كلام وبين انه واثق من نفسه ومش هيقولى كان بيكلم مين عشان هو متعودش على الاستجواب ده.المهم اناعرفت من سجل مكالماته انه بيكلم الست المديرة بتاعة الشغل المهم انها متزوجة وولادها فى سنى واكبر منى كمان حسبى الله ونعم الوكيل وواحدة كمان تانية غيرها .كل ده غير انه كان بياخد منى مرتبى كله بالمكافات كمان ،بحجة ان عليه ديون قرض وفيزا و..واكتشفت ان كله كذب فى كذب ومش مديون وان عنده ودايع وشهادات فى البنك .وان المديرة بتاعة الشغل بتعرف منه كل اخبارنا وبتتدخل فى حياتنا عن طريقه بحجة انها بتنصحه علشان هى عارفاه وعارفة انه ضعيف الشخصية. كان بيتخانق معايا على اى حاجة وفى الاخر يقول انى انا النكدية ،وربنا يشهد انى كنت بقوم بكل واجباتى ناحيته وكنت بهتم بنظافة البيت وبهتم بنفسى ونظافتى الشخصية جدا وبحضر الاكل قبل ما بنزل الشغل واول ما بنيجى من الشغل على ما بيغير هدومه بكون سخنت الاكل و جهزته .كل حاجة وحشة فى الاخر عملها معايا .بياخذ مرتبى يصرف منه على البيت وعليا ويحوش فلوسه هو ، بيكلم عليا ستات المديرة دى طلعت خطبتنى ليه علشان قدام الناس خاصة اللى فى الشغل انها زى امه وخطبتله فتبعد الشكوك عنها علشان انا اكتشفت ان الناس فى الشغل بقالهم سنين مستغربين من علاقتهم وقربهم ومرواحها معاه بالعربية بتاعته مع ان هناك مواصلات يوفرها العمل لنا .الشهرالتانى من الجواز كله مشاكل بسببه ومكنش عايز يتحمل المسئولية بتاعة الجواز.كل ده غير الضرب اللى كنت بتضربه منه بسبب ومن غير وكذبه وخيانته وبخله.تعبت منه وا ستحملته كتيييييييير واستحملت اسلوبه معايا وانتقاده ليا وتريقته عليا وكل ده استحملته وكنت بدعيله ان ربنا يهديه،بس اللى مقدرتش استحمله الضرب اخر مرة ضربنى كان عايز ياخذ مرتبى غصب عنى بعد قررت انى مش هديله مرتبى تانى بعد اللىى عمله فيا.فقعد يضربنى ضرب مبرح جدا لمدة ٣ساعات وشتمنى باقذر الالفاظ وشتم فى اهلى وشتم على ابويا. واهلى جم خدونى من البيت ولموا هدومى وقعدت عندهم بالبيت اسبوع كامل نايمة على ظهرى مش بقوم من السرير غير للحمام من وجع الضرب كان جسمى كله كدمات وذراعاتى وارمة من ضربه ليا بطريقة وحشية .المهم قبل ما اروح البيت اهلى خلونى اروح القسم و اعمله محضر بالضرب.اتصل بياواهله اتصلو بينا كلنا واحنا مردناش عليهم وفى الاخر رد بابا على قريبهم وقالهم نتنازل على المحضر بشرط الطلاق وانى اخذ كل حقوقى وبالفعل تحت الضغط بالمحضر وخوفا من تشويه صورته امام الناس وافقوا بس بعد محاولات لعدم الطلاق وللصلح وكل ده طبعا علشان مش عايزين يخسروا فلوس المؤخر والقايمة والذهب اللى خباه معاه اول ما بدات الخناقة قبل ما يضربنى.المهم تم الطلاق واخذت حاجتى والحمد لله كل هذا بعدشهرين جواز شوفت فيهم المشاكل والعذاب اللى ممكن حد يشوفهم فى عشرين سنة جواز .وانا بحمد ربنا ان مافيش اطفال الحمد لله .ولكنى عايشة فى حالة صدمة لكل اللى حصل مش مصدقة ان كل ده حصلى فى شهرين بس وان فرحتى بالجواز مكتملتش نسيت اقول انى لما راحوا اهلى يجيبو حاجتى لقوا ان حاجتى مسروقة حتى جهازى سرقوا منه حاجات كتير حسبى الله ونعم الوكيل.. انا تعبانة لانى كنت بحبه جدا وعملت معاه مواقف كويسة كتير بس هو مقدرش ده وقابل الحسنة بالسيئة فى الوقت اللى كنت بدارى عليه قدام اهلى من عمايله فيا طلع بيشتكينى لاهله كمان .انا زعلانة ان اللى شتمنى و ضربنى واهاننى وخانى كل ده كان منه هو الانسان اللى حبيته وصبرت عليه.لحد دلوقتى بفكر فيه وببقى نفسى اشوفه واطمن عليه وساعات بحس انى بكرهه وزعلانة منه علشان اللى عمله فيا.كان كل همى انى اعيش معاه حياه سعيدة وكنت مستحملة حاجات كتير محدش يستحملها زى تدخله فى كل تفاصيلى لبسى شعرى اكلى كلامى مكياجى حتى شكل حواجبى! .انا تعبانة نفسيا بجد الطلاق وحاسة بالوحدة مع ان بابا و ماما وكل قرايبى بيقولولى ان ربنا نجانى منه علشان حياتى معاه كانت جحيم وكنا لسا عرسان جدد وبعد كدة هتبقى حياه مستحيلة.قولولى اعمل ايه عشان انسى الماضى جرحنى و مبقتش اثق فى حد كل ده كان باختصار مقدرتش احكى تفاصيل مؤلمة كتييير.انا راضية الحمدلله بالقضاء والقدر والنصيب ولكن بتيجى عليا ايام بتعذب فيهاوبقفل قوضتى عليا واقعد اعيط لحد ما ارتاح..اسفة على الاطالة ارجو منكم ان تقدموا لى النصيحة لانى محتاجة كلام يريحنى ويصبرنى على اللى انافيه.

