مش قادرة أنسى طليقي رغم الضرب والشتم

السلام عليكم ، ارجوكم يا اخواتى ساعدونى ، انا مطلقة من شهرين وعندى ٢٨سنة جوازى استمر،٩ شهور ثم انفصلت برغبة اهلى علشان طلع وحش جدا وكان بيشتمنى ويضربنى وبياخد فلوسى وبيكلم ستات فى التليفون وعلطول جايبلى اكتئاب وحالتى النفسية سيئة ،انا مشكلتى انى مش عارفة ازاى كنت بحبه وساكتاله على كل ده بس مرة ضربنى جامد و ورملى جسمى من الضرب فخرجت عن شعورى وكلمت اهلى واخدونى ساعتها وطلقونى منه ،وانا فضلت ابكى عشان انا كنت بحبه مكنتش عايزة اتطلق منه كنت عايزة اهلى يجيبوه يادبوه ،يتكلموا معاه،بس اصروا على الطلاق وقالولى لو رجعتيله انتى مش هتبقى بنتننا ولا نعرفك ،طبعا سكت واتطلقنا . انا عارفة انه انسان سئ للاسف بس اكتشفت ده بعد الجواز و عارفة ان اهلى بيحبونى وكانو خايفين عليا بعد ما شافو منظرى وانا مضروبة وانهم عايزين الى حياه افضل واحسن ،بس انا مشكلتى انى كنت بحبه ومتعلقة بيه اوى ومقدرش اتخيل حياتى من غيره،وبعد طلاقى بيومين اكتشفت انى حامل ف٣اسابيع فاهلى اخدونى وعملولى اجهاض ومن غير ما حد يعرف ولا زوجى نفسه،لانى اكتشفت ده بعد الطلاق بس. اهلى مكنوش عايزنى اجيب منه طفل يتعذب ويعيش من غير والده. انا بجد تعبانة مش عارفة انسى طليقى ولا انسى اللى هو عمله فيا ولا اللى حصل فيا كل ده صعب عليا مش عارفة انسى ايه ولا ايه ولا ايه . ارجوكم ساعونى.