كيف أتعامل مع زوجة أبي التي تجبرني على الدراسة

كيف أتعامل مع زوجة أبي التي تجبرني على الدراسة معكم اخوكم من سوريا طالب جامعي سنة ثانية هذاك العام كنت ساكن بالسكن الجامعي ومشان ما اطول عليكم الكل بيعرف حياة طلاب السكن كيف بتكون سهر وطلعات وفوتات ولعب ورق والخ من نمط حياة طلاب السكن لكن فجأة حياتي تغيرت بشكل كامل بداية مع وفاة والدتي قبل عامين وتلاها عندما تزوج والدي من امراة يلي هي حاليا خالتي زوجة ابي ارملة وعندها صبي وشاءت الاقدار ان هالمرأة تدخل عحياتي وتقلبها 180 درجة

مع بداية السنة رجعت زوجة والدي لتكمل الدكتوراه وتدرس بالجامعة يلي كانت مفصولة منها خلال الثورة وبنفس الجامعة يلي بدرس فيها ونفس المدينة لكن بغير كلية وغير اختصاص ولهذا السبب طلب مني ابي اني ما اسجل بالسكن واروح اسكن معها هي وابنها طالب بالصف التاسع بالشقة يلي استأجرها لألنا وكانت بتداوم بالجامعة اربع ايام وباقي الايام بتروح فيهم عالبلدة عالبيت وطبعا هالايام بكونوا يوم السعد عندي متل السجين وقت بطالعوه للتنفس مقابل الجحيم يلي بعيشه معها

طبعا قد يقول البعض ان ابالغ لكن لاشرح لكم عن شخصيتها زوجة ابي متسلطة لابعد الحدود ووالدي عاطيها كل الصلاحية بالتعامل معي ممنوع الاركيلة ممنوع الطلعة برا البيت بعد الساعة ١٢ وعندها الدراسة خط احمر لازم ضل ٣ ساعات مسجون بالغرفة بعدما تاخد مني الجوال وممنوع اطلع مع اصدقائي الا لحتى اقضي ساعات الدراسة

تنظيف البيت علي انا وابنها كل يوم لانها ما بتقدر تشتغل عمل مجهد لانها حامل وعم تنتطر هي وابي البنت الوحيدة يلي راح تجي على عيلتنا مع العلم ان ما عندي اخت اخوتي الاثنين صبيان اصغر مني واحد بالثانوي والاصغر صف تاسع بعمر ابنها الوحيد وطبعا الطوق الامني المفروض علي مفروض على اخوتي بالايام يلي بتكون فيها عندهم وحتى مسموعياتها بالكلية يلي بتدرس فيها انها صعبة كتير عالطلاب بالاعطاء والدروس والمذاكرات وايضا هي من اسرة محافظة فعلى الرغم من انها صغيرة بالعمر ما تجاوزت الاربعين لكن ما عايشة مثل باقي الصبايا يلي بعمرها لا اغاني لا اراكيل لا دخان ما عندها صديقات تطلع معهم وما بتطلع برا البيت الا كون انا او ابنها معها وما بتسافر الا يكون ابنها معها اولا مشان تسافر مع محرم وثانيا مشان يضل ابنها تحت عينيها

الصلاة طبعا انا وابنها وقت بتكون معنا حصرا بالجامع حتى بصلاة الفجر واللابتوب الشخصي تبعها لا مسلسلات لا افلام لا اغاني فقط دروس دينية وشي الف كتاب والف حلقة بحث بمجال دراستها ومرة من المرات صار تصعيد بيني وبينها تركت البيت ونمت ليلتين عند اصدقائي

لكن لازم نذكر بعض النواحي الايجابية بشخصيتها الشيء بالشيء يذكر فعلى الرغم من المشكلة يلي صارت بيناتنا ما خبرت ابي ابدا مشان ما يعاقبني وبالعكس بتضل بتمدح فيني قدامه يعني على الرغم من صعوبة التعامل معها وقسوتها علينا بالدراسة لكنها كتير حنونة وطيوبة وبتحاول جاهدة تعوضنا انا واخواتي الحنان يلي فقدناه بوفاة والدتي ووقت تركت البيت ضلت خلال هاليومين يلي غبت فيهن تعتذر مني وتتواصل معي حتى ارجع وانني بمثابة وبغلاوة ابنها وعند رجعتي بالبيت كانت بانتظاري بالاكلة يلي بحبها وللمعلومة طبخها كتير لذيذ

صارت تحدثني عن طيش المراهقة واني بهالعمر لازم انتبه عحالي وحكتلي عن معاناتها وهي بحياتها كتير عانت وتلاحقت امنيا عايام النظام السابق وزوجها السابق تم اعتقاله واستشهد بالمعتقل لكن هي باخر لحظة قدرت تهرب هي وابنها وتنجو من الاعتقال

ما بخفيكم سر ان على الرغم من قسوتها بعض الشيء معنا الا اني تعلقت فيها وصرت اشعر انها فعلا بمثابة ام او اخت كبيرة بتدير بالها علينا وابنها كتير كتير طيوب وعاقل علما ان ما صار لي زمان عايش معهم الا ان تعلقت فيه كمان وصرت اشعر فيه بمثابة اخي الصغير

كتير احيانا بفكر ان اتمرد عليها وعلى ابي واطلب منه ان ارجع اسكن مع اصدقائي وبوصل لمرحلة ان خلص مستحيل عيش معها ولا يوم لكن برجع بفكر ان يمكن تصرفي خطأ والشي يلي بتعمله زوجة ابي معنا ما هو بدافع كره انما هالامر بالنهاية لصالحي وكان وعدها دائما لي انها بدها تضل علي لحتى اتفوق بكليتي وفعلا درجاتي بهالسنة احسن بكتير من السنة الماضية واقتربت لكون من الاوائل على كليتي لكن هدا الشي على حساب حياتي يلي ما بقدر عيشها متل اصدقائي ومتل اي شب بعمري بسببها