قدم إجابتك

أو
تسجيل الدخول في موقع حلوها سيمكنك من متابعة تحديثات القائمة التي تختارها من الأسئلة و الأقسام بالإضافة إلى أسئلتك و أجوبتك.

الحلول

يا ابنتي ساقول كما قال اهلك الحمد لله انك اكتشفت حقيقته واتخذت قرار الطلاق قبل التورط بالاولاد، لان تصرفاته من ايام الخطوبة خطأ، وضعف الشخصية عنده واضح، وانت فتاة اختار الله لك الافضل بالانفصال، لا تتحدثي معه ولا تشتاقي له، كيف ؟ اولا ثقي ان الخيرة فيما اختاره الله والزواج نصيب وقدر مكتوب علينا، ايمانك بالله سيقويك. الامر الاخر يجب ان تشغلي نفسك بالكامل بالعمل وممارسة الهوايات والرياضة، اهم شيء الرياضة لانها تساعدك على تفريغ الطاقة والتخلص من الشحنات الزائدة. اهتمي بمنظرك وشكلك واكلك ونفسيتك وخليه يسمع من الناس انك زي القمر وانك جميلة وحلوة، وعلشان يعرف انك لم تنكسري من الطلاق منه. والحمد لله انه لم يأخذ منك أكثر مما أخذ. عيشي حياتك واستمتعي وركزي على نقاط الضعف التي تحتاج الى تقوية وعلى مهاراتك واستغليها وحاولي ان تظهري في العمل وتتطوري وتثبتي له انك امرأة فقدها وخسرها بسبب جبنه. لا تتذكري اي شيء من الماضي، لانه مضى وانتهى. لا تعلقي في الماضي عيشي الحاضر واستمتعي وخططي لمستقبلك جيدا وفقك الله

قبل 27 يوم

السلام عليكم ** اولا الحب هو كل شئ جميل وانت لم تجدي معه اي شئ يدل علي الحب ومع ذلك اسمرت الخطبة ثم الزواج رغم ان كل شئ واضح جدا وكل افعاله واضحة ايضا جدا هو وهذه المراة ومع ذلك من زعل من كلامي ان ت من اصر علي اذلال نفسه تحت وهم الحب لن اعاتبك علي مضي ولكني اعاتبك الان علي حاضرك الذي تعيشيه وانت حزينة تجلسي وحدك تبكي وتشعري بالظلم وكأن ظلم الدنيا كله وقع عليك وحدك وكان حياتك انتهت وانت هكذا تخطئ في حق نفسك مرة اخري عليك ان تحمدي الله ان نجاكي منه ومن هذه المراة وتشعري بالسعادة لانك نجوت من كل هذا الشر والخداع**انت ما زلت صغيرة والحياه امامك عيشها واحمدي الله وتعلمي من اخطائك الماضية وفقك الله لما فيه الخير

قبل 1 شهر

واضح جدا انك كنتي بالنسباله ولا حاجه كنتي مجرد منظر لابعاد شبه علاقته بالمديرة .. وهو لا يحبك من الاساس وكان يقوم بأستغلالك ... مجرد تفكيرك فيه يقل منك ومن وعيك ..هذا الشخص يجب ان يمحي تماما من ذاكرتك ..ابدأي عمل او نشاطا جديد وافتحي صفحة جديدة في كتاب الحياة ولا تنظري للخلف

المزيد

قدم إجابتك

أو
تسجيل الدخول في موقع حلوها سيمكنك من متابعة تحديثات القائمة التي تختارها من الأسئلة و الأقسام بالإضافة إلى أسئلتك و أجوبتك.
مواضيع ذات علاقه