الديون ستوصلني إما للسجن أو الإنتحار!

طول عمرى بشتغل بشتغل من وانا عندى 7 سنين فى النول بتاع القماش مع امى كنت بنام الساعه 2 واصحى الفجر علشان اكمل باقى الطلبية بتاعت اليوم قبل مروح المدرسة وبالرغم من كدا كنت من المتفوقات اللى بيذاكروا على اللمبة الجاز كنا بنجيب المية من النيل على راسنا بالجرادل طول اليوم على الحال ده معشتش اىام الطفولة الا بالمدرسة وقت الفسحه بس لكن كنت راضية وحاسة انى ملكه اشتغلت بعدها فى الزرع ورعى الغنم وكملت تعليمى الاعدادى وطلعت الرابعه على المدرسة فاكرة اليوم دا لان ابويا جابلى فيها الفستان الوحيد ساعتها وبعديها دخلت ثانوى عام وو اطردنا من البيت ساعتها لان اصحاب البيت باعوه وبقينا فى الشارع لولا ان امى جابت فلوس من اخوتها واعمامى علشان ببنى بيت اوضتين وصاله وحمام دور ارضى وبابه مخلع لو اى معزة معديه فى الشارع هتوقعه واتحملنا فضلنا لسنين كتير بدون مية او كهربا بنستلف من الجيران ونولع اللمبة الجاز ونذاكر عليها وخبت خيبه ما بعدها خيبة ضغط نفسي واحباطات وفشل ورا بعض واللى زاد وغطا ابويا للى عاوزنى اتجوز ابن عمى بالعافية مع انى مش طايقاها ساعتها اتضربت ضرب مخدوش حمار فى مطلع لامؤاخذه واضطريت يوم الخطوبة احلق شعر راسي بالكامل بموس الحلاقة علشان العريس ميوافقش عليا وفعلا حصل وفرحت فرحه احلى فرحه وقرر ابويا يخلى عيشتى هباب فى هباب قال يعنى متهيئله انى عايشة سعيده فشلت فى الثانوية وجبت 62 فى المية بالرغم من انى دا مش مستواى الفعلى ولكن دخلت معهد فنى وقولت معهد والسلام احسن من بلاش ورجعت اشتغل فى الزرع والمحلات التجارية والمكتبات وكل اللى ممكن تتخيلوه لدرجه انى ممكن اخبز للجيران او اخدم معاهم لكن طموحى مماتش قررت اكمل وكان علشان اكمل لازم اعيد ثانوى تانى وفعلا اخدت المعهد وكنت بذاكر ثانوى تانى 3 سنين عذاب كان فيهم ابويا بيطفى النور علشان الكهربا غالية علينا كنت بعزره ساعتها لكن كنت بخلية ينام واذاكر بالليل وافضى نفسي الصبح للشغل لانى واخدها منازل ونجحت ساعتها قررت انى اقول لابويا انى اخدت الثانوية وعاوزة اروح الكلية وفعلا تملكتنى الشجاعه وفى ساعه رضا حكيتله ومش عارفه ساعتها حس باية بفخر بفرح برضا الله اعلم لكنه عطانى فلوس علشان التقديم وفعلا اخدت 4 سنين كلية مفيش مرة سقطت فيها كنت عاملة زى القطر اللى موقفش فى محطه ولكنى كنت بخدم امى المريضه وكمان بشتغل فى حضانه علشان المصاريف وخلصت وقدمت علشان اشتغل ولاننا ملناش ضهر اتسرق عقد عملى مرتين واخدوه ناسس تانية المهم قررت اكمل دبلومة عامه بعد الكلية سنتين وسافرت القاهرة لاخوالى واخواتى هناك وقدمت واشتغلت فى مدرسة خاصة كمدرسة وكنت ساعتها راضية بالرغم من التعب وعبء مصاريف الاكل والايجار واللبس وطلبات المدرسة من لوحات وخلافة اللى مبتخلصش واشتغلت بعد الضهر فى سنتر فى الريسيبشن لكن جاتنى الوظيفة الميرى وان فاتك الميرى اتمرمغ فى ترابه دا كلام ابويا واتمرمغت فعلا واتمرمطت واشتغلت كنت بقبض من سنتين بس 235ونصف جنية مصرى مبيقدوش حتى مواصلات ومع امى المريضه بكل امراض الدنيا كنت بقضيها سلف ودين لحد ما ربنا كرمنى واثبت 1200جنية ومع اول قبض حصل ما لم يكن فى الحسبان امى تعبت دخلت بيها المستشفى صرفت مبلغ وقدره يتعدى مرتبى 3 مرات ولقله ذات اليد اضطريت اخد سلفية من البنك بفوايد لاترحم اخدت اكتر من نص مرتبى تقريبا بقيت مسئولة عن نفسي ومصاريفى وكمان علاج والدتى واساهم فى مصاريف البيت وانى اجهز نفسي من كله ومع الوقت حسيت انى مش قادرة خلاص اكمل وجرى العمر بيا ولما ابويا اخيرا قرر الافراج عنى بانى اتجوز ومع ان العريس مش قد كده برضو وومعهوش الا انى قررت اتجوز باى حال من الاحوال حتى لمجرد امنع نظرات الناس ليا بانى عانس لانى تخطيت 37 وبالرغم من كل دا خايفة مقدرش اجيب باقى جهازى وانا معنديش فلوس ومستلفة من طوب الارض واحتمال كبير ادخل السجن اما الانتحار استنفدت جميع السبل اللى تخلينى ادور على شغل فى قريتنا الصغيرة اللى مفيهاش اى فرص عمل تعبت نفسيا واتضغطت جامد واللى مانعنى من انى اعمل اى خطوة فى اتجاه الانتحار اى خايفة اسيب امى وحدها تواجه المرض والزمن حتى لما حبيت انى اعالجها بالمجان مع احدى الجمعيات الخيرية احدى العاملات فى التضامن الاجتماعى المسئولة عن الابحاث الاجتماعية كتبت فى التقرير انى موظفة ومش من حقنا اننا نعالجها بالمجان سدت كل الابواب بوشي ولا اعرف ماذا افعل اتسجن بسبب القرض ولا انتحر من كثرة مطالبة الديون ولا اعمل اية ؟