صورة علم Saudi Arabia
من رهام ح.خ
منذ 3 سنوات 13 إجابات
0 0 0 0
  • الغيرة سبب طلاق ابنتي وحاله اكتئابها

    بنتي عمرها 19 سنه زي اي بنت جاها نصيبها وتقدم لها واحد من اهل الحجاز ماشاءا الله عليه اخلاق وتربيه وعائله محترمه ومبتعث يدرس ببريطانيا .. اتفقوا وزوجناهم وسافرو مع بعض لبريطانيا. الولد فلوسه على قده وبنتي قرر ابوها يساعدها ويدرسها على حسابه الخاص .. الحمدالله حياتهم مرتبه ومنظمه اثنينهم يدرسون ومرتاحين. لكن مشكلة بنتي مع الايام صار عندها غيره زيادة عن اللزوم لدرجة صارت تطلع من جامعتها وتقعد تراقبه في جامعته وتشوف ايش يسوي ومين يكلم واذا شافته يكلم بنت تصير زي الهبلا تهجم عليه وتبهذله ويتهاوشون قدام الناس وهو يستوعبها ويهديها.وبعد فتره صارت لو شافته يكلم اي وحده ثانيه صارت تقلدها بطريقة لبسها واسلوبها على بالها انها كذا بترضيه وتجذبه لها .. صارت شخصيتها مهزوزه وماعندها ثقه بزوجها وكثرة المشاكل بينهم بسبب غيرتها المجنونه وقعدوا على هالحال لمده 6 شهور ومره وصلت فيها العصيبه انها تضربه وهو يهديها ويراضيها.اخر مره انهارت وصارت تصارخ وتهدد وتكسر في اثاث البيت وتطقه وماتسمع له ابد.. في ثاني يوم طلب منها مبلغ كبير وعطته وراح واشترى تذكرتين عوده للسعودية بدون مايقول لها وسافر معها ورجعوا للسعودية وهم بالمطار اتصل بأبوها و طلبه يجيهم و راح لهم المطار و صار زوجها يوريه الكدمات و الخدوش و الجروح و الضرب و قاله :هذي امانتكم رجعت اليكم و بنتك طالق ,ورجع ثاني يوم لندن بروحه.بنتي جاها انهيار عصبي واكتئاب شديد وطول اليوم تدور بالبيت تدوره وتنادية وتصارخ تبيه، ومن يومها وانا قلبي يتقطع عليها ومن حالتها. ماادري ايش اسوي معها تعبت وتعبت نفسيتي معها .